Read Ekari JAHJA 6 Bible Online

JAHJA 6 - Ekari bible

JAHJA 6

¹Kou wadoutouga Jesus Galilea peku aa adii, Tiberias peku kidi.

²Me umina wedaba eepei, didi bageido maida okaija dou beu agijoudo jakei tijawita edojake kouja.

³Jesus dimi katouda wado patikijake kouda kodaa okaija etope-taido ma enaimo animakai.

⁴Wadouga etigajake petii tita ga-tou naago kodo kapauto kai, Jahudi ka ibo naago kodo.

⁵Jesus peka wado doumigijake me wedaba okaapa meete edojake Pilipuspa eteete mana, „Kaija goti jaedaipage kou meido kou no-tita ko?” etii.

⁶Jesus kou dani etita kou ko egaado taine tijake, okaija kei taine agijo okai ki epi kouja.

⁷Tijake Pilipus wo eteete mana, „Goti mege muto wido age keetigo maija te tiki, meena tineena, meena tineena ki-toojogo maija,” etii.

⁸Tijake etope-tai jupi ka me idaana, Simon Peterus kenekame Andereas kidaa Jesuspa eteete mana,

⁹„Jakai kiija joka idaana daba goti kemo idibi ma, mijo binei wija ma makipi, kodeja magijo taine kei ke, kou me wedaba kou ko?” etii.

¹⁰Tijake Jesus eteete mana, „Meido animake-tai etei,” etii. Kouda kodaa bopu umina, tijake meido utoma animake-tai, jameido to muto muto to ko muto, kou wado maija [2]

¹¹Tijake Jesus goti motijake sembahjang nagajaweege etii, tijake animakita bageidoopa jawudii. Tijake binei kede maija, okeija ide gata danite.

¹²Okei utoma mobu kidaa tijake etope-taidoopa eteete mana, „Abu kitaija kotuu timakai, ena ma te iga-tita,” etii.

¹³Okei kotuu timakijake edu tapuja wija ma gaati awimakai, goti puugee kede nopai bagee ka abu kitaija kodo.

¹⁴Jesusja dou beu agijo kei tita kodo meido kede edojake wegaate mana, „Beu maa kou, okai ki gokobaki tijawiidaiga wega-tai me makiida meitagi wegaigai kidi,” etii.

¹⁵Okei bida peu dimi gajake Jesus ejakimakaine mei; maki jakimake-tai me eewiine gaate dimi kodo Jesus epi kijake wo godoke tai. Okai to dimiida wado uwii.

¹⁶Uwaataa kijake etope-taido iteida jamo uwii.

¹⁷Tijake okei koma matakai, Kapernaum doodouga peku adiine. Okai kou gaa kodaa wanee ki-toojogo, kodeja Jesus ki okeepa mei beu toojogo.

¹⁸Pekuuda kodaa ukija dokogaa umina tai, ukija bida peu pupugu tijake.

¹⁹Okei gita ukeete epouda dani awiine gaa, kou gaa kodaa Jesus peku wadouga meete edou; okai koma kapauto kai, tijake okei weda gai.

²⁰Kodeja Jesus eteete mana, „Ani kijoka weda te gai,” etii.

²¹Okei ideide ma komaageida ebukijake, kou gaa kodo koma iteida dakii tai, okeija ka uwiine titaida kodaa.

²²Awetaa naago kijake iteida joonidaa tita bageido kede kouda kodaa koma maana ma beu gajake, kodeja ena to, daana kii komaida Jesus etope-taido ma enaimo matakai beu, kodeja etope-taido to peku amo adii.

²³Kou ko kou kodeja joko ka koma maija Tiberias makijoopa make mei, Tuhanja Enatobapa nagajaweege etijake goti notaida kapauto kodaa.

²⁴Meido kouda kodaa dojake Jesus beu toojogo, daana etope-taido maija beu, tijake okei maija koma matakijake Kapernaum makijo jesus euba-uwii.

²⁵Peku amouwaato Jesus ma akado tijake eteete mana, „Ei, Kuduu, menoka mepe?” etii.

²⁶Tijake Jesus wo eteete mana, „Beu maa kou ani kitiine, ikii ani naubaate kou, dou beu agijo dootega kouja ko beu, kodeja ikii goti nojake mobu keetega kouja.

²⁷Ikii peu kija naija agijo maida make ko te kei tai, kodeja imo to tou to naija agijo maida make, kou ko Me Joka ka kiniitagi didee kodo, Nakame Ugatame kidaa boko jaduwajawita me kiija.

²⁸Tijake okei joko eteete mana, „Inii magijo kei tai, Ugatameja kei tai agijo kei taine ko?” etii.

²⁹Tijake Jesus wo eteete mana, „Kii ke Ugatameja kei tai agijo kodo, ikii Ugatameja ebadikumita me kidi maakodo egai.”

³⁰Tijake okeija ka eteete mana, „Kawi ka dou beu agijo nimuwakaipage? inii dojake maakodo kagaine no! Aki magijo kei tai?

³¹Iniija aijaane muumaane gei tapa Manna nota, kapogeije ebijamakita danite: Okai goti epaawado make okei no-tijake mijo menita.”

³²Tijake Jesus eteete mana, „Beu maa kou ani kitiine, Musaja epaawado make goti mijo kinita ko beu, kodeja Naitaija maakodo Goti epaawado make kineete.

³³Ugatameja Goti wegaigai kou ko, epaawadoopa make mijo mejake makiida maki utoma ajii bokouto jaduwajawe-tai me kidi,” etii.

³⁴Tijake okei eteete mana, „Ei, Tuani, kou Goti kodo inii niime-ti te,” etii.

³⁵Tijake Jesus eteete mana, „Ani ki Gei Tijawija Goti kodo. Meija aneepa mepi ko, okai naidi te tai, daana meija maakodo nagapi okai jowee te kai.

³⁶Anija kiteega kodo ko, ikii nadou kodeja ikii maakodo nagai beu.

³⁷Utoma bagee utoma Naitaija naimitaido, kou kodo aneepa meitai. Daana meija aneepa mepi ko, ani maa kou te ekonaita.

³⁸Ani epaawado make mijo mei kou ko, anija dimi kei tijawiine ko beu, kodeja nabadikumita me kidaa dimi to.

³⁹Kou ko nabadikumita Naitaija dimi kodo, utoma agijo utoma ani naimitaido kodo ena ma te igaita, kodeja wiwitiida naago kodaa ani ija eewiita.

⁴⁰Kii ke Naitaija dimi ki, Jokame kidi edomakijake maakodo egai bagee kede ajii tai imo to togoo, daana wiwitiida naago kodaa ani ija eewiita,” etii.

⁴¹Tijake Jahudi bagee kitigi motigi etai, „Ani ki Goti epaawadoopa make mijo meta” mana eteegi kouja.

⁴²Tijake okei kede kei teete mana, „Beu, mee? kii ke Jesus kidi, Jusuf jokame, nakame ma ukame ma inii epi kodo. Kawe dani tijake ’Ani ki epaawadoopa make mijo meta’ eneegi kou ko,” wegai.

⁴³Tijake Jesus wo eteete mana, „Ikii kede kitigi motigi akaate te tai.

⁴⁴Me idaana ma aneepa te meja, kou danite nabadikumita Naitai kidaa okaija kegepa gokobaki te etijawi-toojogo ko. Wiwitiida naago kodaa ani ija eewiita.

⁴⁵Tikauwa ka gokobaki tijawiidaiga wegai tita bagee ka kapogeije duba kii dani ebijamakita: Okei utoma Ugatameja etopai. Meija Naitaipa make juwijake topipi aneepa mei.

⁴⁶Me idaana Naitai edota ko beu, kodeja Ugatameepa make meta me kidi to. Okai to Naitai edota.

⁴⁷Beu maa kou ani kitiine, meija maakodo gapi ko, okai ajii tai imo to togoo.

⁴⁸Ani ki Gei Tijawija Goti kodo.

⁴⁹Ikiija aijaane muumaane gei tapa make Manna nota, daana bokata.

⁵⁰Kou ko epaawadoopa make mijo meta Goti kodo, naija bagee kede te boka-tita no te.

⁵¹Ani ki Gei Tai Goti kodo, epaawadoopa make mijo meta. Kou danite meija Goti kodo nopi, ajii tai imo to togoo, daana anija menija Goti kodo ko anija má kou; makiida maki utomaapa meniine, ajii te-tijake.”

⁵²Etijake Jahudi bagee okei kede akaije teete mana, „Kawe dani tijake kii me kiija okaija má jato kodo no-tijake niimija?” wegai.

⁵³Tijake Jesus eteete mana, „Beu maa kou ani kitiine, kou danite ikii Me Joka kidaa má kodo ma, emo kodo ma, te nopa ko, ajii bokouto ikii duba beu.

⁵⁴Meija anija má kodo ma, emo kodo ma, nopi ko, ajii tai imo to togoo, daana wiwitiida naago kodaa ani ija eewiita.

⁵⁵Anija má kou ko maakodo naija agijo kouja, daana anija emo kou maija maakodo naija agijo.

⁵⁶Meija anija má kodo ma, emo kodo ma, nopi ko, okai ani duba tou, daana ani maija okai duba tou.

⁵⁷Naitai ajii bokouto jago me kidaa nabadikumita danite, daana ani ki ajii bokouto jago me Naitai kidi maida, okai kou danite meija ani nanopi ko, ani maida make ajii tai.

⁵⁸Kou ko epaawadoopa make mijo meta Goti kodo. Ikiija aijaane muumaane ka nojake wadoutouga bokata dani ko beu. Meija kou Goti ko nopi ko, okai ajii tai imo to togoo,” etii.

⁵⁹Kou manaido ko Jahudi ka sembahjang owaa duba make wegata, okai Kapernaum make etopeetigo gaa.

⁶⁰Etope-taido wedaba kii mana ki juwijake wegaate mana, „Kii mana juwii peu. Meija jakimakija?” wegai.

⁶¹Kodeja Jesus okeija kitigi motigi teete mana epi kouja, eteete mana, „Kii mana kii ko ikii ego gaaga, mee?

⁶²Kawe dani tijake Me Joka okai kidaa totaida wado uweete ikii edopa ko?

⁶³Roh kodaa ajii boko duwajawija. Má jato ko epa beu. Anija ikeepa kiteega mana muto kou ko Roh ma, ajii bokouto kodo ma.

⁶⁴Kodeja ikii jupi me ino maakodo gai beu,” etii. Maakodo egai beu bagee Jesus edoga kodaa make epi kouja, daana eekegajawita me kidi maija.

⁶⁵Tijake okai eteete mana, „Okai kou maida make ani kiteega, me idaana ma aneepa te meja, kou danite Naitaija te menitoojogo ko,” etii.

⁶⁶Okai kouja etope-taido wedaba ejaikidokii, daana okai ma enaimo uwina beu.

⁶⁷Tijake Jesus kidaa etope-tai wija ma gaati kedeepa eteete mana, „Ikii maija uwiine, mee?”

⁶⁸Etijake Simon Peterus eteete mana, „Ei, Tuhan, inii meimeepa uwii? Akeepa to ajii tai imo to togoo mana muto topa no.

⁶⁹Daana inii maakodo kagajake umina epaapa timakai, aki ki jimubeu me kidi Ugatameepa make meta kidi,” etii.

⁷⁰Tijake Jesus wo eteete mana, „Beu, mee? ikii me ida wija ma gaati ani kiwitokeetega? Kodeja ikii jupi me idaana kidi enija,” etii.

⁷¹Okai kou mana kodo Judas maida make etita, Simon Iskariot jokame kidi; okai ekegajawita me kiija. Okai etope-tai wija ma gaati kede idaana kidi.