Read Ekari KEI TITAIDO 15 Bible Online

KEI TITAIDO 15 - Ekari bible

KEI TITAIDO 15

¹Judea make me ida wija wido mijo mejake enakeneka bagee kede etopeete mana, „Musaja iniitodo duwaja manaida ikii te duwa-toojogo ko, ikii ajii te timake,” etii.

²Paulus ma Barnabas ma kei bagee kede ma mana wegai wedaba. Akaije akaije tijake Paulus ma, Barnabas ma, joko ka wija wido kede ma Jerusalim wado uwii etita, eti-awitaido ma, maakodo gai uguupuguu douto-tai ma, egaado taine tijake.

³Maakodo gai uguupuguu kodaa ebadikumijake okei Feniki dokouga ma, Samaria dokouga ma wokaato kai. Ojaa bagee kede tedemita mana kodo okei meido eti-menii, tijake enakeneka bagee utoma ideide umina tai.

⁴Jerusalim dakii tijake maakodo gai uguupuguu ma, eti-awitaido ma, douto-tai bagee ma ka ejakimakijake, Ugatameja ookei tita agijoudo utoma eti-menii.

⁵Parisi jatouga ka maakodo gai bagee wija wido joonidaa tijake kei teete mana, „Kei bagee iniitodo duwai beu kai peu, daana Musaja dijo douja mana kodo dijo domakai eti-menii.”

⁶Eti-awitaido ma, douto-tai bagee ma, kou mana muto kodo wegaine tijake kotuu atii.

⁷Kii mana kou mana wegai wedaba timakijake Peterus joonidoke tijake eteete mana, „Ei, noogeima, ikii epi, tika kodaa ikii jupi make Ugatameja ani nawitokita, anija ebeida make ojaa bagee kede ajii mana juwijake maakodo ga-tijake.

⁸Tijake Ugatame kidi ki, me ka kegepa igi jake-tai kidi edojake Rohulkudus menijawita, inii maija niimijawita kidi danite.

⁹Ugatameja inii ma okei ma okaakai nitijawii beu kidija okei maakodo gajake kegepa jawitogai.

¹⁰Kojoka magijo taine tijake inii Ugatame egaado tai, tijake etope-tai bagee maida kugo jadokijawii, iniija aijaane ma, inii ma dokii kaga ka kugo kodo.

¹¹Kodeja iniija ka maakodo gai ko, inii Tuhan Jesusja jikoo bokouto kouja ajii nitijawii, okei danite,” etii.

¹²Me kotuu kodo gabo tou. Okei Barnabas ma Paulus ma ejuwai, Ugatameja okejai maidaiga ojaa bageepa jakei tita ka dou beu agijoudo ma, ego takuu takuu agijoudo ma, aetimenita gaa kodo.

¹³Mana muumai aatijake Jakub kidaa eteete mana, „Ei, noogeima, najuwidowei,” etii.

¹⁴„Ugatameja edoga kidi ojaa bagee edogota mana kodo Simeon kidaa neewegaagi; ojaa bagee jupi make okaaka maida make ka uguupuguu ebukaine tijake.

¹⁵Kou mana kodo tikauwa ka gokobaki tijawiidaiga wegai tita bagee ka mana kodo utuutu, kapogeije ebijamakita kodo danite:

¹⁶Kou wadouto ani wouga kijake Daudja bogomita owaa kodo titaaki jatijawiita; Gakowagidaa titaido ani wado migijawiita. Tijake pigu atiita.

¹⁷Me jokaija kede Tuhan kidi euba-tita, Daana ojaa bagee utoma, anija eka eebatijawita bagee kede. Tuhanja mana kodaa, kou agijoudo utoma kei tita me kidi.

¹⁸Maki kabo makijawita gaa make ewaida awita danite.

¹⁹Okai kouja, anija gai ko, ojaa bagee ka Ugatameepa wouga kai bagee kede gaagaa te neetijawii,

²⁰kodeja kapogeije jaebijai, enija menita agijo ma, mogai ma, jamo jaikai; daana emo uwikumii beu tijake bokata agijo ma, emo ma, jamo jaikai.

²¹Tika kodaa make Musaja mana wude-tai bagee e makijo te makijo tougai kouja; Sabbat naago gakita sembahjang owaa duba okaija mana jaebateigai,” etii.

²²Tijake eti-awitaido ma, douto-tai bagee ma, maakodo gai uguupuguu utoma enaa gai, me wija wido okei jupi ewitokijake Paulus ma Barnabas ma enaimo Antiochia ebadikumiine tijake; kii ke Barsabas eebatita me Judas kidi ma, Silas kidi ma, enakeneka bagee ma tuku tuku bagee kede.

²³Kapogeije okei maida jamakii, kei teete mana: Enakeneka bagee kede, kei ke eti-awitaido ma, douto-tai bagee ma ka ojaa bageepa kojaa kitii, Antiochia ka ma, Sjam ka ma, Kilikia ka ma.

²⁴Ineepa make me ida wija wido mana ka wedege kitijawijake dimi uneune kitijawii, iniija etii beu kodeja, inii juwijake

²⁵iniija gai ko, inii kotuu atijake, me ewitokijake iniija ei egata ka Barnabas ma, Paulus ma enaimo ebadikumii.

²⁶Iniija Tuhan Jesus Keristus kidi maida make dimi mana aekegajawita bagee kede.

²⁷Okai kouja inii Judas ma Silas ma ebadikumii; okejai kede ebeidaiga ena kidi mana kiti-kiniitai.

²⁸Rohulkudus ma iniija ka gai ko, kugo ti kijadokijawiine kodeja kei epauto mana wija dani kei to kitiine:

²⁹kou ko, enija menita agijo ma, emo ma, emo uwikumii beu tijake bokata agijo ma, mogai ma, jamo jaikai. Kei agijoudo maida make ikii akaato muni-toojogo ko, enaa. Kojáá towei.

³⁰Uwiine bagee ebadikumijake okei Antiochia jamo uwii. Meido kede kotuu atijake kapogeije kodo menii.

³¹Okei kapogeije kodo ebatijawijake mana kodo ideide tai.

³²Judas ma Silas ma gokobaki tijawiidaiga aawegai tita bagee kede mana wedaba enakeneka bagee aetopijake bo jawejawii.

³³Aumidokijake enakeneka bagee ka kojáá auwai etii, ebadikumita bagee kedeepa wo auwaine tijake.

³⁴Kodeja Silas kidi kouda kodaa tou ide gai.

³⁵Paulus ma Barnabas ma Antiochia aumidokijake me aetopai ma, Tuhanja mana wudii ma aatai, me ino ma enaimo.

³⁶Uno ino dani umimakijake Paulusja Barnabas eteete mana, „Medodou, inai Tuhanja mana aawegaatege makijo gakita enakeneka bagee kede aadouwai no! okei kawe dani ti-toupigaje aadou no!” etii.

³⁷Barnabas kidi Jahja, eka Markus eebatita kidi maija okei wa enaimo ouwiine gai.

³⁸Kodeja Paulusja gai ko, Pampilia makiida kodaa nijaikidokita me kidi ouwii ko peu; kei taineida okei wa enaimo uwii beu me kidi.

³⁹Okejai akaije umina aatijake akawude aatita; Barnabas kidi Markus ebukijake Kiperus makiida komaiga auwai.

⁴⁰Kodeja Paulus kidi Silas ebukijake auwai, enakeneka bagee kedaa Tuhanja jikoo bokouto maida eekegajawijake.

⁴¹Okejai Sjam dokouga ma, Kilikia dokouga ma wokaato aakijake maakodo gai uguupuguudo kodo bo jawejawii.