Read Ekari LUKAS 18 Bible Online

LUKAS 18 - Ekari bible

LUKAS 18

¹Okai ena dani awe-tai mana oowegai, dimi te duwajawijake sembahjang to tigoo beu kai peu mana kodo.

²Eteete mana, „Maki katouda mana peta-tai idaana toojogo. Okai Ugateme weda egai beu. Daana me maija ibo ejaikai beu.

³Kii makiida mijáá jagamo tojake okaapa megoo tijake ediimeete mana, ’Akaije nate-tai me kidi maida boko napetajawii,’ eetii.

⁴Okai gepuu to etigoo, kodeja wadoutouga okaija kegepa duba kei teete mana, ’Ani Ugatame weda egai beu, daana me maija ibo ejaikai beu kodeja,

⁵kou mijáá kodo apaapu natigoo kouja ani boko japetajawiita, megoo teete ani odoo kidoke na kojoka,’ gai.”

⁶Tijake Tuhan eteete mana, „Peu peta-tai kidaa mana juwei!

⁷Beu mee? Ugatameja ewitokita bagee agapi wanee ediimigoo to tijake boko japetajawiitagi, okei maida ipee kipi maija.

⁸Ani kitii, okai egaa kodo boko japetaitagi. Kodeja me Joka meitagiida makiida kiija maakodo gai mana domakaitagi, mee?” etii.

⁹Me wija wido akaato maa gajake joko bagee daba ejaikita bagee kedeepa ena dani awe-tai mana oowegai.

¹⁰„Me ida wija Ugatameja owaapa sembahjang taine woujo aakai. Idaana ki Parisi me, daana joko ka kidi mege kotuu te-tai.

¹¹Parisi me kidi joonidoke tijake okai kidi kii dani sembahjang tai: ’Ei, Ugatame, nagajaweege katii, ani ki joko ka bagee dani ko beu kouja. Bokome-tai juwa, anaani juwa, mogai juwa, kii mege kotuu te-tai kidi juwa dani bukaa.

¹²Sabbat putuuda kigi wija te nai dijo douga. Anija motita aagijo taagijo gaatijago didee kaneiga,’ wegai.

¹³Kodeja mege kotuu te-tai kidi poto make joonidoke tijake, epa maida wado dou weda gajake mijouga kijake kei teete mana, ’Ei, Ugatame, ani peu me ipa nagai!’ etii.

¹⁴Ani kitii, kii me kidi maa eewijake owaapa jamo uwii, joko ka kidi dani ko beu. Akaato ibo awita me kidi daba kaitagi kouja, kodeja akaato mijo awita me kidi ibo kaitagi.”

¹⁵Me ka jokaido Jesuspa oomei, ejakido-tita. Etope-taido edojake enogimai.

¹⁶Kodeja Jesus jokaido kede manaa-tijake eteete mana, „Jokaido aneepa me-tita no naaejaikei. Wate-wate te etai. Ugatameja jakimakita makiida kei dani bagee ipuwe kouja.

¹⁷Beu maa kou ani kitii, meija Ugatameja jakimakita makiida joka dani tijake te jakimakipi, okai kouda kodaa umina wadoujo te kaitagi,” etii.

¹⁸Pika-tai idaana ka Jesus egaado teete mana, „Ei, enauto Kuduu, ani magijo kei tai ajii taine no?” etii.

¹⁹Tijake Jesus eteete mana, „Magijo ka enauto naabateege? Meena ma enaa beu, kodeja Ena to, kii ke Ugatame kidi.

²⁰Nitimakita manaido aki epi. Mogai te tai, me te wagii, oma te motii, puja mana te kubai, akaitai akuukai ibo ejaikai,” etii.

²¹Tijake amo eteete mana, „Kei utoma jokaida kodaa make dijo douga,” etii.

²²Jesus kou mana juwijake eteete mana, „Tumaana to akeepa beu. Akija agijoudo utoma kaa tijake daba bageepa jawudii. Tijake aki epaawado ka agijo makiitage. Daana mejake ani naapei,” etii.

²³Kodeja kou mana juwijake okai gaagaa umina, okai tonawi umina kouja.

²⁴Jesus kou kodo jadojake wegaate mana, „Tonawi bagee Ugatameja jakimakita makiida wadoujo kai ko gaagaa umina no.

²⁵Tonawi me idaana Ugatameja jakimakita makiida wadoujo kai ma ko, unta idaana keipo mugu duba woujo kai ko euga ekowamakija,” etii.

²⁶Kou mana juwita bagee eteete mana, „Keetigo meime ajii tija?” etii.

²⁷Kodeja Jesus eteete mana, „Me ka te ekowamakija mana Ugatame ekowamakija,” etii.

²⁸Tijake Peterus eteete mana, „Dodou, inii ipuwe agijo jaikidokijake kaapeetege,” etii.

²⁹Tijake Jesus eteete mana, „Beu maa kou ani kitii, me idaana ma Ugatameja jakimakita makiida maida make owaa ma, jagamome ma, kenekaane ma, nakame ukame ma, jokaane ma te ejaikidokii,

³⁰kodeja kii makiida kiija kigi inoudo joko motiitagi, daana wado ka wagiida kodaa ajii tai imo to togoo,” etii.

³¹Wija ma gaati kede ouwijake eteete mana, „Juwidowei, inii Jerusalim wado uwii. Daana utoma agijo utoma tikauwa ka gokobaki tijawiidaiga wegai tita bagee ka me Joka maida make ebijamakita manaido kobadaa taitai.

³²Ojaa bageepa eekegajawiitai kouja; tijake okei ewidogijake peepu etaitai, daana epoge etuwaitai.

³³Tijake okei godijai etijake wagimakaitai; tijake widaago naago okai anigoutagi,” etii.

³⁴Kodeja kei manaido mana mutoona ma gamakai beu. Okeepa make mana boko jato boonidoke kouja, tijake etita mana gamakai beu.

³⁵Jericho kapauto kijake peka wanee me idaana ita watija animakijake naimi-naimi teetigo.

³⁶Me wedaba wokaato keete juwijake, egaado teete mana, „Magijo ewaa keega?”

³⁷Etijake me ka eteete mana, „Jesus, Nazaret ka me kidi jaweete,” etii.

³⁸Tijake emeeme teete mana, „Ei, Jesus, Daud Joka, ipa nagai,” etii.

³⁹Okei tiga jawita bagee ewidogijake, gabo tou etii. Kodeja okai umina kidi emeeme to tigoo, „Ei, Daud Joka, ipa nagai!” etii.

⁴⁰Tijake Jesus joonidoke tijake aneepa oomei etii. Okai kapa kijake Jesus egaado teete mana,

⁴¹„Aki magijo ide ani kakei tai ko?” Etijake, „Tuhan, peka nakadijawii kadiimai,” etii.

⁴²Tijake Jesus eteete mana, „Peka dodou. Akija maakodo gai kodaa beu keege,” etii.

⁴³Okai kou gaa kodo maija peka kadidoke tijake eepei, Ugatame muta etuwaate. Meido utoma kou kodo dojake Ugatame muta etuwai.