Read Ekari KEI TITAIDO 10 Bible Online

KEI TITAIDO 10 - Ekari bible

KEI TITAIDO 10

¹Kaisaria makijo ka me idaana eka ki Kornelius toojogo Kii ke serdado migougu make-tai me, serdado kotoona eka ko Italia kodo.

²Okai Ugatameepa dijo do-tai me kidi. Okai ma okaija uguwo ma Ugatame weda egai. daana bunu enaa ka daba bageepa mene-tai. Okai Ugatameepa sembahjang to tigoo.

³Meuka amouwe dagiida gaa okai dou beu agijo ewaida dojake Ugatame jaetigo-tai idaana wadoujo kijake eteete mana, „Ei, Kornelius,” etii.

⁴Okai weda umina edootaa tijake eteete mana, „Ei, magijo, Tuhan?” Etijake wo eteete mana, „Akaa sembahjang teige ma, bunu enaa ma, Ugatame kaga-tou to.

⁵Okai kouja Joppe makiidaapa me ebadikumijake me idaana eka Simon, kii ke Peterus eebatita kidi manaa-tai

⁶Okai sapi kado kei te-tai me Simon kidaa owaapa topi, maikai watija,” etii.

⁷Okai ma oowegata jaetigo-tai kidi igadoke tijake jakei te-tai wija ma, okai ma enaimo ka dijo do-tai serdado idaana ma,

⁸kou mana eti-menijake Joppe makijoopa ebadikumii.

⁹Aweetaa naago kijake okei ita uweetigo gaa maki okogo kapa kijake Peterus owaimouda sembahjang taine wadouwe kai, tani dagiida gaa.

¹⁰Okai naidi umina gajake naine kodaa. Kodeja okei epeepi teetigo gaa Peterusja pekaida makidoke dou.

¹¹Okai kou duba okai epa damo kebadoke dou, daana ibo kagaba doko doko tigoo butu wiijago mijouwe kita.

¹²Kou duba tuma tumaija ka bo wiijago ma, jina ma, neemina agijo ma, bedo ma toojogo.

¹³Tijake mana wuu juwii, eteete mana, „Ei, Peterus, anigou. Wagijake nai,” etii.

¹⁴Kodeja Peterus eteete mana, „Beu, Tuhan, ani umina dá agijo juwa, nokii agijo juwa, te noja kouja,” etii.

¹⁵Tijake wijaagouda mana wuu eteete mana, „Ugatameja pijo awita agijo akija ko dá taawii,” etii.

¹⁶Kii dani kigi widaago kei tidoke tijake doko doko tita kodo epa maida metato wado motita.

¹⁷Dota agijo kodo boko jato gaagaa teetigo gaa Kornelius ebadikumita bagee kede Simon owaa ubajake damoutoopa joonidaa tai.

¹⁸Okei manaa-teete mana, „Simon, eka ki Peterus eebatita me kidi jakai umei tipi, mee? beu,” etii.

¹⁹Peterus kidi dopi agijo kodo dimi gaatigo gaa Rohja eteete mana, „Dodou, me ida wido kaubaate.

²⁰Anigojake mijouwe kai. Dimi ma te gajake okei wa enaimo uwii. Anija ebadikumita kouja,” etii.

²¹Peterus meidoopa mijouwe kijake eteete mana, „Ani ki ikii naubaaga kidi. Magijo ka ikii meega?”

²²Etijake okei wo eteete mana, „Kornelius, kii ke serdado kotoona migougu jamake-tai idaana, okai enaa me idaana, daana Ugatame migaakobe ete-tai: daana Jahudi tuma ka maija ibo ejaikita me. Kii kidiipa jimubeu ka jaetigo-tai kidaa etigojake, inii nibadikumijake aki kabukaine, akija etiitage mana juwiine tijake,” etii.

²³Okai kouja Peterus ebukijake kouda umidokii. Aweetaa naago anigojake Peterus okei wa enaimo uwii. Joppe makijo ka enakeneka bagee wija wido maija eepei.

²⁴Aweetaa naago okei Kaisaria dakii. Kornelius kidi okaija kenekaane ma, imee bagee ma ebukijake edoutoojogo.

²⁵Peterus wadoujo kijake Kornelius mei. Peterus jumaapa okai mijouga kijake migaakobe etai.

²⁶Kodeja Peterus wado ejakijake eteete mana, „Joonidou, ani na me tuma no!” etii.

²⁷Okai mana oowegaatigo gaa wadoujo ookai. Me wedaba kotuu timaki-toojogo edou.

²⁸Peterus eteete mana, „Ikii utoma epi, Jahudi bageeja ojaa bagee ma ootou juwa, edou uwii juwa, ko da. Kodeja Ugatameja namuwakita, tijake ani me idaana ma utoopa juwa, nokii juwa, te egaja.

²⁹Okai kouja, ani mana natijake ani dimi ma gai beu tijake mei to. Okai kouja ani kitidoune, magijo ka mana natai?” etii.

³⁰Tijake Kornelius eteete mana, „Amaiwii ito kii gaa ki dani, meuka amouwe dagiida gaa ki, ani owaa duba sembahjang teetigo. Tijake me idaana ataati kagaba makita aneepa joonidoke tai.

³¹Tijake okaija eneete mana, ’Ei, Kornelius, akija sembahjang ma, bunu enaa ma, Ugatameja kaga-tou to.

³²Okai kouja Joppe makijoopa me ebadikumijake Simon, eka Peterus eebatita kidi manaa-tai. Okai sapi kado kei te-tai me Simon kidaa owaapa topi, maikai watija,’ eneemegi.

³³Okai kouja, okai kou gaa kodo ani mana kateete me ebadikumijake aki meege kojoka enaa. Okai kouja, ito kou inii utoma jakai Ugatame jumaapa kotuu ateege; Tuhanja katita mana juwiine tijake,” etii.

³⁴Tijake Peterus mana godajake eteete mana, „Maakidi ani dou, Ugatameja me ebepeka te ewitokija.

³⁵Kodeja utoma tuma tumaija meija weda egajake enaa agijo ekowa-toojogo okai juma dege dege etai.

³⁶Kou mana kou ko Israil bageepa etita, ajii mana wudita gaa. Kou ko Jesus Keristus maidaiga muka muka mana. Okai ki e boko te boko duwa-tai me kidi.

³⁷Judea dokoo ka wudita mana kodo ikii epi, Galilea make ookajake, kou ko Jahjaja baptis tei tita mana wegata wadouto.

³⁸Ugatameja Jesus, Nazaret ka me kidi, Rohulkudus ma bida agijo ma etuumijake, enaa agijo kei tina, daana Teege ka tagi atita bagee kede beu jaawita. Ugatame okai ma enaimo kouja.

³⁹Daana inii ke edojake mana jawega-tai kede, Jahudi makijo ma, Jerusalim ma, kei tita agijo utoma; okei pija maida edajawijake ebokajawita me kidi.

⁴⁰Kodeja widaago naago Ugatameja eenigojawijake ewaida eewita.

⁴¹Meido kodoopa ko beu, kodeja ineepa, Ugatameja niwitokijake mana jawega-tai bagee kede. Kou ko, okai ma oonota bagee, okai bokata bagee jupi make anigojake wadouto kodo.

⁴²Daana inii meidoopa mana wudii nitimakita. Daana mana jawegai, okai kii kidi Ugatameja etogijawita, ija bagee ma, bokata bagee ma boko japeta-tijake.

⁴³Okai kii kidi maida make tikauwa ka mana wudei tita bagee utoma mana jawegai. Meija maakodo egapi okaija ekaidaiga peudo ipa ejaikidokii.”

⁴⁴Peterus kou mana eteetigo gaa kodaa, mana juwita bagee utoma maida Rohulkudus mijouwe kai.

⁴⁵Maakodo egai bagee kede, Jahudi ka okeitodo duwa-tai mana jaki-tou bagee kede Peterus ma enaimo oometa kede ego takuu tai. Ojaa bagee maida maija ojaa menija ka Rohulkudus kodo etuumijawii kouja.

⁴⁶Daana okei me ka mana gimoudaiga mana wegaate juwii kouja, Ugatame muta etuwaate mana. Tijake Peterus eteete mana,

⁴⁷„Kei meido baptis etai ko meija wo gojawija? Okei Rohulkudus go-motita bagee kede inii maija go-motita danite,” etii.

⁴⁸Tijake Jesus Keristus eka dubaiga baptis ete-tijake eti-menii. Tijake naago wija wido nito-tijake okei Peterus ediimai.