Read Ekari JAHJA 11 Bible Online

JAHJA 11 - Ekari bible

JAHJA 11

¹Me idaana eka ki Lazarus, Baitani makijo ka me idaana kidi didi ti-toojogo; Marjam ma kenekame Marta ma ena makijo ka me kidi.

²Kou Marjam kodaa unu enaa odijo Jesus maida jatuumijawijake bado maida okaija ijo ka jawunata. Okai panekame Lazarus kidi didi ti-toojogo me kidi.

³Tijake panekaaneija kodaa jesuspa me aebadikumijake aeteete mana, „Ei, Kuduu, akoogei kidi didi teete,” aetai.

⁴Kodeja Jesus kii mana juwijake eteete mana, „Kii didi kii ko momogi ko bokai ko beu, kodeja me ka Ugatame muta etuwa-tita, daana Ugatame Joka kidi ibo ejaike-tijake, okai kou maida make,” etii.

⁵Jesus kidaa Marta ma, kenekame ma, Lazarus ma ipa egai.

⁶Lazarus didi tipi mana kidi juwijake ko okai tota makiida kodaa naago wija ma tou.

⁷Wadoutouga etope-taidoopa eteete mana, „Mewei, inii Judea dokoo wo niuwei,” etii.

⁸Tijake etope-taido eteete mana, „Ei, Kuduu, Jahudi bagee kagiine dimi teetegai tijake ito ko kouda kodaa wo uwiine, mee?” etii.

⁹Tijake Jesus wo eteete mana, „Beu, mee? agapeena djam wija ma gaati. Kou danite me idaana agapi jawina ti-toojogo kipo tokuu te tija, okai kii makiida ka aweida ki dojake kouja.

¹⁰Kodeja me idaana wanee jato uwina ti-toojogo okai kipo tokuu tija, okai duba aweida ko beu kouja.

¹¹Jesus kou dani wegajake kigeena ma eteete mana, „Lazarus iniija noogei kidi uno umeete, kodeja ani matoki ete-uwiine,” etii.

¹²Tijake etope-taido joko eteete mana, „Ei, Kuduu, kou danite okai uno umi-toojogo ko okai didi beu kaine,” etii.

¹³Lazarus bokaategi mana maida make Jesus etita, kodeja okeija ka gai ko, okai kojáá uno umeete mana eneete gai.

¹⁴Tijake Jesus okeepa ewaa tapa wo eteete mana, „Lazarus bokaategi.

¹⁵Daana ikii maida make ani ideide ani kouda kodaa tou beu kouja, ikii maakodo ga-tita no te. Kodeja mewei, inii okaapa uwii no,” etii.

¹⁶Didimus eebatijawita me Tomas kidi ogaaneidoopa eteete mana, „Mewei, inii maija uwii no, okai ma enaimo bokape na enaa,” etii.

¹⁷Jesus dakii tijake ko Lazarus bokajake uno wii me oka duba umi-toojogo dou.

¹⁸Baitani makijo kodo Jerusalim kapauto, poto ko beu [3].

¹⁹Jahudi bagee me wedaba Marta ma Marjam ma jege jabudijawiine mei, panekame maida make.

²⁰Jesus meete mana Marta juwijake okai edoutoune uwii, kodeja Marjam owaapa animaki-toojogo.

²¹Tijake Martaja Jesuspa eteete mana, „Ei, Kuduu, kou danite aki jakai tou naako, anija paneka te boka-toja kodaa.

²²Kodeja ito kou maija ani epi, tumaana agijo aki Ugatameepa ediimipe ko Ugatameja kaniipagi,” etii.

²³Tijake Jesus wo eteete mana, „Aki paneka kidi ija kija,” etii.

²⁴Tijake Marta eteete mana, „Ani epi wiwitiida naago kodaa okai ija kaitagi,” etii.

²⁵Tijake Jesus wo eteete mana, „Ani ki me ija eewija ma, ajii bokouto ma. Meija maakodo nagapi, okai bokapi maija ija kaitagi.

²⁶Daana meija ija tojake ani maakodo nagapi okai te bokaitagi imo to togoo. Kii ke aki maakodo gai, mee?” etii.

²⁷Tijake Marta wo eteete mana, „Ii, Kuduu, ani maakodo gai aki ki Keristus, Ugatame Joka kidi, makiida meitagi wegaigai kidi,” etii.

²⁸Okai kou mana etijake kenekame Marjam kodo gabo gabo manaa-te-uwijake eteete mana, „Kuduu meegi, mana kateete,” etii.

²⁹Kou mana juwijake okai tibigi joonidoke tijake Jesus edou uwii.

³⁰Kodeja Jesus kidi maki okogouda woujo kai beu gaa, kodeja Marta ma akado titaida kodaa to toojo gaa.

³¹Jahudi bagee Marjam ma enaimo ootojake jege ooteete bageido kede Marjam tibigi joonidoke tijake uwii ko edojake okei eepei, Marjam me okaapa jiijii taine uweete gajake.

³²Marjam kodo Jesus totaida kodaa dakii tai. Edojake Jesus jumaapa mijouga kijake eteete mana, „Ei, Kuduu, kou danite aki jakai tou naako ani paneka te boka-toja,” etii.

³³Marjam jiijii kodo Jesus edojake, daana Jahudi bagee maija okai ma enaimo jege ooteete, okai kegepa juwikigi tijake gaagaa tai.

³⁴Tijake eteete mana, „Kaija emakeetega?” etijake joko eteete mana, „Ei, Kuduu, mei, do te no,” etii.

³⁵Jesus jege tita.

³⁶Tijake Jahudi bagee ka wegaate mana, „Edodowei, okai ipa egata na ko,” wegai.

³⁷Kodeja me ino ka wegaate mana, „Peka wanee me idaana peka enaa jaawita me kidi bida beu, mee? kii me kidi te bokatijake kei tijawii ko,” etii.

³⁸Me okaapa dakii tijake Jesus kegepa juwikigi umina. Me oka kodo bijo duba mogo kato ka taki atita.

³⁹Tijake Jesus eteete mana, „Kii mogo ki wo begokijawii,” etii. Tijake bokata me kidi panekame Marta kodaa eteete mana, „Ei, Kuduu, ito ko unu umina, naago wii tojake kouja,” etii.

⁴⁰Tijake Jesus wo eteete mana, „Beu, mee? anija katipa ko, aki maakodo nagape ko, Ugatameja ajiipi agijo doupage kateega,” etii.

⁴¹Tijake okei mogo kodo wo begokijawijake Jesus wado dojake kei teete mana, „Ei, Naitai, ani nagajaweege katii, aki najuwai kouja.

⁴²Daana ani epi aki umina najuweige, kodeja ani watija topai bageido kei maida make wegaaga, aki ki nabadikumita mana kodo okei maakodo ga-tita,” etii.

⁴³Okai kou mana wegajake, mana kuutaka wuu teete mana, „Ei, Lazarus, podomidodou,” etii.

⁴⁴Tijake bokata me kidi podomai, bado ma gane kagaba ka etonimakita, daana ebepeka maija kagaba ka tonijawita. Tijake Jesus meidoopa eteete mana, „Jaekegajawijake uwe-tita kijoka ejaikai,” etii.

⁴⁵Marjam ma enaimo meta ka Jahudi bagee me wedaba kede Jesusja kei tita agijo kodo dojake maakodo egai.

⁴⁶Kodeja me ino kede Parisi bageepa uwijake Jesusja kei tita agijo kodo eti-menii.

⁴⁷Okai kouja imam iboudo ma, Parisi bagee ma, mana pikatai bagee ma kotuu timakijake wegaate mana, „Inii magijo kei tai? Kii me kidi dou beu agijoudo umina kei te-tai kouja.

⁴⁸Kou danite inii inimugi etijawipe ko meido utoma maakodo egaitai, tijake Rum bagee mejake iniija ka touda ma tuma ma peu neewiitai,” wegai.

⁴⁹Okei jupi ka me idaana eka ki Kajafas kidi kou taun kodo Ibo Imam kidi. Okai eteete mana, „Ikii tumaana ma gai beu.

⁵⁰Ikii gai beu, inii tuma utoma peu kai kodo ma ko me idaana kei bagee maida make komoka jaawijake bokai ko epaago,” etii.

⁵¹Okai kou wegata kou ko okai kidaa ko beu, kodeja kou taun kodaa okai Ibo Imam kouja Jesus kou tuma maida make jabokai mana kodo douja dojawita.

⁵²Daana kou tuma maida make to komoka jaawijake bokai ko beu, kodeja Ugatame jokaane wudepapa titaido kede enaida kotuu atiine tijake.

⁵³Okai kou naago make wado okei Jesus wagiine tijake mana amo wegai joko wegai

⁵⁴Okai kouja Jesus kidi Jahudi bagee jupiidaiga ewaa tapa jawina beu, kodeja okai kouda kodaa make uwijake gei tapa kapauto ka maki katouda eka Efraim uwii. Kouda kodaa etope-taido ma enaimo tou.

⁵⁵Jahudi ka wadouga etigajake petii tita ga-tou naago kapauto kijake kou makijo ka bagee wedaba Jerusalim makijo wado uwii, ibo naago nai beu gaa kodaa, akaato jimubeu awiine tijake.

⁵⁶Okei Jesus eubajake Ugatameja owaa duba joonidaa ti-toojogo wegaate mana, „Ikii kawe dani dimi gai? Okai ibo naago dijo doune te meitagi, mee?” wegai.

⁵⁷Kodeja imam iboudo ma, Parisi bagee ma mana bida peu etimakai, me idaana Jesusja touda epi ki-toojogo niti-niimai etii, okei ejakimakaine tijake.