Read Ekari JAHJA 17 Bible Online

JAHJA 17 - Ekari bible

JAHJA 17

¹Kei manaido wegajake Jesus epa jato wado dojake eteete mana, „Ei, Naitai, putu muumai kojoka aki Joka kidi ajiipi etijawii, aki Joka kidaa ajiipi katijawi-tita;

²okai me tumaija boko duwajawe-tijake aki menita danite, akija meneetege bagee ajii tai imo to togoo okai boko jaduwatijake.

³Kou dou ajii tai imo to togoo kodo, aki kii ke ena to Ugatame puki kidi okei epi ke-tita, daana akija ebadikumeetege me Jesus Keristus kidi.

⁴Kii makiida kiija ani ajiipi katijaweetega, daana akija kei tai agijo naimeetege kodo boko duwajaweetega.

⁵Daana ito ko, ei, Naitai, aki jumaapa ajiipi natijawii; makiida ewaa awii beu gaa kodaa aki jumaapa aneepa tota ka ajiipi agijo kodaa.

⁶Kii makiida kiija make akija naimeetege bageepa akeeka eti-meneetega; okei ke aki ipuwe, tijake akija naimeetege, daana okei akija mana kodo kaajakimakeetegai.

⁷Akija naimeetege agijo utoma epauto ko akeepa make to mana kodo okei ito kou gamakai.

⁸Akija naimeetege mana muto kodo ani meneetega, daana okei jakimakijake ani akeepa make meetega mana kodo epaapa timakai; daana aki kidaa nabadikumeetege me kidi okei maakodo gai.

⁹Ani sembahjang ejakimakai. Kii makiida maki utoma ani sembahjang ejakimakai ko beu, kodeja akija naimeetege bagee kede, okei ke aki ipuwe kouja.

¹⁰Ani ipuwe daniido utoma aki ipuwe maija; daana aki ipuwe dani ani ipuwe maija, daana okei duba ani ajiipi natijawii.

¹¹Ani ki makiida kiija te touta, kodeja okei makiida to-tai, daana ani akeepa jawii. Ei, Naitai, jimubeu me kidi, akija naimeetege bagee kede akeeka duba ejakimakai, okei ena kidi ketita, inai ena kidi danite.

¹²Ani okei wa enaimo ootoojogo gaa akija naimeetege bagee kede akeeka duba ejakimakeetega; ani emunijake me idaana ma igai beu, kodeja peu kaine me kidi to, ugata kapogeije kodo kobatijake.

¹³Kodeja ito ko ani akeepa jawii. Ani makiida topa gaa kodaa kei manaido wegai, anija ideide kodo okeija kegepa duba boko duwadoke te-tijake.

¹⁴Akija mana kodo ani kaaeti-meneetega. Makiida maki utoma kodaa be egai, okei makiida make ko beu kouja, ani maija makiida make ko beu kodo danite.

¹⁵Makiidaapa make ebukigo-tijake ani kadiimai beu, kodeja peu maida make aki emune-tijake.

¹⁶Okei kii makiida ipuwe ko beu, ani maija makiida kiija ipuwe ko beu kidi danite.

¹⁷Maakodo bokouto duba okeiniinii etijawii. Akija mana kou ko maakodo bokouto kodo.

¹⁸Aki makiida nabadikumeetege danite, ani maija okei makiida ebadikumii.

¹⁹Daana okei maida make ani akaato aniniinii tijawii, okei maija maakodo bokouto duba okeiniinii ke-tita.

²⁰Ani okei kede to sembahjang ejakimakai ko beu, kodeja okeija wegaitai manaida kouja maakodo nagaitai bageido maija.

²¹Okei utoma ena kidi ke-tita; aki ki ani duba, ei, Naitai, daana ani maija aki duba kodo danite; okei maija inai duba ena kidi ke-tita; akija nabadikumeetege mana kodo makiida maki utoma maakodo ga-tita.

²²Daana akija naimeetege ajiipi agijo kodo ani meneetega, okei ena kidi ke-tita, inai ena kidi danite.

²³Ani ki okei duba, daana aki ki ani duba, okei ena kidi manaida boko duwadoke te-tita; aki nabadikumii mana, daana ei egai mana kodo, akija ei nagai danite, makiida maki utoma kodaa ga-tita.

²⁴Ei, Naitai, ani ide akija naimeetege bageido kede ani tojaida okei na tou, akija naimeetege ajiipi agijo kodo okei domaketijake, aki ei nagai kouja, makiida maki utoma ewaa awii beu gaa kodaa.

²⁵Ei, Naitai, maakodo bokouto jago me kidi, makiida maki utoma kodaa aki ki ewo kodeja ani ki aki kidi epi. Daana aki nabadikumeetege mana okei kede epi.

²⁶Akeeka ani kaaeti-meneetega, tijake kaaeti-meniita; akija ei nagai kodo okei duba to-tijake, daana ani maija okei duba to-tijake.”