Read Ekari LUKAS 20 Bible Online

LUKAS 20 - Ekari bible

LUKAS 20

¹Naagoona Ugatameja owaa duba meido etopeetigo, daana ajii mana pitokeetigo, imam iboudo ma, kapogeije epi bagee ma, me iboudo ma okaapa mei.

²Tijake okei eteete mana, „Enidou, má bida agijo ka kei agijoudo kei teige? Daana meija bida bokouto kaneemegi?” etii.

³Tijake okai wo eteete mana, „Ani na mana mutoona kigaado taipiga. Enidowei!

⁴Jahja baptis tei tita mana kodo epauto ko epaawado make, mee? meepa make,” etii.

⁵Tijake okei akado wegene teete mana, „Kou danite, ’Epaawado make’ etipe ko, ’Magijo ka ikii maakodo egai beu?’ eniipagi kodaa.

⁶Kodeja inii ’Meepa make’ etipe ko, me utoma mogo ka nigigoo taipigai; Jahja kidi gokobaki tijawiidaiga wegai tita me okei epaapa timakai kouja,” wegai.

⁷Tijake „Epauto ko kaija make juwa inii ewo,” etii.

⁸Tijake Jesus eteete mana, „Keetigo ko ani maija kei agijoudo kei teiga bida agijo ko ti kitiipiga,” etii.

⁹Tijake kii ena dani awe-tai mana meidoopa oowegai: „Me idaana uta buda táí wejake mune-tai bageepa jajaikijake joko ka makiida uno magoo na dani uwii.

¹⁰Uta uwa kijake jakei te-tai me idaana mune-tai bageepa ebadikumii, taida ka uta jamene-tijake. Kodeja mune-tai bagee kedaa kopa wagijake agijo tagu eebakikumii.

¹¹Jakei te-tai me idaana ma ebadikumii. Kii kidi maija okei kopa wagijake daana peepu umina etijawijake agijo tagu eebakikumii.

¹²Widaago maija ebadikumii. Kii kidi okei jati ewajake tijake juwouda eepekumii.

¹³Tijake táí ipuwe me kidi kei teete mana, Ani magijo kei tai? Ani joka didé ebadikumiita. Okai kidi okei ibo ejaikaitai kojoka, gai.

¹⁴Kodeja mune-tai bagee edojake okei kede wegaate mana, ’Kii ke okai komouto kaine me. Neewagei, jajaikaitagi agijo inii ipuwe ke-tita no,’ wegai.

¹⁵Tijake taida make eemigimakijake wagimakai. Kojoka táí ipuwe me kidaa mune-tai bagee maida magijo kei etaitagi?

¹⁶Okai mejake mune-tai bagee kede wagimakijake táí kodo me inoopa jajaikaitagi.” Okei kou mana kodo juwijake eteete mana, „Te neekei tai.”

¹⁷Kodeja Jesus edomakijake eteete mana, „Keetigo ko kapogeije mana ki boko jato ko magijo: Owaa mige-tai bagee ka jamo jaikita mogo kodo Owaa butu ka kabo makita mogo pigu tijawita.

¹⁸Meija kou mogo maida gootipi, juma duwadaa. Kodeja mogo kodaa mijo etagimai bagee tagi tidaa.”

¹⁹Okai kou gaa kodo kapogeije epi bagee ma imam iboudo ma ejakimakaine dimi gai. Kodeja okei meido weda egai. Kii ena dani awe-tai mana okei kede maida jawegata gamakai kouja.

²⁰Okei edoutojake doodoo puga bagee ewane-tita ebadikumii, okaija mana maida ejakimakaine tijake, maki douto-tai bagee bidaidaiga eekegajawiine tijake.

²¹Okei egaado teete mana, „Ei, Kuduu, inii epi aki doodoo mana to godajake nitopai, daana me idaana ma ibo te ejaikijake Ugatameja takaa doodoudaiga nitopeige.

²²Kaisar mege menii pijo, mee? dá,” etii.

²³Kodeja okeija kuba-mote dimi kodo okai jadojake eteete mana,

²⁴„Mege namuwakiwei. Meija ajá ma ebijamakita mana ma topi?” Etijake „Kaisar ipuwe,” etii.

²⁵Tijake Jesus wo eteete mana, „Keetigo ko Kaisar ipuwe agijo Kaisar wo menii, daana Ugatame ipuwe agijo Ugatame wo menii,” etii.

²⁶Me jumaapa okaija mana jajaki-motii kaga gata. Okaija wo etita mana kodo ego takuu-takuu tijake gabo tou.

²⁷Saduki bagee wija wido okaapa mei; bokata bagee taanigou mana wega-tai bagee kede. Okei egaado teete mana,

²⁸„Ei, Kuduu, Musaja nijaebijamakita mana ko: Kou danite me idaana kenekame bokajake jagamome tou, kodeja joka beu ki-toojogo, mijáá kodo wo bukijake kenekame maida make me ijoo jakebajawii.

²⁹Okei keneka pituwo toojogo. Ibouto kidi waka bukijake joka beu kidi bokai.

³⁰Tijake ipougame ma

³¹mabiime ma jagamo kodo wo bukijake, okei pituwo wo bukijake joka makii beu tijake bokai.

³²Wadoutouga jagamo kodo maija bokai.

³³Keetigo ko bokata bagee anigou naago kou jagamo kodo meija waka kaita? Okei pituwo ebukita kou no,” etii.

³⁴Tijake Jesus eteete mana, „Kii wagi ka bagee waka bukii ma, waka eumai ma.

³⁵Kodeja wiwitiida gaa kodaa, bokata bagee jupi make anigou manaida woujo kai enaa egata bagee kede waka bukii na beu, waka eumai na beu.

³⁶Okei kigeena ma te bokaitai kouja. Okei Ugatame jaetigo-tai bagee dani bukaa. Okei Ugatame jokaane kede, bokata bagee jupi make anigou mana ipuwe bagee.

³⁷Kodeja bokata bagee eenigojawii mana muto Musa maija nimuwakita, okogo manaida kodaa, okai Ugatame maida jawegata gaa: Ibrahimja Ugatame, daana Isakja Ugatame, daana Jakubja Ugatame kidi.

³⁸Ugatame kidi bokata bagee ipuwe ko beu, kodeja ija bagee ipuwe. Utoma Ugatameepa ija tou kouja.”

³⁹Tijake kapogeije epi bagee wija wido wo eteete mana, „Ei, Kuduu, aki eneege ko maakodo,” etii.

⁴⁰Kouda make ko okei egaado tai uu beu.

⁴¹Tijake Jesus eteete mana, „Kawe dani tijake me ka Keristus kidi Daud Jokame wegaigai?

⁴²Daud kidaa ugaa manaida wegai kouja: Tuhan kidaa anija Tuhan kidiipa etita mana, Anija etikaato gebo animakai,

⁴³Be kagata bagee akija bado mijouto tagi atijake Bado makijaida kaaejaikaitaida to.

⁴⁴Kou danite Daud kidaa Tuhan eebatita Kawe dani tijake okai Jokame kai?” etii.

⁴⁵Me utoma jumaapa Jesus etope-taidoopa eteete mana,

⁴⁶„Kapogeije epi bagee maida make akaato munii. Woja kagaba makijake uwina te-tai ide bagee. Daana akaada tetaida ibo ejaikai mana juwii ide. Daana sembahjang owaa duba ibo jaikita animakaida ide. Daana buka no-taida diiti pagaadagaida ide.

⁴⁷Mijáá jagamo jabokomimakai, daana utoopa sembahjang woja. Umina peu kugouto dokeenii,” etii.