Read Ekari KEI TITAIDO 2 Bible Online

KEI TITAIDO 2 - Ekari bible

KEI TITAIDO 2

¹Pentakosta naago kijake okei utoma enaida toojogo.

²Okai kou gaa kodo epa maida make ibo ukija nemugu dani bukaa mejake okeija tota owaa duba ebetume tidoke tai.

³Okeepa bodija tiki dani bukaa ewaa kijake wokaato joko-kaato tijake me gakita maida animakai.

⁴Okei utoma Rohulkudus ka ebetume tidaa tijake me tuma tumaija ka mana gimoudaiga wegaate go-motii, wega-tijake Roh ka boko jaduwajawita danite.

⁵Jahudi bagee Jerusalim makiida toojogo; kei ke, dijo do-tai bagee kede e makijo te makijo make mejake.

⁶Nogee kodo juwijake me wedaba kotuu timakai. Okei goo-toki tidaa, me gakita akija mana gimo gimoudaiga mana wegaate juwijake kouja.

⁷Okei ego takuu takuu tijake apai umina teete mana, „Beu, mee? kei mana wegaate meido kei utoma Galilea bagee.

⁸Kawe dani tijake inii utoma inii nipata manaidaiga ejuwai ko?

⁹Kou ko, Parti ma, Madi ma, Elami ma, bagee; daana Mesopotami ma, Judea ma, Kapadoki ma, Pontos ma, Asia ma ka.

¹⁰Perigia ma, Pampilia ma, Masir ma, daana Libia dokoo, Kireni makijo kapauto kodo ma; daana Rum ka duwa jawe-tai bagee ma.

¹¹Jahudi bagee ma, dijo do-tijake meta bagee kede ma; Kereti ma, Arab ka bagee ma, Ugatameja ibo kei tita agijoudo iniija ka manaidaiga wegaate inii juweege!”

¹²Okei utoma ego takuu takuu tijake gootoki tai. Okei kede kei teete mana, „Kou ko má mana no?” wegai.

¹³Kodeja me ino ka ewidogeete mana, „Okei ija utaadijo nojake uneune teete,” wegai.

¹⁴Kodeja Peterus kidi joko ka ena ma gaati kede ma enaimo joonidoke tijake mana wado godajake eteete mana, „Kowaa kei, Judea bagee ma, daana Jerusalim umi-tou te-tai bageido ma, kou mana kou ikii epi iuwaawe tai, daana anija mana kodo epeepite gaawe tai.

¹⁵Kei utoma uneune beu, ikiija ka gaaga danite, ito meuka tegemidaida kouja.

¹⁶Kodeja kou dou mana wudei tita me Joel kidaa wegata mana kodo:

¹⁷Wiwitiida gaa, Ugatameja mana, Me tumaido maida anija Roh jatuumikumiita; Ikii jokaane jame jagamo mana wude-tai kaitai; Ikiija jokaagaido douja agijoudo doutai, Daana ikiija adamaido bagume umiitai.

¹⁸Nakei te-tai jame jagamo maida maija Okai kou wagi kodo anija Roh jatuumikumijake Okei gokobaki tijawiidaiga mana wegaitai.

¹⁹Ego takuu takuu agijoudo epa maida ewaa awii ma, Mijouwe makiida dou beu agijoudo ma; kou ko, Emo ma, bodija ma, nakagi nogaa ma, ewaa awiita.

²⁰Meuka wanee kijake agoo maija emo kaita, Tuhanja putu naago kodo ewaa kai beu gaa; Kou ko, ibo naago kodo, daana jegeenaka.

²¹Tijake kou dani tidoke taita, Meija Tuhanja eka manaa-tipi ajii taitagi.

²²Kowaa kei, Israil bagee, kou mana kou juwidowei. Nazaret ka me Jesus kidi ki, Ugatameja juma dege dege etijawita kidi, ikii jupi ibo kei tai agijoudo ma, ego takuu-takuu agijoudo ma, dou beu agijoudo ma, Ugatame kidaa okai maidaiga kei tita ikii epi.

²³Kii Jesus kidi Ugatameja tika kodaa tota dimiidaiga eekegajawijake ikii kede peu bagee ka gane ka pija boko maida edajawijake wagimakai.

²⁴Kodeja Ugatameja eenigojawii, gaduwagoo bokai kodo dabaapigu tijawijake, okai boka ka te ejakimake kouja.

²⁵Daud okai maida make mana jawegai kouja: Ani jumaapa Tuhan kidi umina edomakai to. Okai ani etikaato gebo tou, ani pigi te te-tijake.

²⁶Okai kouja anija kegepa ide gajake Anija ebeida ideide tijawii. Daana anija má jato kodo kotopijawita dimi maida tou.

²⁷Anija dimi mana aki bokawouda jamo te najaikai kouja, Daana akija jimubeu kidi debii beu.

²⁸Ajii tai taka takaija aki epi naawita kouja. Aki jumaapa ideide bokouto naduwajawii.

²⁹Kowaa kei, noogeima, ani uu peu kidi iniija aija Daud kidi maida make wegai. Kou ko, okai bokajake oka emakijawita, daana ito kii naago ki maija okaija oka kodo ineepa topa.

³⁰Okai mana wude-tai kouja, daana Ugatameja baita makijake okaija epaidaiga me idaana okaija jegeenaka animakaida eenimakaitagi jatogijawita mana kodo epi.

³¹Okai kouja mana wude-tai epiidaiga Keristus bokata bagee jupi make anigou mana douja dojake wegai. Okai bokawouda jamo te ejaikijake má jato maija debii beu.

³²Kii Jesus kidi Ugatameja eenigojawita. Okai kou kodo inii utoma mana jawega-tai bagee kede.

³³Okai Ugatame etikaato gane ka wado ebuki-motijake, daana Nakameepa make nijatogijawita Rohulkudus go-motijake, ikii dou ma, juwii ma, teega mana kodo tuumijaweegi.

³⁴Daud kidi waiko epaawado uwii ko beu kouja; kodeja okai kidaa maija wegata mana: Tuhan kidaa anija Tuhan kidiipa etita mana, Anija etikaato gebo animakai,

³⁵Be kagata bagee akija bado mijouto tagi atijake Bado makijaida kaejaikaitaida to.

³⁶Okai kouja, Israil uguupuguu dimi takaida te kijake gamakidowei. Kii Jesus kidi, ikiija pija boko maida edajawita kidi, Ugatameja e boko te boko duwa-tai me ma, Keristus ma, eewita.”

³⁷Okei kou mana kodo juwijake kegepa totome tai. Tijake Peterus ma, joko ka eti-awitaido kedeepa ma, eteete mana, „Kowaa kei, noogeima, inii magijo kei tai?” etii.

³⁸Tijake Peterus wo eteete mana, „Tedemiwei, ikii utoma, daana ikii me gakita Jesus Keristus eka dubaiga baptis tai, peudo ipa kijaike-tijake. Tijake ojaa niimija Rohulkudus kodo ikii go-motiipiga.

³⁹Togijawita mana kou ko ikii ipuwe kouja, daana ikii jokaane ipuwe maija, daana poto ka bagee utoma ipuwe maija. Kou ko, e boko te boko nijaduwa-tai Ugatameja manaa-tai bagee utoma,”

⁴⁰Joko ka mana wedaba maija jawegajake bida peu ediimeete mana, „Kii keenidaa betokidaa tumaapa make ikiiniinii kai,” etii.

⁴¹Kojoka okaija mana ejakimakita bagee baptis tijake okai kou naago kodo me muto muto to muto gaatibeu [1] ajaago tidaa.

⁴²Eti-awitaido ka etopita mana maida bo wei, daana ena dimi akagadime tijawii ma, goti ute-tai ma, sembahjang ma, to tigoo tai.

⁴³Me gakita weda gadaa tai, daana eti-awitaido kedaa ego takuu takuu agijoudo ma, dou beu agijoudo ma, wedaba ewaa awii.

⁴⁴Maakodo gai bagee utoma boda wagimakijake utoma agijo utoma enaimo to tijawii.

⁴⁵Okeija edepede kaa tijake beu bageepa wude wude tai.

⁴⁶Agapi gakita Ugatameja owaapa ena kegepa duwajawijake bo wei, daana okeija owaapa goti oute-tai. Kegepa ideide ma, doodoo ma, tijake naija agijo no-tai.

⁴⁷Okei Ugatame muta etuwai, daana meido utoma juma dege dege etai. Agapi gakita ajii teete bagee Ugatameja wado kotuu etai.