Read Ekari KEI TITAIDO 14 Bible Online

KEI TITAIDO 14 - Ekari bible

KEI TITAIDO 14

¹Ikonium makiida eti-awitaija kede Jahudi ka sembahjang owaa duba wadoujo aakai. Kou dani mana aawegajake kouja me wedaba maakodo gai, Jahudi ma, Gerika ma.

²Kodeja maakodo gai beu ka Jahudi bagee kede Gerika bagee jigi jigi etai; okei enakeneka bagee kede akaije oote-tijake emogaago etijawii.

³Okai kouja eti-awitaija kede kouda kodaa aumidokijake uu peu kidi Tuhan maida make mana oojawegai. Tuhan kidaa okaija jikoo mana kodo boko duwajawii, dou beu agijoudo ma, ego takuu takuu agijoudo ma, okejaija gane ka kei tijawijake.

⁴Kou makiida ka bagee kede dimi wija kita; amoonaato Jahudi bagee jatouga, daana joko ka bagee kede eti-awitaija jatouga.

⁵Ojaa bagee ma, Jahudi bagee ma, okeija iboudo ma enaimo ena dimi kepajawii eti-awitaija kede peepu etaine, daana mogo ka wagimakaine tijake.

⁶Eti-awitaija kede aajuwijake Listera ma Derbe ma aakai, Likaonia dokouda, daana kou maki bobe.

⁷Kouda kodaa maija okejai ajii mana kodo oojawegai.

⁸Listera makiida kodaa bado peu me idaana animaki-toojogo. Pataida make bado peu kijake ita uwidou beu tita.

⁹Paulusja wegaate mana okai ejuwai. Paulus epeepite peka edomakijake bado enaa ke-tijake maakodo gaipagi egajake

¹⁰Paulusja kuutakaa mana wuu eteete mana, „Aki bado joonidodou,” etijake okai wado otii otii tijake uwina tai.

¹¹Paulus kidi kei tita agijo me wedaba kede dojake okei Likaonia manaida emeeme teete mana, „Ugata bageido kede me kijake ineepa mijo mepai,” wegata.

¹²Barnabas kidi eka Zius eebatita, daana Paulus kidi mana wega-tai kouja Hermes eebatita.

¹³Zius migaakobe ete-tai owaa kodo kou makijo dimiito kodaa. Zius imam kidi eigi teigi tita sapi ma, pi ma oomei, meido ma enaimo jo-meniine tijake.

¹⁴Kodeja eti-awitaija Barnabas ma Paulus ma kou mana aajuwijake okejai kede kagaba aakigibijake me jupi tibigi auwijake emeeme aeteete mana,

¹⁵„Ei, meido, ikii magijo ka kou kei tai? Inai na me, ikii ma ena dani, daana ajii mana kodo kiti-kinii, kii epa beu mana maida make ikii wouga kijake ajii bokouto jago Ugatameepa wouga ke-tijake; epa ma, maki ma, maikai ma, daana kou duba ka aagijo taagijo Ugajawita me kidi.

¹⁶Tika ka wagiida me jokaija aki-gai-gai te-tijake ejaikita;

¹⁷enaa agijo kei tijake akaato ewaida awii kodeja; epa maida make edi mijo kijawejawijake táí wagijago kai, tijake naija agijo ka ma, ideide ka ma, kegepa mobu keewii.”

¹⁸Kou mana godajake meido kede jo-meniine agijo kodo eti-awitaija kede aekonaine tijake gaagaa aatita.

¹⁹Antiochia ma Ikonium ma makiida make Jahudi bagee mejake meido kede jigi jigi etai; okei Paulus mogo ka wagijake maki okogoopa make egoomigii, bokaagi gajake.

²⁰Kodeja etope-taido kede eebobimakijake okai anigou. Okai kou makijo woujo kijake aweetaa naago Barnabas ma enaimo aapodomijake Derbe makijo auwai.

²¹Kou makiida ajii mana kodo aeti-menijake me wedaba mana jakimakijake eti-awitaija kede joko aamejake Listera ma, Ikonium ma, Antiochia ma jokokaato aakai.

²²Joko aameete maakodo gai bagee kede kegepa jatipinijawii, daana maakodo gai manaida pigu tai aetai; inii beu ma ko beu didi gaduwai ma Ugatameja jakimakita makiida wadoujo kai aetai.

²³Maakodo gai uguupuguu gakita duba douto-tai bagee boko duwajawijake sembahjang ma, te nai dijo dou ma tijake Tuhan kidiipa wado eekegajawii, okeija ka maakodo egata me kidi.

²⁴Okejai Pisidia dokouga jamokaato aakijake Pampilia dokoo dakii.

²⁵Ajii mana kodo Perga makiida mana oojawegajawijake Atalia jamo auwai.

²⁶Kouda make ko okejai komaiga auwijake Antiochia dakii aatai; Ugatameja jikoo bokouto maida eekegajawitaida kodaa, okejaija aakei timakita ka kei tai agijo maida make.

²⁷Kouda kodaa dakii aatijake maakodo gai uguupuguu kotuu timakai aetijake Ugatameja ookei tita agijo utoma aeti-menai; daana maakodo gai damo kodo ojaa bagee maida make jakebajawita mana kodo.

²⁸Eti-awitaija kede etope-taido ma enaimo uno magoona oumidokii.