Read Ekari KEI TITAIDO 26 Bible Online

KEI TITAIDO 26 - Ekari bible

KEI TITAIDO 26

¹Agerippa kidi Paulus eteete mana, „Aki akaato mana kegai enaa,” etii. Tijake Paulus kidi gane mapido tijake akaato mana kegai.

²„Ei, Agerippa Ibo kidi, Jahudi bagee ka ijeije nateete manaido ani ito naago aki jumaapa akaato mana kegai ko, enaa gaaga;

³Jahudi ka iniitodo manaido ma, akaije tei tita manaido ma, aki epi kouja; okai kouja kojaa peu kidi najuwai kadiimai.

⁴Ani jokaida gaa make umei tita ijeida ko Jahudi bagee utoma epi; kou ko, edoga make ko anija bagee jupi Jerusalim makiida.

⁵Okei epautouda make nagajake naawegamake, mana wegai ko enaa gapai ko, ani ki iniija migaakobe te-tai ijeida ko Parisi ka me; kii ko umina epeepite dijo do-tai ka ijeida kodo.

⁶Ito kou ani jakai joonijake nagaado teete mana ko, Ugatameja iniija aijaane muumaane jatogijawita mana kodo dimi kotopijawijake kouja.

⁷Iniija epa wija ma gaati kede juma doodoo mana kodo, wanee agapi epeepite Ugatame migaakobe etigoo to tijake. Ani kou mana kodo dimi kotopijawii kouja Jahudi bagee ijeije nateete, ei, Ibo kidi.

⁸Ugatameja bokata bagee eenigojawii mana kou ko ikii magijo ka maakodo te gamakija gaaga?

⁹Ani maija Nazaret ka me Jesus kidi eka akaije ootai manaido wedaba kei tijawii beu kai peu gaamega

¹⁰Ani kou kei tai Jerusalim makiida; imam iboudo ka bida agijo naimijake ani jimubeu bagee kede wanee owaa duba ejakigoo amaawii; kou to ko beu, kodeja wagiine jato ani na wagii mana to wegai.

¹¹Sembahjang owaa utoma duba ani kigi inoudo peepu etei teemega; okei Jesus ewidoge-tita tijake eteemega; emoge umina egajake poto ka makijoudo maija ani epeena teemega.

¹²Okai kou kei teetigo, ani Damsjik ita maida uwii, imam iboudo ka uwe-tijake bida agijo naimijake.

¹³Tani dagiida gaa, ei, Ibo, ita maida kodaa epa maida make ataati peijo niganimakai, meuka ka ataati ma ko wo etige, ani ma, ani ma enaimo uweete bagee ma niganimakai.

¹⁴Inii utoma makiida apaipu tidaa tijake Iberani mana gimoudaiga mana wuu ani juwii, eneete mana, ’Ei, Saul, Saul, magijo ka peepu natai? Amo pitu pitu kate-tai kodo akaije teete ko didi,’ eneemegi.

¹⁵Tijake anija wo eteete mana, ’Aki ki meime? ei, Tuhan’, etijake Tuhanja eneete mana, ’Ani ki Jesus, aki peepu nateete me kidi,’ eneemegi.

¹⁶’Anigou’, eneemegi. ’Joonidoke tai; okai kou maida make ani akeepa ewaa keega, aki dooge manaido ma, ewaida kaawiita manaido ma, aki nakei te-tijake, daana mana naawega-tijake, boko kaduwajaweega.

¹⁷Kii bagee maida make kapipikajawiita, daana ojaa bageepa make maija; okai kou bageepa ani kabadikumiine,

¹⁸okeija ka peka jakadijawe-tita; okei bunitaapa make awe kodoopa wouga ke-tita, daana Teege ka bida maida make Ugatameepa wo ke-tita; okeija ka peudo ipa jajaike-tita, maakodo nagajake jimubeu eewita bagee jupi okei didee go-motetita,’ eneemegi.

¹⁹Okai kouja, ei, Agerippa Ibo kidi, ani epa maida make dota agijo kodo ani aadaba tai beu tita,

²⁰kodeja meido kede eti-menii, edoga kidi Damsjik makiida, tijake Jerusalim ma, Judea dokoo utoma; kou dani maija ojaa bageepa okei tedemijake Ugatameepa wouga kai mana, tijake tedemai ma utuutu ka manaido wo kei tijawii.

²¹Okai kou manaido maida make kouja Jahudi bagee kede Ugatameja owaa duba najakimakijake nagiine tai.

²²Kodeja Ugatame kidaa naadadijake ani ito naago to topa, ibo bagee ma, mijo bagee ma, mana oowegaate, mana ino ko beu, kodeja tikauwa ka gokobaki tijawiidaiga wegai tita bagee ma, Musa ma, wegata manaido kodo, ewaa kaitai wegai tita manaido kodo.

²³Kou ko, Keristus kidi didi gaduwai beu kai peu, tijake okai tiga bokata bagee jupi make anigojake iniija bagee ma, ojaa bagee ma, aweida kodo nimuwakai.”

²⁴Okai kou dani mana wegaatigo Pestus kidi kuutakaa emeeme teete mana, „Ei, Paulus, aki enijaanija! Aki kapogeije topigoo tei tita kou ko enijaanija keege,” etii.

²⁵Kodeja Paulus wo eteete mana, „Ani ki enijaanija ko beu, ei, Pestus Ibo kidi, kodeja ani maakodo ma, doodoo ma mana kodo kiti-kinii.

²⁶Maki jakimake-tai me kidi kei manaido epi; okai kouja ani uu peu kidi oowegai; ani epi okai kou manaido utoma gai, ogauto ewaa kai beu kouja.

²⁷Ei, Agerippa Ibo kidi, aki tikauwa ka mana wudei tita bagee maakodo egai, mee? Ani epi aki maakodo gai,” etii.

²⁸Tijake Agerippa kidaa Paulus wo eteete mana, „Mijo gaa ki duba to Keristen ka me naawiine,” etii.

²⁹Tijake Paulus eteete mana, „Ani ide kodaa, mijo gaa kipa maija, ibo gaa kipa maija, aki to beu kodeja ito naago najuwai bagee utoma ani dani kai enaa kodaa, buda kodo to beu,” etii.

³⁰Maki jakimake-tai me kidi joonidoke tai, daana gubernur kidi ma, Bernike ma, okei ma enaimo animakita bagee kede ma;

³¹okei podomijake okei kede wegaate mana, „Me kidi peu agijo ena ma beu, wanee owaa duba eewii mana juwa, wagii mana juwa ko,” wegai.

³²Tijake Agerippa kidda Pestus eteete mana, „Me kidi Kaisarja boko petaida ediimai beu naako, ejaikija,” etii.