Read Ekari LUKAS 4 Bible Online

LUKAS 4 - Ekari bible

LUKAS 4

¹Jesus Rohulkudus ka ebetume tijake Jarden make wo uwii. Roh ka me beuda

²naago mepiija ouwijake Teege ka egaado tigoo tai. Kei naagoudo kei okai ena ma nai beu. Okai kou wagi muumai tijake okai naidi gai.

³Tijake Teege kidaa eteete mana, „Kou danite aki ki Ugatame Joka keetigo ko, kii mogo ki goti kidoke ti etii.”

⁴Etijake Jesus wo eteete mana, „Kapogeije ebijamakita no: Goti ka to me tuma umi-tou te tija,” etii.

⁵Tijake Teege kidaa wado ouwijake uwoje makije ka jakimakita makiido okai kou gaa kodo to emuwakai.

⁶Tijake Teege kidaa eteete mana, „Akeepa to bida agijo kodo ma, ajiipi ma kaniita, aneepa naaekegajawita kouja, daana ani ide gata meepa menii to.

⁷Okai kouja aki migaakobe natipe ko, kou utoma aki ipuwe to,” etii.

⁸Tijake Jesus wo eteete mana, „Kapogeije ebijamakita: Akija Tuhan Ugatame migaakobe etai, Daana okai to dijo jadou,” etii.

⁹Tijake Jerusalim ouwijake Ugatameja owaa ka wado tí titaida kodaa emakijawii, eteete mana, „Kou danite aki Ugatame Joka keetigo ko, mijo gootidodou.

¹⁰Kapogeije ebijamakita kouja: Okai jaetigo-tai bagee kaaetiipagi, kamune-tita tijake.

¹¹Daana: Gane wado kakatagi-toupigai, Bado mogouto tokoo tidoke na kojoka.”

¹²Tijake Jesus wo eteete mana, „Kii dani mana wegata: Akija Tuhan Ugatame egaado te etai,” etii.

¹³Egaado tai manaido Teege muumai tijawijake okai kou gaa kodo wo godoke tai.

¹⁴Wadoutouga Roh bidaidaiga Galilea wo uwijake, okai maida make mana kou maki dokoo ugo uwidoke tai.

¹⁵Tijake okeija ka sembahjang owaa utoma duba okai etopina, daana me utoma muta etuwai to.

¹⁶Okai Nazaret dakii, ejataida kodo. Okai kei teigi danite Sabbat naago sembahjang owaapa woujo kai. Ebataine tijake joonidoke tai.

¹⁷Jesajaja kapogeije okei menii. Kapogeije kebajake kii mana ebijamakitaida dou:

¹⁸Tuhanja Roh ani maida topi Jeboo natuumita kouja, Daba bageepa ajii mana japitoke-tita, Daana egadimita bagee epipikajawii mana ete-tita, Daana peka wanee bagee domake-tita, Daana tagi atita bagee epipikajawe-tita.

¹⁹Daana Tuhanja enaa wagi mana wegakume-tita tijake.

²⁰Okai kapogeije munijawijake douto-tai meepa amo menijake animakai. Sembahjang owaapa tota bagee okai maida to peka wagimakai.

²¹Okai mana go-motijake eteete mana, „Ito kii naago kidi kapogeije duba ka ikii juweega mana kodo kobadoke teega,” etii.

²²Meido utoma okai maa kou wegajake okai ebeida ka jikoo manaido apai umina, wegaate mana, „Beu mee? kii ke Jusuf joka kidi no?” wegai.

²³Tijake Jesus eteete mana, „Beu ma ko beu, ikiija ka eniipiga mana ko: Kowaa ke, doktoda, akaato tiga ojawii. Aki Kapernaum kei tei tita agijo inii juweetege kodo jakai maija aki kidaa makiida kei tai.”

²⁴Daana eteete mana, „Beu maa kou ani kitii, gokobaki tijawiidaiga wega-tai me idaana ma beu okai kidaa makiida ibo ejaikai.

²⁵Kodeja ani maa kou kitii, Elias tota gaa Israil makiida mijáá jagamo wedaba tou tita; epa kodo taun ebeebe ka wii munidoke tijake kou maki dokoo utoma naidi uwa potu tita gaa.

²⁶Kodeja Elias kidi me idaanaapa ebadikumii beu, kodeja Sarepta ka makijo Sidon dokoo ka mijáá jagamo kodoopa to.

²⁷Daana Elisa mana wudei tita gaa Israil bagee wedaba tomo jago dani tou tita; daana meena ma jaojawii beu, kodeja Naaman, Sjam makijo ka me kidi to,” etii.

²⁸Kou mana juwijake sembahjang owaa duba tota bagee utoma emoge umina egai.

²⁹Okei joonidaa tijake makiida make eebakai. Dimiida okeija ka makijo ka migitaida kodo jagaida ouwijake mijo eemigaine dani tai.

³⁰Kodeja okei jupiiga wokaato kijake uwii.

³¹Okai Galilea ka dokoo ka makijoona eka ko Kapernaum mijo uwii. Okai kouda kodaa Sabbat naago meido etopai.

³²Okaija etopita mana okei ego takuu-takuu umina, okaija mana kodo bida kouja.

³³Sembahjang owaa duba enija jago me idaana tojake, kuutakaa emeeme teete mana,

³⁴„Ei, Jesus, Nazaret ka me, aki ma inii ma má imee? Aki peu neewiine meege, mee? Aki ki ani epi no, Jimubeu kidi Ugatameepa make meta,” etii.

³⁵Tijake Jesus ewidogeete mana, „Gabo! Me kidi duba make podomidou,” etii. Tijake enija kodaa me kidi meido jupi juma duwajawijake podomai, peu te jatijake.

³⁶Meido utoma ego takuu-takuu umina timakijake okei kede wegaate mana, „Jee! Má mana kou ko? Okai mana bida peu etimakijake enija podomeegai kou ko,” wegai.

³⁷Tijake kou maki dokoo utoma okai maida make mana wudigi tidoke tai.

³⁸Sembahjang owaapa make podomijake Simon owaapa woujo kai. Simon baakame gobi umina ka pakuti-toojogo. Tijake eedade-tijake okei Jesus ediimai.

³⁹Okai watija joonijake gobi kodo, „Beu ki” etijake gobi kodo beu kidoke tai. Okai kou gaa kodo maija okai anigojake eedadai.

⁴⁰Meuka wakoujo kijake meido kede didi tuma tumaija ejakita bagee Jesuspa oomei. Me gakita maida gane jamakijake beu jaawii.

⁴¹Enija maija me wedaba duba make podomijake emeeme teete mana, „Aki ki Ugatame Joka!” Kodeja okai enijaido kodo ewidogijake mana te wegai etii. Okai ki Keristus kidi okei epi kouja.

⁴²Abata digii okai podomijake me beuda uwii. Meido kodaa eubaate okaapa mejake ejakimakaine, okai te ejaike-tita tijake.

⁴³Kodeja Jesus eteete mana, „Joko ka makiida maija Ugatameja jakimakita makiida ka ajii mana kodo ani jawudii beu kai peu. Okai kouja ani nabadikumita,” etii.

⁴⁴Okai Galilea ka sembahjang owaido duba mana wudina.