Read Ekari JAHJA 10 Bible Online

JAHJA 10 - Ekari bible

JAHJA 10

¹„Beu maa kou ani kitiine, meija domba munija owaa damouga jokoujo te kijake maidaiga patiki-toojogo, okai oma mote-tai ma, moonaa te-tai ma kidi ki.

²Kodeja damouga wadoujo kija me, kii kidi ki domba oototai me kidi.

³Kii me kidiipa damo douto-tai me kidaa damo jakebajawii, daana dombaido okaija mana ejuwai. Daana okai kidaa dombaido kede akija-eka-eka manaa-tijake oopodomai.

⁴Okai kidaa dombaido kede oopodomijake okai tiga ita ouwii, daana dombaido kede maija eepei, okaija mana wuu kodo okei epi kouja.

⁵Kodeja joko bagee te eepejake, okaapa make okii; me ino ka mana ko te jajuwii kouja.”

⁶Kii ena dani awe-tai mana Jesus oowegai, kodeja okaija etita mana kodo okei gai beu.

⁷Tijake Jesus kigeena ma eteete mana, „Beu maa kou ani kitiine, ani ki domba ka damo kidi.

⁸Ani ki beu gaa meta bageido kede oma ma moonaa ma bagee. Kodeja domba kede okeija mana te ejuwai.

⁹Ani ki Damo kidi. Kou danite me idaana aneepaiga wadoujo kipi okai mobu kai. Okai wadoujo keike mijoujo keike tijake naija agijo domakai.

¹⁰Oma mote-tai me kidaa oma ma, wagii ma, moonaa ma taine mei. Ani meta kou, dombaido ija pugaije gojake umina abuma go-tita tijake.

¹¹Ani ki domba ooto-tai me enauto kidi. Domba ooto-tai me enauto kidaa dombaido maida make dimi mana ekegajawii.

¹²Kodeja agijo ageja maida make ka me kidi, ooto-tai me beu kidi, daana domba ipuwe me kidi ki beu, okai ego jago jina metoojogo dojake domba ejaikidokijake okii. Tijake ego jago jina kidaa domba ejakimakijake wudepapa tikumii.

¹³Kii me kidi okii, okai agijo ageja maida make to kouja, daana dombaido kede inimugi etijawii.

¹⁴Ani ki domba ooto-tai enauto kidi. Daana anija dombaido kede ani epi. Daana anija domba kedaa maija ani kii ke epi.

¹⁵Naitai kidaa ani ki epi danite, ani maija Naitai kidi epi. Daana anija dimi mana domba maida make ekegajawii.

¹⁶Daana aneepa ko joko ka domba maija topai, kii ka munijaida kiija beu daniido. Koudo kodo maija ani oomei beu kai peu, daana okei anija mana najuwaitai. Tijake okei domba imoona to kijake ooto-tai me kidi meena to.

¹⁷Okai kouja Naitai ei nagai, ani dimi mana ekegajawii kouja, ani joko go-mote-tijake.

¹⁸Me idaana ma aneepa make te naamotii, kodeja ani kidaa gajake ekegajawii. Ani ekegajawii na bida, daana joko go-motii na bida. Kii kei tai agijo Naitaipa make naimita.”

¹⁹Kou mana muto maida kodaa Jahudi bagee kede akaije akaate tai.

²⁰Okei me wedaba wegaate mana, „Okai enija jago tijake enijaanija teete. Má takaa maida inii ejuwaine?”

²¹Daana me ino ka wegai ko, „Kii ke enija jago me idaana ka mana ko beu. Enija ka peka wanee bagee peka enaa jawija, mee?” etii.

²²Kou wagi kodo Jerusalim makijo Ugatameja owaa epeepi tijawii ga-tou wagi kidoke. Okai kou gaa kodo oo uwa.

²³Jesus Ugatameja owaa duba uwina uwina tai, Sulemanja akagauda kodaa.

²⁴Tijake Jahudi bagee okaapa kotuu timakijake eteete mana, „Kigi magoo na ko aki duwaa-duwaa nitijawiipage? Aki Keristus keetigo ko, ewaa tapa kodaa niti-niimai,” etii.

²⁵Tijake Jesus wo eteete mana, „Ani kiteega, kodeja ikii maakodo nagai beu. Anija Naitai Eka dubaiga kei teiga agijoudo kodaa ani maida make mana naawegai.

²⁶Kodeja ikii maakodo gai beu, ikii anija domba imo duba beu kouja.

²⁷Anija dombaido kedaa anija mana wuu najuwe-tai, daana ani okei ke epi, daana okei naapei.

²⁸Ajii tai imo to togoo ani menijawii, daana imo to togoo okei peu te kaitai. Me idaana ma anija gane duba make te naaepitakimake.

²⁹Naitai, domba naimita me kidi ki e ibo te ibo me. Daana me idaana ma Naitaija gane duba make te epitakimakija.

³⁰Ani ma Naitai ma ena kidi,” etii.

³¹Tijake kigeena ma Jahudi bagee mogo mojake wagiine dani tijake.

³²Jesus eteete mana, „Enaa kei tai agijo wedaba Naitaipa make ani kimuwakeetega. Kawi ka kei tai agijo maida make nagiine ko?” etii.

³³Tijake Jahudi bagee wo eteete mana, „Maakidi, enaa kei tai maida make te kagii, kodeja aki Ugatame eduwaage kouja, aki ki me tuma kidija aki akaato Ugatame aweege kouja,” etii.

³⁴Tijake Jesus wo eteete mana, „Beu, mee? dijo douja mana duba ebijamakita: Ani kiteega, ikii ugata bageido.

³⁵Kou danite Ugatameja mana menei tita bagee kede ke ugata bageido eebati-toojogo ko, daana Ugatameja kapogeije ko jamo te jaikija,

³⁶Enatobapaja okainiinii awijake makiida ebadikumita me kidiipa ’Aki Ugatame eduwaate’ mana kodo etija, mee? Ani ki Ugatame Joka kiteega mana maida kouja.

³⁷Ani Naitaija kei tija agijo te kei tipa ko, ikii maakodo te nagai.

³⁸Kodeja ani kei tipa ko, kou kei tai maida kodaa maakodo gai, kou danite maakodo te nagapa maija. Ikii epi kijake gamaketita, Naitai kidi ani duba, daana ani maija Naitai duba,” etii.

³⁹Tijake kigeena ma okei ejakimakaine dimi gai, kodeja okeija gane duba make okai pipikadoke tai.

⁴⁰Okai Jarden onee auwaato uwii, Jahja edoga me baptis etei titaida kodaa. Tijake okai kouda kodaa tou.

⁴¹Me wedaba okaapa mejake wegaate mana, „Beu maa kou, Jahja tumaana dou beu agijo kei tai beu, kodeja kii me kidi maida make jawegata mana kou ko maakodo,” wegai.

⁴²Tijake kouda kodaa me wedaba Jesus maakodo egai.