Read Ekari KEI TITAIDO 16 Bible Online

KEI TITAIDO 16 - Ekari bible

KEI TITAIDO 16

¹Okai Derbe ma Listera ma dakii tai. Etope-tai idaana eka ki Timotius toojogo; Jahudi ka maakodo gai jagamo ka jokame kidi, kodeja nakame ki Gerika ka me.

²Listera ma Ikonium ma ka enakeneka bagee kedaa enaa mana jawegai.

³Paulus me kidi ebukaine, enaimo auwe-tijake. Kou makiida ka Jahudi bagee maida make Paulus ebukijake okeitodo jaduwai; nakame kidi Gerika kidi me utoma epi kouja.

⁴Okei makijoonaapa make makijoonaapa wo uweetigo gaa, Jerusalim makiida kodaa eti-awitaido ma douto-tai bagee ma ka duwajawita manaido ekega-menii.

⁵Kojoka maakodo gai uguupuguudo kodo maakodo gai manaida bo wejawijake naago gakita ajaago tidaa.

⁶Okei Perigia ma Galatia ma dokoudo wokaato kai, Asia dokouda mana wegaine Rohulkudus wo egojawijake.

⁷Okei Misia doodouga kijake Betinia wo uwiine, kodeja Jesusja Roh kodaa ejaikai beu.

⁸Okei Misia dokoo wokaato kijake Teroas makiida jamo dakii tai.

⁹Wanee jato Paulus kidi bagume dani dou; Makedonia ka me kidi jooni-tojake, ediimeete mana, „Mewei, Makedonia makiida kiija joko adijake needadai,” ediimai.

¹⁰Bagume dani kodo dojake inii egaa kodo Makedonia uwiine, Ugatameja mana niteegi gajake, ajii mana kodo jawudetijake.

¹¹Inii Teroas make komaiga uwijake inii Samoterake makiida eetigai, tijake aweetaa naago Neapolis makiida;

¹²kouda make ko Pilipi makiida uwii, Makedonia dokoo ka ibo makijo kodo, Rum ka ijeida kita. Kou makiida inii uno wija wido umidokii.

¹³Sabbat naago kodaa maki okogoopa make podomijake onee watija uwii; kouda make ko meido sembahjang teigai juwa gajake; inii animakijake kotuu tita ka jagamoudo ma mana oowegai.

¹⁴Inii nijuwita bagee kodo jagamo idaana eka ko Lidia; okai Tiatira makijo ka me, digijo kagaba kaa te-tai. Okai Ugatameepa dijo do-tai me. Tuhan kidaa okaija kegepa jakebajawijake Paulusja wegata mana kodo okai juwaawe tai.

¹⁵Okai ma okaija uguwo ma baptis tijake ko okai nidiimijake eneete mana, „Ani ko Tuhan ejakimakeega nagapa ko, anija owaapa niumidokii,” nidiimai umina

¹⁶Inii sembahjang te-taida uweetigo gaa towo douja etido te-tai enija jago jagamo inii ma akado tai. Okaija douja etido te-tai kodaa ejakimakita bagee kede mege wedaba jamejawei tita.

¹⁷Okai Paulus ma inii ma neepejake emeeme teete mana, „Kei bagee kede e ibo te ibo Ugatame jakei te-tai bagee kede; okei ajii tai ita niti-niimai.”

¹⁸Naago inoudo kou kei tigoo tai; kodeja Paulus gaagaa tijake wouga kijake enija kodoopa eteete mana, „Jesus Keristus eka dubaiga ani katii, okai duba make podomai,” etijake okai kou gaa kodaa podomidoke tai.

¹⁹Ejakimakita bagee kede tonawi kai epauto igadoke kodo dojake okei Paulus ma Silas ma ejakimakai; akaada te-taida iboudo jumaapa ganeuto egou.

²⁰Pika-tai bagee jumaapa egojake kei teete mana, „Kei bagee kede Jahudi bagee, iniija makijo tetepepe umina nitijaweete.

²¹Inii Rum bagee kede te jakimakija mana, daana te kei tija mana nitopeete,” etii.

²²Me kotuu kodo maija ewidogai; pika-tai bagee kede okejaija ka kagaba jawigojake kopa wage-tijake etimakai.

²³Okei wagii umina tijake wanee owaa duba ejakigoo amaawii; douto-tai me kidi epeepite edoutou etii.

²⁴Kou mana juwijake okai woujo kuguuda amaawijake bado ko pija takaida tagi atii.

²⁵Wanee ejupi kaine gaa Paulus ma Silas ma sembahjang aateetigo gaa, daana Ugatame muta etuwai mana ebetaataa aateetigo ko ejakigoo amaawita bagee kede ejuwai.

²⁶Okai kou gootoki maki pigi umina tijake wanee owaa kabo kodo pigi pigi tai; damo utoma kebadaa timakijake me utoma ka buda ekegadaa tai.

²⁷Wanee owaa douto-tai me kidi gootoki tijake damoudo kebadaa dojake kataana juwi-motii, akaato wagiine tijake; me utoma okimigi-toupigai gajake.

²⁸Paulus kuutakaa emeeme teete mana, „Ei, aki akaato te wagii, inii utoma tope kojoka,” etii.

²⁹Wanee owaa douto-tai me kidi pito ediimijake tibigi pigi pigi ma wouja kijake Paulus ma Silas ma jumaapa apaipu tidoke tai.

³⁰Okejai wija epodomijawijake eteete mana, „Ei, meija, ani magijo kei tai, ajii taine no!” etii.

³¹Tijake okejaija aeteete mana, „Tuhan Jesus kidi maakodo egai, tijake ajii taipage, aki ma, akija uguwo kodo maija,” aetai.

³²Tijake Tuhanja mana kodo aeti-menai, daana okaija owaapa tota bageepa maija.

³³Okai kou gaa kodo wanee owaa douto-tai me kidaa ouwijake jati ewajake tita kodo jawitogai; okai kou gaa kodo maija okai baptis tai, daana okai ma bagee kede maija.

³⁴Tijake okaija owaapa wadoujo ookijake naija agijo jamakii; okai ma okaija uguwo ma ideide umina, Ugatame maakodo egajake kouja.

³⁵Abata kijake iboudo kede me ebadikumijake „Me wija kei ejaikai,” etii.

³⁶Wanee owaa douto-tai me kidaa Paulus eti-menii, kei teete mana, „Kii makijo ka iboudo kede kijaikaine tijake me ebadikumipai, kojoka kojáá na ka auwai,” etii.

³⁷Kodeja Paulusja eteete mana, „Me wedaba pekaida kopa nigeetegai, mana boko petai beu tijake, inai na Rum bagee kodeja; tijake wanee owaa duba neemigeetegai; ito kou okei gabo gabo nipodomijawiine, mee? Umina beu! Okei kede mejake nipodomijawii,” etii.

³⁸Ebadikumita bagee kede iboudo wo ete-uwijake okei weda gai; okejai Rum ka bagee mana kodo juwijake.

³⁹Okei mejake jeu jeu etai; epodomijawijake iniija makijo nijajaikai ediimai.

⁴⁰Okejai wanee owaa duba make aapodomijake Lidia owaa duba wadoujo aakai. Okejai enakeneka bagee aedojake dimi aajamaipajawijake auwai.