Read Ekari KEI TITAIDO 24 Bible Online

KEI TITAIDO 24 - Ekari bible

KEI TITAIDO 24

¹Uno idibi umijake Ibo Imam Ananias kidi mijo mei. Iboudo me ida wija wido okai ma enaimo, daana mana wegai epi me idaana eka Tertullus; okeija ka mana Paulus maida make okei Gubernur eti-menii.

²Okei Paulus manaa-tijake Tertullus ijeije eteete go-motii, eteete mana, „Ei, Pelik ibo kidi, aki maida inii muka-muka tou kouja, daana kei bagee aki enaanaa etai kouja,

³kiida kouda utoma kodo inii nigajaweege kouja inii motii.

⁴Kodeja odoo te kaawiine tijake pini mana kojáá peu kidi nijuwe-tijake kadiimai.

⁵Kii me kidi epa beu ka me inii edomakai kouja, uwoje makije Jahudi bagee utoma bunikigi etei tita, daana Nazrani jaida ka bagee migougu me kidi.

⁶Okai Ugatameja owaa duba utoopa taine kodeja inii ejakimakijake iniija dijo douja manaidaiga boko japetaine;

⁷kodeja serdado ka ibo Lisias kidi bida peu kidi iniija gane duba make ejakimakijake ijeije etaine bagee kede akeepa kaebadikumii.

⁸Tijake aki igi ejakimakipe ko inii ijeije eteete manaido utoma aki kidaa okaapa make gaipage,” etii.

⁹Jahudi bagee okai ma enaimo ijeije etijake mana kodo okai kou dani kojoka etii.

¹⁰Paulus mana kega-tijake Gubernur kidi ganaabego etijake Paulus wo eteete mana, „Aki ki taun inoudo iniija bagee boko nijapetai gajake kouja ani kegepa tipinimakijake anija mana kodo kaakegai.

¹¹Aki kidaa gaipage, uno wija ma gaati umitaato mijo ko beu ani Ugatame migaakobe etaine tijake Jerusalim wado uweetega.

¹²Ugatameja owaa duba juwa, sembahjang te-tai owaido duba juwa, makijo duba juwa, ani meido akaije ooteetigo nadomakai beu; juwa, me kotuu bunikigi etijawii na beu.

¹³Daana okei ito kou ijeije nateete manaido kou okei tadu te naatimake.

¹⁴Kodeja ani kii mana oda-kanii, okeija ka wegai ko, ’kou jaida kodo’ kateegai, okai kou daniidaiga iniija aijaane muumaane ka Ugatame kidi ani migaakobe etai, Musaja dijo douja manaidaiga ebijata mana ma, gokobaki tijawiidaiga wegai tita bageeja ka mana ma, utoma maakodo gajake.

¹⁵Daana ani Ugatame maida dimi ekotopijawii, okei na dimi ekotopijawii kodo danite, bokata bagee anigoutai mana kodo, enaa bagee beu, peu bagee beu.

¹⁶Okai kou dani ani ekowa-moteiga, Ugatame pekaida beu, me pekaida beu, dimi enaa toune tijake.

¹⁷Ito kou taun magoo dani umijake anija bagee meniine agijo ani meniine mei.

¹⁸Ani kou kei teetigo ani Ugatameja owaa duba jimubeu kidi okei nadomakai, me kotuu ma ko beu, bunikigi na beu. Kodeja Asia dokoo ka Jahudi bagee kede

¹⁹okei akeepa mejake katii naako enaa, akaije nataine mana topa keetigo ko.

²⁰Juwa, kei bagee kede neewegai, kawo ka peu kodo okei nadomakai ani pika-tai jumaapa jooni-toojogo gaa kodo.

²¹Kii mana kidi to ani okei jumaapa joonijake ani pitokai, kii ko: ’Bokata bagee anigou mana muto maida make ani ito naago nagaado teete’, eteemega.”

²²Pelik kidi Tuhanja Ita mana kodo epeepite gamakita. Okai mana duwai beu tijake eteete mana, „Serdado ka ibo kidi mijo mepi ko akija mana kaaduwajawiita,” etii.

²³Tijake okai serdado migougu kidi Paulus ejakimakai etimenii, kodeja bida peu ko beu; daana ogaane kede eedadaine kipai ko meena ma beu te etii, etii.

²⁴Uno wija wido umijake Pelik kidi jagamome Derusilla ma enaimo aamei; Derusilla ko Jahudi ka me. Pelik kidi Paulus manaa-tijake Keristus Jesus maakodo egai mana muto ejuwai.

²⁵Kodeja Paulus kidi enanaidaiga boko peta-tai mana ma, peu maida make akaato munii mana ma, wadaato ka boko petaida ma, mana kodo jawegajake Pelik kidi weda gajake eteete mana, „Tiki! Ito kou uwii! Ani gaita naago mana kataita,” etii.

²⁶Pelikja gai ko, Paulus kidi mege naimaipagi, mee? gai. Okai kouja kigeena wageena mei etijake mana aawegai.

²⁷Kodeja taun wija umimakijake Parkius Pestus kidi Pelik komouto kai; Pelik kidi Jahudi bagee ideide etijawiine kouja Paulus wanee owaa duba ejaikai.