Read Ekari JAHJA 15 Bible Online

JAHJA 15 - Ekari bible

JAHJA 15

¹„Ani ki uta buda uti puki, daana Naitai kidi mune-tai me kidi.

²Ani maida ka kagoudo kede uta gou beu ka kede okai duwamigii. Daana uta goja ka kago kede kodu ka daniido tuwakumii; uta abuma go-tijake na kidi.

³Ikii ito ko jimubeu bagee anija kiteega mana maida kouja.

⁴Ikii ani duba tou to, daana ani maija ikii duba. Kago kodaa to uta te goja danite, uti maida te ti-toojogo ko, kou danite ikii maija te kei timakija, ani duba te ti-toojogo ko.

⁵Ani ki uta buda uti, daana ikii ke kago muto kede. Meija ani duba topi, daana ani okai duba topa, okai uta wedaba gou. Ani ma enaimo beu ki-toojogo ikii tumaana agijo ma te keitimakija.

⁶Kou danite me idaana ani duba te topi ko, kago bukaa emigimakijake denakogi. Wadoutouga kotuu timakijake bodija jojawii.

⁷Kou danite ikii ani duba topa ko, daana anija mana kodo ikii duba topa ko, ikiija gaja agijo ko nadiimai to, tijake kijakei tijawii.

⁸Kii mana muto duba kiija Naitai kidi ajiipi etijawita, kou ko ikii uta abuma gou kodo. Kou dani tijake ikii anija kitopetaido kai.

⁹Naitai ei nagai danite, ani ikii maija ei kigai. Ikii anija ei kigai duba tou to tai.

¹⁰Kou danite ikii anija mana najakimakipa ko, anija ei kigai duba ikii touta; ani maija Naitaija mana jajakimakai danite, daana okaija ei nagai duba tou to.

¹¹Kei manaido kei ani kiti-kineega, anija ideide dimi ikii duba to-tijake, daana ikiija ka ideide kodo maija boko duwadoke te-tijake.

¹²Kii ke anija kitimakai mana, ikii kede ei akaga tai, anija ei kigai danite.

¹³Kou wouto ka ei dimi beu topa, kou danite me idaana ogaaneido maida make dimi mana jaekegajawii ko.

¹⁴Ikii ke noogeima, kou danite anija kitimakita mana kodo ikii kei tipa ko.

¹⁵Ito make wado anija kei te-tai bagee te keebatai; jakei tetai me kidaa okaija ibo kidaa kei tai agijo ewo kouja. Kodeja noogeima keebateega, ani Naitaipa make juwita mana mutoudo kodo kiti-kineega kouja.

¹⁶Ikiija ka nawitokai ko beu, kodeja ani kidaa kiwitokijake boko kijaduwajawii, ikii uwijake uta go-tita, daana uta kodo imo kidi to-tijake; ikiija ka aneeka dubaiga Naitaipa ediimija agijo kodo okai kinijawe-tita.

¹⁷Kii ke anija kitimakai mana, ikii kede ei akaga tai.

¹⁸Kou danite makiida maki utoma ka be kigapai ko, gai, ani tiga be nagajake kojoka.

¹⁹Kou danite ikii makiida ka bagee naako, makiida ipuwe kojoka ei kigai. Kodeja ikii ke makiida ka ko beu, kodeja ani makiidaapa make kiwitokeetega; okai kouja makiida kodaa be kigai.

²⁰Anija kiteega mana muto kodo gai: Jakei te-tai me idaana okaija ibo ma ko ibo ko beu. Kou danite okei nawidogipai ko, ikii maija kiwidogaitai; okei anija mana muto kodo jakimakipai ko, ikiija ka mana maija kijajakimakaitai.

²¹Kodeja kou agijoudo aneeka maida make okei kiikei taitai, okei nabadikumita me kidi ewo kouja.

²²Kou danite ani okeepa te mejake mana to oowegai naako, okei peu beu. Kodeja ito ko okeija ka peu agijo kodo beu puga te timake.

²³Meija be nagapi okai Naitai maija be egai.

²⁴Kou danite me ino ka kei tai beu agijo ani okei jupi kei tai beu naako, okei peu beu. Kodeja ito ko okei nidojake kodeja ani ma Naitai ma be nigai.

²⁵Kodeja kou dani ewaa kita, okeija dijo douja manaida ebijamakita mana kodo koba-tijake; kou ko: Okei mana beudaiga be nagai.

²⁶Kodeja Agaagi Me kidi Naitaipa make ani ebadikumijake mepi ko, kou ko maakodo bokouto jago Roh Naitaipa make podomai kodo, okai ani maida make mana naawegaitagi.

²⁷Daana ikii maija mana naawegaita, ikii edoga kidaa make ani ma enaimo kouja.