Read Ekari KEI TITAIDO 27 Bible Online

KEI TITAIDO 27 - Ekari bible

KEI TITAIDO 27

¹Inii Italia komaiga uwii mana kodo okei duwajake, okei Paulus ma, joko ka egadimimakita bagee ma, serdado migougu me eka ki Julius kidiipa eekegajawii; okaija serdado kotuu ko Kaisarja.

²Inii Aderamitium ka kapal koma matakai; kii ke Asia dokoo gepe watija enaida todokii todokii taine. Inii matakijake uwii. Aristarkus inii ma enaimo, Makedonia dokoo, Tesalonika makijo ka me kidi.

³Aweetaa naago inii Sidon makijo todokii; Julius kidaa Paulus kojáá kojáá etai; okaija ogaaneepa edou uwe-tijake ejaikita, okei eedade-tijake.

⁴Kouda kodaa make uwijake inii Kiperus apagaatouga uwii, ukija te tuwamake kouja.

⁵Inii Kilikia ma, Pampilia ma, watija maikai adimakijake inii Likia dokoo Mira makijo dakii.

⁶Kouda kodaa serdado migougu me kidaa Iskandaria ka kapal koma domakai, Italia uwiine ka kodo, tijake nimatakijawii.

⁷Inii agapi ewaga ipeipe uwii, tijake gaagaa ma Kenidus kapauto kai; ukija niituwai kouja inii Kerete apagaatouga uwijake Salmone etigadokii.

⁸Gaagaa ma wokaato keetigo eka ko Enauto Iteida inii dakii tai, Lasea makijo kapauto.

⁹Inii ipeipe tijake komaiga uwija gaa ko peu kita, te nai dijo dou wagi ko muumai kouja. Okai kouja Paulus mana etii,

¹⁰eteete mana, „Meido, anija gai ko komaiga uwii ko peu, matakita agijoudo ma, kapal koma ma to ko beu kodeja, inii me kede maija,” etii.

¹¹Kodeja kapal ipuwe me ma, uwijawe-tai me ma mana kodo serdado migougu kidaa jajuwii, Paulusja mana ko beu.

¹²Iteida kodo oo uwa ma tou peu kouja, me wedaba ka gai ko, kouda kodaa make uwiine, Kerete ka iteida Penik kodaa oo uwa toune; Penik make ko amouwaato amo dou.

¹³Kojáá bou pupugu pupugu tijake, kou ubaate gajake, okei tito badijake Kerete gepe watijaiga uwii.

¹⁴Kodeja ibopo uwii beu gaa ukija ibo makiida make mijouwe kijake koma tapa wagigou, kigo dani.

¹⁵Ukija kodaa kapal koma dokijake inii ukija te tuwamake kouja inii jaikijake ukija ka nidokijake uwii to.

¹⁶Mijo makijo eka ko Kelauda apagaatouga nidokijake inii gaagaa ma mijo koma kodo wado gou.

¹⁷Wado gojake kapal koma bud aka bida bida tai; Sirtis maida gakowagidaa na kojoka weda gajake kagaba ma budaido ma mijouwe awijake ukija ka nidokina tita.

¹⁸Ukija ibo kodaa umina kiida kouda nidokina tijake aweetaa naago inii matakita agijoudo emigai.

¹⁹Widaago naago okei kede gane ka kapal koma ka edepedeija emigai.

²⁰Agapi ewaga meuka juwa, ijapu juwa, inii dou beu tijake, daana ukija peijo kodo umina nigigoo tijake te tuwamake kouja inii enaa kai dimi kodo wado gai beu.

²¹Uno ewaga meido kede nai beu kouja Paulus okei jupi joonidoke tijake eteete mana, „Meido, ikii najuwai naako enaa, Kerete make te uwijake peu kai na kojoka.

²²Kodeja ito kou maija ani kitiine, kegepa tipinimakai; me idaana ma te igaitage kouja, kodeja kapal koma kodo to.

²³Okai ipuwe naawita Ugatame kidi, ani migaakobe ete-tai kidi, jaetigo-tai me kidaa jukumaunu aneepa joonidoke tijake

²⁴eneete mana, ’Ei, Paulus, weda te gai; aki Kaisar jumaapa joonii beu kai peu; daana aki ma enaimo uweete bagee utoma Ugatameja kaneegi’, enipi kojoka.

²⁵Okai kouja, meido, kegepa tipinimakiwei; ani Ugatame maakodo egai kouja, okaija mijo enipi danite ewaa kaita kojoka.

²⁶Kodeja uwouja okogoonaida koma dokidoke taita,” etii.

²⁷Inii Aderia maikaida tadoke ko wii ma gaatijago uno kodo wane ejupi kodaa kapal kei te-tai bagee ka gai ko, inii maki kapauto keege, gai.

²⁸Okei tadi dojake uwo ebijadou mepiina; wo dani kijake kigeena ma tadi dojake idibi ma gaati dou.

²⁹Mogo tapa gakowagidaa tai na kojoka weda gajake epaato make tito wii wejawii, tijake awii kodo kogaa gai.

³⁰Kapal komaida kei te-tai bagee kede akaato pipikaaniine. Okei mijo koma kodo mijouwaawii, imaato make tito weine puga tijake.

³¹Tijake Paulus kidaa serdado migougu kidi ma, serdadoudo ma, eteete mana, „Kei bagee komaida te topai ko ikii petii te timake,” etii.

³²Tijake serdado kede mijo koma buda duwajake koma kodo jaikai.

³³Awiine jato okei naija agijo no-tijake Paulus jeu jeu etai, kei teete mana, „Ito kou wii ma gaatijago naago ikii doutou to tijake naidi tou, naija agijo nai beu tijake.

³⁴Okai kouja nai kidiimai, bida ke-tita; ikiija ka ijo epaana ma te igaipiga kojoka,” etii.

³⁵Okai kou mana etijake okai goti motii; okei utoma pekaida Ugatame nigajaweege etijake okai goti kodo utijake okai tiga oonai.

³⁶Tijake okei utoma kegepa tipinimakijake nai.

³⁷Inii komaida matakita bagee kede me ida muto wii wado benumi ma jokagaati.

³⁸Okei naija agijo mobu kijake okei koma kodo egaida awii, gandum maikai duba emigijake.

³⁹Awe digii kijake maki ko dojake kawo ka makijo kodo ewo. Kodeja í ma butu kitaida dojake kouda kodaa koma dokimakaine dimi gai.

⁴⁰Tito budaido duwakumijake maikai duba jaikai, etikai agijo buda maija ekegajake; tijake kagaba maida ukija pupugu tetijake epijajawijake i ma butu kitaida doodouga uwii.

⁴¹Kodeja waino akaaweida kijake koma kodo dokidoke. Imaato kodo dokidoke tijake begoo ma beu, tijake epaato ko ukija dokegaa ka gakumidaa.

⁴²Serdadoudo ka gai ko, egadimita bagee kede wagimakaine; me idaana taataa tijake igadoke tai na kojoka.

⁴³Kodeja serdado migougu kidi Paulus epipikajawiine tijake okeija gata dimi kodo beu etii. Okai mana etii, taataa epi bagee tiga makai duba mijootii tijake adaida adii.

⁴⁴Tijake jokokaido kede jaga maida ma, koma gakumidaa tita pija maida ma; okai kou dani tijake utoma kede adaida adimakai.