Read Ekari JAHJA 14 Bible Online

JAHJA 14 - Ekari bible

JAHJA 14

¹„Kegepa begoo te tai. Ugatame maakodo egawei! Ani maija maakodo nagawei!

²Naitaija owaapa to-taida wedaba. Kou dani beu naako kiti-toja kodaa. Ikiija to-taida epeepi kijatijawe-uwiita.

³Kou danite ani uwijake epeepi kijatijawipa ko, ani mijo mejake kibukigouta, anija to-taida ikii na to-tijake.

⁴Anija uwiitaida ita ko ikii epi.”

⁵Tijake Tomas eteete mana, „Ei, Tuhan, inii ewo aki uwiitageida. Kawe dani tijake inii ita ko epi?” etii.

⁶Tijake Jesus wo eteete mana, „Ani ki Ita ma, Maakodo Bokouto ma, Ajii Bokouto ma. Me idaana ma Naitaipa te dakii tija, kodeja ani ma ki-toojogo to.

⁷Ani kii ke ikii epi naako, Naitai maija ikii epi kodaa. Ito kiija make wado ikii okai kidi epi kijake edomakai,” etii.

⁸Pilipus eteete mana, „Ei, Tuhan, Akaitai kidi nimuwakai, inii mobu kaipage kojoka,” etii.

⁹Tijake Jesus wo eteete mana, „Ei, Pilipus, ani ikii ma enaimo kou dani tou wedaba tijake aki nadomakai beu, mee? Meija ani nadopi, okai Naitai maija edou. Kawe dani tijake ’Akaitai kidi nimuwakai’ eneege kou ko?

¹⁰Aki maakodo gai beu, mee? ani Naitai duba, daana Naitai kidi ani duba. Anija kijawegai mana kodo anija dimiidaiga wegaiga ko beu, kodeja Naitai kidi ani duba tojake, okai kidaa utoma agijo kei tai.

¹¹Ani Naitai duba maakodo nagai, daana Naitai kidi ani duba. Kou danite beu ki-toojogo maija, kei tita agijoudo maida make maakodo nagai.

¹²Beu maa kou ani kitiine, meija maakodo nagapi, anija kei titaido kei taitagi, daana wo etige ka ibo agijoudo kei taitagi, ani Naitaipa uwiita kouja.

¹³Ikiija aneeka dubaiga nadiimija agijo ko ani kei tijawiita, Naitai kidi Jokame duba ajiipi go-mote-tijake.

¹⁴Kou danite ikii gaja agijo aneeka dubaiga nadiimipa ko, ani kei tijawiita.

¹⁵Ikii ei nagapa ko, anija mana dijo nadou.

¹⁶Ani Naitaipa ediimaita, tijake okai joko ka Agaagi Me kiniitagi, ikii ma enaimo imo to to-tijake.

¹⁷Kou ko maakodo bokouto jago Roh kodo, makiida maki utoma ka te ejakimakija, okei te edomake kouja, daana ewo. Kodeja ikii epi, ikii wa enaimo tou kouja, daana ikii duba kaitagi.

¹⁸Dobija joka ti kijaikaita. Ani ikeepa meita.

¹⁹Mijo gaa to tijake makiida maki utoma te nadoutai. Kodeja ikii ke nadouta. Ani ajii tai kouja ikii maija ajii taita.

²⁰Okai kou naago kodaa ikii gaita, ani ki Naitai duba, daana ikii ke ani duba, daana ani maija ikii duba.

²¹Meija anija mana jakimakijake dijo dopi okai ei nagai. Daana meija ei nagapi Naitai kidaa maija ei egaitagi, daana ani maija ei egajake ani akaato emuwakaita.”

²²Tijake Judas, Iskariot kidi ki beu, joko ka kidaa eteete mana, „Ei, Tuhan, kawe dani tijake aki akaato nimuwakai, daana makiida maki utomaapa ko beu?” etii.

²³Tijake Jesus wo eteete mana, „Kou danite me idaana ei nagapi ko, anija mana najakimakaitagi, daana Naitai maija ei egajake Inai okaapa aamejake okai ma enaimo oojatou.

²⁴Meija ei te nagapi anija mana muto maija najakimakai beu. Daana ikii juweiga mana muto kodo ko anija mana ko beu, kodeja Naitaija mana kodo, nabadikumita me kidi.

²⁵Kei manaido kei ani ikeepa kitii, ani ikii wa enaimo topa gaa kiija.

²⁶Kodeja Agaagi Me kodo, kou ko Rohulkudus kodo, Naitaija aneeka dubaiga ebadikumiitagi kodo, okai kodaa utoma agijo kitopaitagi, daana anija kiteetega agijoudo ga-kiniitagi.

²⁷Muka-muka dimi ani kijajaikidokii. Beu maa kou ani kidaa muka-muka dimi kodo kinii. Makiida ka kinija dani ko beu, anija kinii ko. Kegepa begoo te tai, daana weda te gai.

²⁸Anija kiteega mana, ani uwijake ikeepa mijo meita mana kodo ikii juweega. Ikii ani ei nagai naako, ani Naitaipa uwiita kouja ikii ideide ti-toja. Ani ma ko Naitai kidi ibo kouja.

²⁹Kei tidoke beu gaa kodaa ani ito kiteega; kei tidoke tijake ko ikii maakodo ga-tita.

³⁰Mana wedaba ikii ma te keewegaipiga, makiida ka ibo kidi meete kiija. Daana beu maa kou okai ani maida bida beu.

³¹Kodeja Naitaija enita kidi danite ani kei tai, ani Naitai ei egai mana kodo makiida maki utoma ga-tita no tijake. Jooniwei, kiija make uwii no,” etii.