Read Ekari KEI TITAIDO 13 Bible Online

KEI TITAIDO 13 - Ekari bible

KEI TITAIDO 13

¹Antiochia ka maakodo gai uguupuguu jupi gokobaki tijawiidaiga wega-tai ma, etope-tai ma, toojogo. Kei ke Barnabas ma, Simeon kidi eka Niger eebatita kidi ma, Kireni ka me Lukius kidi ma, wiijago kabuuda maki jakimake-tai me Herodes kidi ma enaimo emunita me Menahen kidi ma, daana Saul ma.

²Okei Tuhan migaakobe etai ma, te nai dijo dou ma, teetigo gaa, Rohulkudus ka eteete mana, „Barnabas ma Saul ma okejainiinii natijawii, aanakei te-tijake manaa-tita wija kede aanakei te-tijake,” etii.

³Okei te nai dijo dou ma, sembahjang ma, tijake gane okejai maida jamakijake ebadikumii.

⁴Rohulkudus ka ebadikumijake Salukia jamo auwai. Kouda kodaa make Kiperus makijoopa komaiga auwai.

⁵Salamis dakii aatijake Jahudi ka sembahjang owaa duba Ugatameja mana aawudikumai. Jahja maija okei wa enaimo uwijake eedadai.

⁶Kou maki bobijake Pafos dakii tai. Pijaije awe-tai idaana ma akado tai. Okai Jahudi ka puja mana wude-tai, eka ki Bar-Jesus.

⁷Okai Sergius Paulus ma enaimo tou. Kii ke epi me idaana, kou makijo ka Gubernur kidi. Kii kidi Barnabas ma Saul ma manaa-tai, Ugatameja mana juwiine tijake.

⁸Kodeja pijaije awe-tai Elimas kidi (eka boko jato kou dani ebatijawita kouja), okei ma akaije ootai, maakodo gai mana maida make Gubernur monoo etaine tijake.

⁹Kodeja Saul kidi, Paulus maija eebatita kidi, Rohulkudus ka ebetume tijake peka ewagimakai.

¹⁰Tijake eteete mana, „Kowaa ke, Teege ka joka, maakodo mana akaije te-tai kidi, puja ma peu ma ka ebetume; aki Tuhanja doodoo itaido keenijake betokijake teete maida make tedemaipage, mee?

¹¹Ito kou Tuhanja gane aki wado mejake aki peka wanee kaineege. Naago wija wido meuka te doutage,” etii. Okai kou gaa kodo maija peka ako kijake wanee kai. Tijake bobaga bobaga teete kouja gane najake-tijake me eubana.

¹²Tijake Gubernur kidi kei tipa mana kodo dojake maakodo gai. Tuhanja etope-tai mana kodo umina ego takuu takuu tai.

¹³Paulus ma okai ma enaimo bagee ma Paphos make komaiga uwijake Perga makijo Pampilia dokoo dakii. Jahja kidi okejai ejaikidokijake Jerusalim wado uwii.

¹⁴Okejai Perga make auwijake Antiochia makijo Pisidia dokoo dakii. Sabbat naago sembahjang owaapa auwijake aanimakai.

¹⁵Musaja dijo dou mana ma, tikauwa ka mana wudei tita ma, ebatijawijake sembahjang owaa douto-tai kedaa okeepa ebadikumijake eteete mana, „Noogeima, kou danite meido aetopaine mana topa keetigo ko, neewegai,” etii.

¹⁶Okai kouja Paulus joonidoke tijake ganaabego tijake eteete mana, „Kowaa kei, Israil bagee, daana ikii Ugatame weda egata bagee, juwidowei.

¹⁷Israil bageeja ka Ugatame kidaa iniija aijaane ewitokijake okei Masir makiida tota gaa ibo eewii. Tijake bida agijoudaiga epodomijawii.

¹⁸Taun mepiija dani gei tapa okeija kei titaido kojáá na ki ewanita.

¹⁹Kanaan makiida me tuma pituwo peepu etijawijake okeija makiida mijo makii makii tijawiine jawudita, taun muto pituwo.

²⁰Kou wadoutouga mana boko peta-tai bagee menii, mana wude-tai Semuil kidi tota gaa to utuuja.

²¹Tijake okei maki jakimake-tai idaana ediimai. Tijake Ugatameja Kisj jokame Saul kidi menita. Kii ke Banjamin epaida ka me, taun mepiija maki jakimakita.

²²Kii kidi Ugatameja jamo ejaikijake Daud maki jakimaketijake ewaa awii. Kii kidi maida make jawegaate mana, ’Jisai jokame Daud kidi ani juma dege dege etai. Anija dimi mana kei taitagi.’

²³Kii me ka ekebataidaiga Ugatameja Israil bageepa ajii bokouto duwa-tai me Jesus kidi ewaa awita, mana togijawita kidi danite.

²⁴Okai mei beu gaa Jahjaja tedemai maida make baptis tai mana kodo Israil bageepa jawudii.

²⁵Jahja kei tai agijo boko duwajaweetigo gaa eteete mana, ’Ikiija gai ko ani ki meime? Ani okai kidi ki beu. Kodeja ani nemoutouga me idaana meitagi, okaija bado awii jaekegai maiia nadou peu,’ etita.

²⁶Kowaa kei, noogeimaido, Ibrahim jokaane, daana ikii jupi ka Ugatame weda ega-tai bagee, ineepa ajii tai mana kodo mijo nijamakijawita.

²⁷Jerusalim tota bagee ma, okeija pika-tai bagee ma, egamakai be gajake peu eewita. Okai kou dani tijake tikauwa ka mana wudei tita bagee kede Sabbat naago gakita ebateigai manaido kodo kobajawii.

²⁸Okai wagii mana kodo mana mutoona ma jadomakai beu tita kodeja wagiine tijake Pilatuspa ediimita.

²⁹Okai maida make ebijamakita manaido kobajawijake pija maida make mijouwe eewii, tijake me oka duba emakita.

³⁰Kodeja Ugatameja bokata bagee jupi make eenigojawii.

³¹Galilea make Jerusalim wado oometa bageepa naago wedaba ewaa kigoo. Ito ko meido keipa okei mana jawega-tai bagee kede.

³²Ugatameja iniija aijaaneepa jatogijawita ajii mana kodo inii kiti-kinii.

³³Inii ke, okeija jokaaneepa, boko nijaduwajawita, Jesus eenigojawijake. Wijaago ka ugaa manaida ebijamakita danite: Aki ki ani Joka didé; Ito kii naago ki kawowijawii.

³⁴Daana bokata bagee jupi make eenigojawijake te debija mana kodo maida make kii dani ebijamakita: Daudja mobu mana kaniita, Togijawita jimubeu mana kodo.

³⁵Okai kouja joko ka ugaa manaidaiga eteete mana: Akija jimubeu kidi debe-tijake te ejaikaitage.

³⁶Daud kidi okaija tota wagi Ugatameja dimi kei tijawijake bokai. Okaija aijaane watija emakijake debita.

³⁷Kodeja Ugatameja eenigojawita kidi debii beu.

³⁸Okai kouja gaadodowei, kowaa kei, noogeimaido, kii me kidi maidaiga peudo ipa ejaikai mana kiti-kinii.

³⁹Daana okai maidaiga meija maakodo egapi, Musaja dijo dou manaidaiga maa te keewija aagijo taagijo maida make maa eewita.

⁴⁰Okai kouja, epeepite gai, tikauwa ka mana wudei tita bagee ka ebijamakita kapogeije danite ikii maida kidoke na kojoka:

⁴¹Dowei, kowaa kei, widoge-tai bagee, Ego takuu takuu tidou, tijake igadaa tiwei. Ikiija ka wagiida kodaa tumaana kei tijawiita, Ikii maakodo te gaita mana, Me ka kiti-kinipai maija.”

⁴²Okei podomeetigo gaa wado ka Sabbat naago maija nitiniime-tijake meido ediimai.

⁴³Kotuu timakita bagee kede akawude tijawijake Jahudi bagee ma, Jahudi ka dijo do-tijake meta bagee ma, me wedaba Paulus ma Barnabas ma eepei. Okejai mana oojawegajake Ugatameja jikoo bokoutouda bo wemakai aetai.

⁴⁴Wado ka Sabbat naago kijake kou makiida maki utoma Ugatameja mana juwiine kotuu tai.

⁴⁵Kodeja Jahudi bagee me wedaba edojake kumi egai. Paulusja etita mana akaije ootijake ewidogai.

⁴⁶Tijake Paulus ma Barnabas ma uu peu kidi wegaate mana, „Ikeepa tiga Ugatameja mana keewegai beu kai peu. Kodeja ikii ekonijake, ajii tai kodo nidou peu gai kouja, dodowei, inii ojaa bageepa jamouga kai.

⁴⁷Okai kou dani Tuhanja enimakita kouja, eneete mana: Ojaa bageepa eganimake-tijake ewaa kaawita, Kii kidi maki momogiida ajii mana mejawiine tijake.

⁴⁸Kou mana kodo ojaa bagee juwijake okei ideide ma Ugatameja mana muta etuwai. Ajii te-tijake boko jaduwajawita bagee utoma maakodo gai.

⁴⁹Tuhanja mana kodo kou maki dokoo ugo uwikumii.

⁵⁰Kodeja Jahudi bagee ka dijo do-tai ekaago jagamoudo ma, maki okoga ka me iboudo ma, jigi jigi etai. Tijake Paulus ma Barnabas ma peepu etaine monoo etijake okeija maki dokoo make eepekumii.

⁵¹Kodeja okejaija bado maida make maki puugee kigi aatidokai, okei dimi ga-tijake. Tijake Ikonium auwai.

⁵²Etope-taido kede ideide dimi ma, Rohulkudus ma ka ebetume tigoo tita.