Read Ekari KEI TITAIDO 21 Bible Online

KEI TITAIDO 21 - Ekari bible

KEI TITAIDO 21

¹Inii ejaikidokijake komaiga uwijake Kus wokaato kai: aweetaa naago Rodus dakii tai, daana kouda make ko Patara dakii.

²Feniki uwiine ka kapal koma inii domakijake inii matakijake uwii.

³Inii Kiperus waatouga dojake inii Sjam dokoo doodouga uwijake Sur makiida dakii; kouda kodaa kapal koma matakita agijoudo adimakaine kouja.

⁴Etope-taido kede inii edomakijake uno pituwo okei ma enaimo oumidokii; Paulus Jerusalim te uwii mana okei Rohdaiga etii.

⁵Inii toune naagoudo muumai tijake inii podomijake komaiga wo uwiine tijake; okei utoma, jagamaane ma, jokaane ma, ita maida neumigou; tijake inii uwo watija bado donimakijake sembahjang tai.

⁶Inii kojáá tou, kojáá uwii, mana akaate tijake inii kapal koma matakai, daana okei ke owaapa wo uwii.

⁷Inii Sur makiida make uwijake Telomais dakii tai; inii etope-taido kede mana oowegajake unoona oumidokii.

⁸Aweetaa naago inii uwijake Kaisaria dakii tai; ajii mana wega-tai me Pilipus kidaa owaapa inii wadoujo kai; me ida pituwo kede ka idaana kidi; tijake inii oumii.

⁹Kii me kidi jagamo joka ida wii gokobaki tijawiidaiga wega-tai kodo.

¹⁰Inii uno wija wido oumijake Judea dokoo make gokobaki tijawiidaiga wega-tai me idaana mijo mei, eka ki Agabus.

¹¹Okai ineepa mejake Paulusja piti jamotijake okai akaato gane ma bado ma gadimijake kei teete mana, „Kou dani Rohulkudusja mana kodo, Kii piti ipuwe me kidi Jerusalim makiida Jahudi bagee ka kii dani egadimijake ojaa bageepa eekegajawiitai,” etii.

¹²Inii kou mana juwijake inii ma, tota bagee ma, Jerusalim wado te uwii ediimai.

¹³Tijake Paulus joko niteete mana, „Ikii magijo taine, jege teete kou ko; anija kegepa juwikigi natijawii. Ani ki nagadimai to ko beu kodeja Jerusalim makiida Tuhan Jesus eka maida make bokai na enaa,” enita.

¹⁴Okai ti nijuwai kouja inii mana duwajake kei teete mana, „Tuhanja dimi to kei tijawii.”

¹⁵Kou wadouto inii epeepi timakijake Jerusalim wado uwii.

¹⁶Kaisaria makijo ka etope-tai ino dani neumigojake Menason kidiipa neewii. Okai Kiperus ka me kidi, tika make etope-tai me kita. Inii okaija owaapa oumidokiine tijake.

¹⁷Inii Jerusalim dakii tijake enakeneka bagee utoma ideide ma nijakimakai.

¹⁸Aweetaa naago Paulus inii ma enaimo Jakub edou uwii, maakodo gai uguupuguu douto-tai bagee ma tojake.

¹⁹Kipo emotijake Ugatameja okaimaidaiga ojaa bagee jupi kei tita manaido ena tiga ena tiga eti-menii.

²⁰Okei juwijake okei Ugatame muta etuwai, Paulus kidiipa eteete mana, „Ei, noogei, gai, Jahudi bagee muto muto to muto maakodo gai, tijake okei utoma Musaja dijo douja mana kodo epeepite jakimakai.

²¹Kodeja aki maida make mana juwita, ojaa bagee jupi umetai Jahudi bagee kede Musa ejaikai mana aki etopeige wegaigai; okeija jokaane iniitodo te duwai mana, daana iniitodo nijamakii makii manaido jaikai.

²²Kojoka ito ko kawe dani? Aki meege mana kodo okei juwiitai.

²³Okai kouja inii katiine agijo kodo kei tai. Iniija ka me ida wii kede nazar baita makita.

²⁴Kei bagee ouwijake aki akaato kidi okei ma enaimo dijo dou, okeija menija agijo jamenijake, okeija ijo buge-tita. Tijake aki maida make wegata mana kodo puja kojoka meido kede gaitai, aki ki dijo douja mana kodo dijo do-tai kouja.

²⁵Kodeja ojaa bagee ka maakodo gai bagee kede inii mana duwajake kapogeije jamakeetege, enija menita agijo ma, emo ma, emo uwikumii beu tijake bokata agijo ma, mogai ma, jaikai manaido kodo,” etii.

²⁶Tijake Paulus kidi kei bagee ouwijake aweetaa naago okei ma enaimo dijo dou, tijake Ugatameja owaa duba wadoujo kai, jimubeu kija naagoudo tiki taita gaa etiine tijake, daana me gakita menija agijo meniine gaa kodo.

²⁷Uno pituwo tiki taine ijeida gaa kodo Asia dokoo ka Jahudi bagee kede Ugatameja owaa duba Paulus edojake me wedaba jigi jigi etijake Paulus ejakimakai.

²⁸Okei emeeme teete mana, „Ei, Israil bagee, needadai! Kii kidaa kiida kouda utoma bagee monoo ete-tai kidi, kii bagee ma, dijo douja mana ma, dáida ki ma akaije,” etii.

²⁹Epesus ka me Teropimus kidi kou makiida Paulus ma enaimo mijaato edota kouja, tijake okeija ka gai ko. Paulusja Ugatameja owaa duba ouwita gai.

³⁰Tijake kou maki utoma gootoki tijake meido kede tibigi kotuu tai. Okei Paulus ejakimakijake Ugatameja owaa duba make egojake owaa damoudo kodo okei jekamijawii.

³¹Okei wagiine jato Jerusalim tetepepe mana kodo Rum ka serdado ka ibo kidi juwii.

³²Okai egaa kidi serdado ma, serdado migougu bagee ma ouwijake tibigi mijo uwii; serdado ka ibo kidi ma, serdadoudo ma meete okei edojake okei Paulus wageete kodo ejaikai.

³³Tijake serdado ka ibo kidi mejake ejakimakai. Pute buda wija ka egadimai etijake kii ke meime? daana magijo kei tipi? mana kodo okai meido egaado tai.

³⁴Me wedaba kedaa me ino ka kii dani, me ino ka kou dani, mana emeeme tijake mana wedaba kodo te juwimake kouja serdado owaapa ouwii etii.

³⁵Mamo-mamo maida kijake serdado kedaa edokai, me wedaba kede tetepepe teete kouja.

³⁶Me wedaba kede eepejake kouja, emeeme teete mana, „Wagimakiwei!”

³⁷Paulus kidi serdado ka owaa duba ouwiine jato okai ibo kidiipa eteete mana, „Ani mana katii enaa, mee?” etijake ibo kidaa eteete mana, „Aki Gerika mana gimo wegai epi, mee?

³⁸Beu, mee? aki ki Masir ka me kidi itookei tetepepe ewaa awijake me wage-tai bagee empat ribu kede me beuda ka makijo ouwii,” etii.

³⁹Kodeja Paulus wo eteete mana, „Ani ki Jahudi ka me, Tarsus makijo ka kidi, Kilikia dokoo ka ibo makiida kodaa make napata; tijake ani kadiimai, meido mana etiine tijake,” etii.

⁴⁰Ibo kidaa ejaikijake Paulus kidi mamo-mamo maida joonidoke tijake meidoopa ganaabego tai; meido kede mana gabo kijake okai Iberani manaidaiga mana oowegai, kei teete mana,