Read Ekari JAHJA 12 Bible Online

JAHJA 12 - Ekari bible

JAHJA 12

¹Wadouga etigajake petii tita ga-tou naago benumi tota Jesus Baitani makijo mei, Lazarus totaida kodaa, Jesusja bokata bagee jupi make eenigojawita me kidi.

²Kouda kodaa okei naija agijo oonai, daana Marta eedadai. Jesus ma enaimo naine animakita ka bagee jupi me idaana ki Lazarus kidi.

³Tijake Marjam ibo age unu enaa odijo doke-mejake Jesusja bado maida jatuumijake okai kodaa ijo ka jawunai. Tijake kou unu enaa odijo kodaa owaa duba gabumidoke tai.

⁴Kodeja etope-tai kede idaana kidi, kii ke Judas Iskariot kidi, wadoutouga Jesus eekegajawita me kidaa eteete mana,

⁵„Magijo ka unu enaa odijo kii ko ibo mege muto idibi [4] kaa tai beu? tijake daba bageepa menii ko,” etii.

⁶Judas kou dani wegata kou ko, daba bagee dimi egajake ko beu, kodeja okai oma mote-tai kouja. Okai mege potó dokeigi, tijake kou duba ka awita mege motei tita.

⁷Tijake Jesus eteete mana, „Ejaikai, unu enaa odijo kii ko oka namakai naago maida make nakei tijaweega kojoka.

⁸Daba bagee ikii wa enaimo to-tai, kodeja ani ki keetou to ko beu,” etii.

⁹Jahudi bagee me wedaba Jesus kouda kodaa topi mana juwijake mei, Jesus maida make to ko beu, kodeja Lazarus edoune maija, Jesusja bokata bagee jupi make eenigojawita me kidi.

¹⁰Tijake imam iboudo kedaa Lazarus maija wagiine tijake mana wegai.

¹¹Lazarus maida make Jahudi bagee me wedaba Jesuspa uwijake maakodo egai kouja.

¹²Aweetaa naago kijake ibo naago dijo doune meta bageido kede Jesus Jerusalim makijo meete mana kodo juwii.

¹³Okei eke dani pija imo tuwa-mote tijake ebukaine uwii, gaida-gaida teete mana, „Ajii kodo! muta neetuwawei, okai Tuhan eka dubaiga meete me kidi, Israil bagee ejakimake-tai me kidi!”

¹⁴Jesus keledai joka dojake okai kou wado animakai, kapogeije ebijamakita danite:

¹⁵Weda te gai, kowaa kau, Sion ka jagamo joka, Edododou, kajakimakita me kidi Keledai joka wado animakijake meete!

¹⁶Edoga kodaa etope-taido kede kou mana kodo gai beu, kodeja Jesus ajiipi etijawijake wadouto okei gai, kou manaido okai maida make kapogeije ebijamakita, daana okei kei agijoudo jakei tita.

¹⁷Lazarus bokata bagee jupi make manaa-tijake eenigojawita gaa Jesus ma enaimo tota bageido kedaa kou mana maida make jawegai.

¹⁸Okai kouja me wedaba ebukaine uwii, Jesus kou dou beu agijo kodo ewaa awita juwijake kouja.

¹⁹Tijake Parisi bagee okei kede wegaate mana, „Dodowei, ikiija ka ekowaate agijo kato ma epa beu. Dodou, uwoje makije maki utoma okai to eepe-uweete,” wegai.

²⁰Ibo naago dijo doune tijake meta bagee jupi Gerika bagee wija wido mei.

²¹Okei Pilipuspa mei, Baitsaida makijo Galilea dokoo ka me kidi. Okei ediimeete mana, „Ei, kowaa ke, inii Jesus edoune kodaa,” etii.

²²Tijake Pilipus kou mana kodo Andereas wo etii, daana Andereas ma Pilipus ma Jesuspa wo aetai.

²³Tijake Jesus eteete mana, „Me Joka ajiipi ke-tijake putu tiki keega.

²⁴Beu maa kou ani kitiine, kou danite gandum miteena makiida te gootijake te boka-toojogo miteena kidi to tou. Kodeja kou danite boka-toojogo ko uta wedaba goja.

²⁵Meija okai akaato to dimi amo gapi ko, okai akaato igadoke taitagi. Daana meija okai akaato kiija makiidda be gapi, okai ajii tai imo to togoo taine makijawii.

²⁶Me idaana ani juma doodoo natipi naapedou. Daana anija tojaida nakei te-tai me kidi maija naatoutagi. Me idaana ani juma doodoo natipi Naitaija ibo ejaikaitagi.

²⁷Ito kii gaa kii ke anija dimi mana gaduwaate. Ani má mana wegai? Ei, Naitai, ito kii wagi kiija make napipikajawii. Kodeja okai kou maida make ito kii wagi kidiipa keega.

²⁸Ei, Naitai, akeeka ajiipi tijawii.” Etijake epa maida ka mana wuu juwijake mijo eteete mana, „Ani ajiipi etijaweetega, daana wado maija ajiipi etijawiita,” etii.

²⁹Tijake kouda kodaa joonidaa tita bagee kede kou mana wuu juwijake wegaate mana, „Gekamugu teete.” Daana me ino ka maija wegaate mana, „Ugatame jaetigo-tai me idaana ka mana eteegi,” wegai.

³⁰Tijake Jesus eteete mana, „Kii mana ki ani maida make juwii ko beu, kodeja ikii maida make.

³¹Ito kou kii makiida kiija boko petai putu. Ito kou kii makiida ka ibo kidi eemigimakai.

³²Makiida make wadouwe naawijake ko ani me jokaija kede aneepa ebuki-motiita,” etii.

³³Okai kii mana wegai, okaija bokaitagi mana ewaida awiine tijake.

³⁴Tijake meido wo eteete mana, „Dijo douja mana kodo inii juweemege, Keristus kidi ki imo to togoo mana. Kawe dani tijake Me Joka kidi wadouwe eewiitai mana eneege? Meime Me Joka kidi ki?” etii.

³⁵Tijake Jesus eteete mana, „Mijo gaa to aweida kodo ikii jupi tou. Awe toja gaa kodaa aweidaiga uwina tai, bunita kodaa keetigadokii na kojoka. Meija bunita dubaiga jawina tipi okai uwijaida okai ewo.

³⁶Awe ikeepa toja gaa, awe kodo maakodo gai, ikii aweida ka jokaane ke-tita kojoka,” etii. Jesus kou dani etijake okai wo godoke tijake okeepa make boonidoke tai.

³⁷Okai dou beu agijo wedaba okei pekaida kei tai kodeja okei maakodo egai beu.

³⁸Tikauwa ka gokobaki tijawiidaiga wegai tita me Jesajaja ebijamakita mana kodo koba-tijake: Ei, Tuhan, meija iniija wegata mana kodo maakodo nigata? Daana meimeepa Tuhanja gane kodo emuwakita?

³⁹Okai kouja okei maakodo te gamake, Jesaja kigeena ma ebijamakita kouja:

⁴⁰Ugatame kidaa okeija peka wanee jaawijake, Daana okeja kegepa bida jaawijake; Okei peka ka domakai na kojoka, Daana dimi ka gai na kojoka, Ani beu jaawe-tijake aneepa wouga kai na kojoka.

⁴¹Jesaja kii mana wegata, okaija ajiipi jadojake kouja, daana okai maida make mana jawegata kouja.

⁴²Kou ko kou kodeja iboudo jupi ka me wedaba maakodo egai, kodeja Parisi bagee weda egajake okei ewaa tapa jawegai beu, Jahudi ka sembahjang owaa duba make naamigimakai na kojoka gajake.

⁴³Okei me ka ibo ejaikai to ide kouja, Ugatame ka ko beu.

⁴⁴Tijake Jesus mana pitokeete mana, „Meija ani maakodo nagapi ani maakodo nagai ko beu, kodeja nabadikumita me kidi.

⁴⁵Daana meija ani nadopi, okai nabadikumita me kidi edou.

⁴⁶Ani makiida ka aweida kodo ganimakaine mei; meija maakodo nagapi bunita tapa te to-tijake.

⁴⁷Me idaana anija mana najuwijake aadaba natijawipi ani boko te japetai. Ani makiida maki utoma boko petaine mei ko beu, kodeja makiida maki utoma ajii ti-meniine tijake.

⁴⁸Meija nakonijake anija mana te najakimakipi, tumaana ka boko japetaja. Anija wegata mana kodaa wiwitiida naago kodaa boko japetaita.

⁴⁹Ani kidaa dimiidaiga mana wegai ko beu, kodeja nabadikumita Naitai kidaa anija wegaja mana, daana anija pitokija mana kodo natimakita.

⁵⁰Daana ani epi okaija natimakita mana kodo ajii tai imo to togoo bokouto mana. Okai kouja anija wegaja mana kodo, Naitaija natimakita kidi danite ani wegai,” etii.