Read Ekari LUKAS 23 Bible Online

LUKAS 23 - Ekari bible

LUKAS 23

¹Okei utoma joonidaa tijake Jesus Pilatus jumaapa ouwii.

²Okei utoma ijeije eteete go-motii, eteete mana, „Kii me kidi inii tuma monoo nitei teetegi edomakeemege, daana Kaisar mege menii mana beu nitei teetegi, daana okai kidi Keristus, jakimake-tai idaana tei teetegi,” etii.

³Tijake Pilatus egaado teete mana, „Aki ki Jahudi ejakimaketai me kidi, mee?” Etijake wo eteete mana, „Akija eneege dani,” etii.

⁴Tijake Pilatus kidaa imam iboudo ma, me wedaba ma kedeepa eteete mana, „Ani kii me ki maida peu tumaana ma jadomakai beu keega,” etii.

⁵Kodeja okei bida peu kidi eteete mana, „Okai meido tetepepe etei teetegi, Judea dokoo utoma, Galilea make go-motijake jakai dakii teetegi,” etii.

⁶Pilatus kou mana juwijake egaado tai, me kidi Galilea ka me, mee? tijake.

⁷Okai Herodes douto-taida ka me kidi mana epi kijake, Herodespa ouwii etii. Okai kou gaa kodo okai Jerusalim toojogo.

⁸Herodes Jesus edojake ideide tai, okai tika kodaa make edoune gata kouja, mana wedaba okai maida make juwijake. Daana dou beu agijo kei tai edoune tijake.

⁹Okai kouja okai mana wedaba egaado tai, kodeja Jesus mana mutoona ma wo etii beu.

¹⁰Imam iboudo ma, kapogeije epi bagee ma ijeije umina eteete joonidaa ti-toojogo.

¹¹Herodes kidi serdado ma enaimo peepu etijake ewidogai. Tijake diiti kagaba jamakijake, Pilatuspa joko ebadikumii.

¹²Okai kou naago kodo Herodes ma, Pilatus ma akooge akooge aatai, tika kodaa be akaga te-tai kodeja.

¹³Tijake Pilatusja imam iboudo ma, pika-tai bagee ma, meido ma manaa-tijake

¹⁴eteete mana, „Kii me kidi meido monoo ete-tai me danite aneepa oomeega, daana kiija ikii pekaida ani igi ejakimakijake peu agijo ena ma okai maida jadou beu keega, ikiija ka ijeije etipa danite

¹⁵Herodes maija beu, ineepa joko nijaebadikumipi kouja. Juwidou, ebokajawii mana okai maida beu.

¹⁶Okai kouja ani godijai etijake ejaikaipiga,” etii.

¹⁷Ibo naago kodo Pilatus kidaa egadimimakita me idaana jajaikija kouja.

¹⁸Kodeja okei utoma enaimo kidi emeeme teete mana, „Kii me kidi niwagimigei! Barabbas nijajaiki!” etii.

¹⁹Barabbas kii ke wanee owaa duba amo eewita, ibo makiida tetepepe ewaa awita kouja, daana me wagimakita kouja.

²⁰Tijake kigeena ma Pilatus mana oowegai, okai Jesus ejaikaine gajake.

²¹Kodeja okei emeeme to teete mana, „Pija boko maida edajawii. Pija boko maida edajawii,” to tigoo.

²²Tijake kigi widaago Pilatus egaado teete mana, „Má peu agijo kei tijake ka? Wagiine kou ko ani peu tumaana ma jadomakai beu keega. Okai kouja ani godijai etijawijake ejaikaipiga,” etii.

²³Kodeja okei wage-tita tijake umina maa kou kuutakaa emeeme tai. Tijake okeija ka mana petee kita.

²⁴Tijake okeija ka ediimita mana kodo Pilatus boko jaduwajawii.

²⁵Tijake tetepepe duba me wage-tai mana maida make wanee owaa duba amo eewita me kidi jajaikai, okeija ka ediimita kodo danite. Kodeja okeija ka gata danite Jesus jaekegajawii.

²⁶Okei Jesus ouweetigo gaa Kireni ka me idaana eka ki Simon ejakimakai, mudeida make meetigo gaa. Tijake okaija kodeida pija boko kodo jadokijawii, Jesus nemoutouga dokijake eepe-tita.

²⁷Me umina wedaba eepei, daana jagamoudo jiijii ma jege ma eteetigoo.

²⁸Kodeja Jesus okeepa wouga kijake eteete mana, „Ei, Jerusalim ka jagamo jokaido, ani jege te natai, kodeja ikii akaato ma, ikii jokaane ma jege etai.

²⁹Juwidou, putu duwaita gaa okei wegaitai mana, ’Pijaakita bagee ideide no! Daana modo dokii beu tijake ama menii beu bagee.’

³⁰Okai kou gaa kodo me ka bagoudaapa mana go-motiitai, eteete mana, ’Inii maida nitagimidou!’ Daana keboudaapa etii ko, ’Neepumidodou.’

³¹Ija pija maida kou kei tipai, gee pija maida kawe dani kei taitai?” etii.

³²Peu me wija maija okai ma enaimo wagiine ouwii.

³³Eka ki Dagi Mitoo Kotuuda dakii tijake, okai kouda kodaa pija boko maida edajawii. Daana peu bagee maija me idaana etikaato, me idaana akaato etijawii.

³⁴Tijake Jesus sembahjang teete mana, „Ei, Naitai, ipa ejaikai, okei ewoudaiga kei teete kouja,” etii. Okei tipa po momogo tija dani kei tijake okaija kagaba wudijawii.

³⁵Meido kede pege ati-toojogo. Iboudo kede ewidogai, wegaate mana, „Okai joko ka bagee petii etijawita. Ito kou okai akaato petii ti-ati, okai kou danite Ugatameja Keristus, ewitokita kidi keetigo ko,” etii.

³⁶Serdado maija mejake ewidogai, daana enege utaadijo menidou,

³⁷eteete mana, „Aki Jahudi ejakimake-tai kidi keetigo ko, aki akaato petii tidodou,” etii.

³⁸Okai wadouto kou dani ebijamakita: Kii ke Jahudi ejakimake-tai me.

³⁹Peu ka edajawita kede ka idaana ewidogeete mana, „Beu mee? aki ki Keristus. Aki kidi ma inii ma petii neetijawidou,” etii.

⁴⁰Kodeja joko ka kidaa ewidogijake wo eteete mana, „Aki Ugatame weda egai beu, mee? Okai kii kidi danite aki peu kaawegai kouja.

⁴¹Daana inai ke maakidi peu neeweegai, inaija ka aakei tita danite abu nijapaagai kouja. Kodeja kii me kidi peu agijo ena ma kei tai beu,” etii.

⁴²Tijake eteete mana, „Ei, Jesus, ani maija nagai, akija jakimakita makiida dakii taitage gaa ko,” etii.

⁴³Tijake Jesus eteete mana, „Beu maa kou ani katii, ito kii naago kidi pípoga makiida ani ma enaimo aakaipage,” etii.

⁴⁴Okai kou gaa kodo dagi epouda gaa kodaa, kou maki utoma wanee kijake meuka amouwe dagiida to.

⁴⁵Meuka tani pa maija igadoke tai, daana Ugatameja owaa bede duwajawita kagaba petaago wija kidoke tai.

⁴⁶Tijake Jesus kuutakaa emeeme teete mana, „Ei, Naitai, aki ganeida anija dimi mana wado kajaikai!” Etijake ebeejo wo motidoke.

⁴⁷Serdado migougu me idaana kidi kei tidoke mana kodo dojake okai Ugatame muta etuwai, wegaate mana, „Beu maa kou me kidi enaa me,” wegai.

⁴⁸Kou agijo doune tijake pege atita bageido kede kei tidoke tita mana kodo dojake kegepa tagi atijake metaato uwii.

⁴⁹Okai ma bagee utoma daana Galilea make eepeta jagamoudo ma poto make joonidaa tijake kei manaido doutou.

⁵⁰Me idaana eka ki Jusuf, mana pika-tai ka idaana, okai dimi mana jikoo me;

⁵¹okeija kepajawita mana ma, kei tita agijo ma okai ena dimi kepajawii beu. Okai Arimatea ka me, Jahudi dokoo ka maki enaida. Okai kii kidi ki Ugatameja jakimakita makiida douto-tai.

⁵²Kii me kidi Pilatus jumaapa Jesusja má jato ediime-uwii.

⁵³Tijake má jato mijouwe eewijake enaa kagaba ka etonijake mogo duwimakita me oka duba emakijawii, me idaana ma emakai beuda kodaa.

⁵⁴Kou ko epeepi tijawii naago kodo, tijake Sabbat naago kaineega.

⁵⁵Jesus ma enaimo Galilea make meta jagamoudo utoma eepejake me oka dou, daana emakita mana kodo dou.

⁵⁶Okei metaato uwijake unu enaa agijoudo epeepi timakai. Sabbat naago dijo douja mana epeepe gabo tou.