Read Ekari LUKAS 8 Bible Online

LUKAS 8 - Ekari bible

LUKAS 8

¹Wadoutouga Jesus kou maki kuduuga uwina tai. Okai mana wudina daana Ugatameja jakimakita makiida ka ajii mana kodo eti-menii. Okei wija ma gaati kede maija okai ma enaimo.

²Daana jagamo wija wido maija, enija ma, didi ma beu jaawita bagee. Kou ko, Magdalena eebatita me Marjam kodo, enija pituwo okai duba make japodomijawita me kodo.

³Johanna, okai Herodes owaa douto-tai me ki Chuza jagamome kodo ma; daana Susana maija, daana joko ka jagamo wedaba. Jesus ma etope-taido ma gai peu agijoudo eedadai.

⁴Me wedaba kotuu timakijake, daana maki gakita ka meido okaapa mejake, okai ena dani awe-tai manaidaiga oowegaate mana,

⁵„Pi kigii te-tai me kidi pi kigii taine podomai. Pi kigii teetigo pi ino ko ita watija gootidaa. Tijake bado ka daimita, daana epa bede maki bede ka bedoudo ka nojawigou.

⁶Dedaana ino ko mogo makiida gootidaa. Ejajake wei kogi tai, maki debeta beu kouja.

⁷Ino ko dogo jupi gootidaa; dogo ma enaimo ejajake dogo kodaa pi mijo gape-gape tai.

⁸Ino ko enaa makiida gootijake ejai, tijake uta mepiija ka wija ajaago tidaa,” etii. Okai kou mana wegaatigo bida peu eteete mana, „Juwe-tijake gapa jago bagee juwii to tai,” etii.

⁹Ena dani awe-tai mana ko boko jato etope-taido egaado tijake

¹⁰wo eteete mana, „Ugatameja jakimakita makiida ka boone-boone manaido epi ke-tijake kinita. Kodeja joko ka bageepa ena dani awe-tai manaidaiga; okei dojake te domake-tita tijake, daana juwijake te gamake-tita tijake.

¹¹Kii ena dani awe-tai mana boko jato mana kii dani: Pi kou ko Ugatameja mana muto kodo.

¹²Ita watija ka kede mana juwita bagee. Tijake Teege mejake mana kodo kegepa duba make jamotigou, okei maakodo gajake ajii tidaa na kojoka.

¹³Mogo makiida ka kede mana juwijake umina ideide ma jakimakai. Kodeja okei mani wejawii beu tijake mijo gaa to maakodo gajake egaado ti-toojogo ko jaikidokii.

¹⁴Dogo jupi gootidaa tita kou ko, okei juwijake ita jaweetigo, gai peu manaido ma, tonawi manaido ma, kii makiida ka ideide manaido ma kodaa mijo gape-gape tijake uta enáá kai beu.

¹⁵Enaa makiida ka kede mana juwijake doodoo enaa kegepaida jakimakijake epeepite uta gojawii.

¹⁶Me idaana ma lampu etakijake tapuja ka juwa, umiida ka juwa taapumijawija. Kodeja make-taida makii, tijake wadoujo kaine bagee awe kodo do-tita.

¹⁷Boonita agijo ena ma beu, ewaida te kaita mana kodo. Daana gabo mana ena ma beu epi te kija mana kodo, kodeja ewaida kidoke taita.

¹⁸Okai kouja ikii kawe danite juwija mana epeepite gai. Agijo jago bageepa euga menii kouja; daana agijo tagu bageepa make okaija ka topi gata agijo jamotii.”

¹⁹Jesus ukame ma kenekaane ma okaapa mei. Kodeja me wedaba tipi-tipi kouja okai watija te kimake.

²⁰Me ka eteete mana, „Akuukai ma aki kenekaane ma juwouda topai, kadoune tijake,” etii.

²¹Kodeja Jesus wo eteete mana, „Noukai ma ani kenekaane ma okei Ugatameja mana juwijake kei te-tai bagee,” etii.

²²Naagoona Jesus etope-taido ma enaimo koma matakijake eteete mana, „Mewei, inii peku adii no,” etijake koma jamo pojawii.

²³Okei uweetigo Jesus uno umidoke tai. Ukija ibo peijo pekuuda mijouwe kijake okei gaadi edidaa tijake peu kaine ijeida kai.

²⁴Okei Jesuspa mejake matoki eteete mana, „Ei, Kuduu, Kuduu, inii bokaate,” etii. Okai anigojake ukija ma dokogaa peijo ma ewidogijake duwadoke, tijake ipadoke tai.

²⁵Tijake Jesus eteete mana, „Ikiija ka maakodo gai ko kaija?” Etijake okei weda gai. Okei ego takuu-takuu tijake okei kede wegaate mana, „Kii ke meime? ukija ma, uwo ma etimakijake jajuweega kou ko,” wegai.

²⁶Okei Gerasa bagee ka makijo dakii, Galilea auwaato.

²⁷Okai adaida wadouwe kijake kou makiida ka enija jago me idaana ma akado tai, Uno wedaba kagaba tagu tou, daana owaa duba te umijake me okaapa to ume-tai.

²⁸Okai Jesus edojake emeeme ma Jesus jumaapa apaipu tidoke tijake kuutakaa eteete mana, „Ei, Jesus, Monika Ugatame Jokaibo, aki ma ani ma má imee? Peu te naawii kadiimai,” etii.

²⁹Enija okai duba make podomai eteete kouja. Kigi inoudo enija kidaa peepu etei tita kouja. Me ka pute buda egadimimakijake edoutou, kodeja budaido duwamigijake enija kodaa me beuda eepekumii.

³⁰Tijake Jesus egaado teete mana, „Akeeka meime?” Etijake „Legion” etii. Enija wedaba awidaa tita kouja.

³¹Enija utoma agaagumugu duba te neewe-tijake ediimai.

³²Kotuuda kodaa ekina ibo imouto kigi nootigo. Tijake enija kodaa ekina duba amoujo kaine ediimai. Tijake okai ejaikai.

³³Tijake enijaido kodo me kidi duba make podomijake ekina duba amoujo kai. Tijake ekina imouto kodo egoudaiga begakapu tidaa tijake pekuuda kenapune tijake bokai.

³⁴Ekina ooto-tai bagee kede kou mana dojake tibigi uwii. Kou maki okogo ma, kou maki dokoo ma okei wegakumii.

³⁵Meido kede podomijake kei tidoke tipa mana doune tijake uwii. Okei Jesuspa mejake, enija japodomijawita me kidi kagaba makijake dimi enaa kijake Jesus jumaapa animaki-toojogo edomakai. Tijake meido kede weda gai.

³⁶Edopai bagee kodaa enija jago me beu jaawita mana kodo eti-menii.

³⁷Tijake Gerasa dokoo ka bageido utoma Jesus uwe-tita tijake ediimai, weda umina gajake kouja. Tijake Jesus koma matakijake metaato amo uwii.

³⁸Kodeja enija podomidaa tita me kidi Jesus ediimai, okai ma enaimo kaine tijake. Kodeja Jesus wo uwii etijake eteete mana,

³⁹„Aki owaapa wo uwijake Ugatameja ibo kakei teegi mana kodo wegakumii.” Okai uwijake kou makiida Jesusja ibo jakei tijawipi mana kodo wegakumii.

⁴⁰Jesus joko mejake kotuu timakita bagee wedaba ejakimakai, okei utoma edoutoojogo kouja.

⁴¹Me idaana eka ki Jairus mei, sembahjang owaa douto-tai me kidi. Jesus jumaapa mijouga kijake anija owaapa mei ediimai.

⁴²Enaago jagamo joka taun wija ma gaati dani umita bokaine gaa kodaa. Okai uweetigo meido tipi-tipi etai.

⁴³Jagamo idaana emo to ume-ume teete didi taun wija ma gaati umita. Okaija agijo utoma doktodaapa mapugajawii kodeja meena ka ma te jaojawimake.

⁴⁴Jagamo kodo nemouga mejake Jesus bado jato kagaba jawinikidou. Okai kou gaa kodo maija emo ume-tai kodo duwadoke tai.

⁴⁵Tijake Jesus wegaate mana, „Meime nawinikidooga?” Okei utoma beu etijake Peterus eteete mana, „Kuduu, me wedaba kabobimakijake tipi-tipi kateete,” etii.

⁴⁶Tijake Jesus eteete mana, „Me idaana nawinikidooga, bida agijo ani duba make podomeega dooga kouja,” etii.

⁴⁷Jagamo kodo akaato te boonimake dojake totome ma mei. Jesus jumaapa mijouga kijake okai jawinikidojake beu kipa mana kodo me utoma pekaida eti-menii.

⁴⁸Tijake Jesus eteete mana, „Ei, ani joka, akija maakodo gai kodaa didi beu keege. Kojáá uwii,” etii.

⁴⁹Okai mana wegaatigo gaa kodaa sembahjang owaa doutotai me ka owaapa make me idaana mejake eteete mana, „Aki joka bokaaga. Kojoka Kuduu gaagaa te etijawii,” etii.

⁵⁰Kodeja Jesus kou mana juwijake eteete mana, „Weda te gai. Maakodo gai to. Okai beu kaipiga kojoka,” etii.

⁵¹Okai owaapa dakii tijake, meena ma okai ma enaimo woujo kai ejaikai beu, kodeja Peterus ma, Jahja ma, Jakub ma, joka kodo nakame ukame ma to.

⁵²Okei utoma jege ma jiijii ma eteetigo kodeja Jesus eteete mana, „Jege te tai! Okai bokai beu, kodeja uno umeete,” etii.

⁵³Tijake okei ewidogeete odijai etai, okai bokapa kodo epi kouja.

⁵⁴Kodeja Jesus joka kodo gane ejakijake manaa-teete mana, „Ei, joka, anigodo,” etii.

⁵⁵Okaija dimi mana komoka kijake okai kou gaa kodo anigodoke. Tijake Jesus naija agijo menii jaetii.

⁵⁶Nakame ukame ego takuu-takuu umina. Kodeja me idaana ma te oowega-tijake Jesus etimakai.