Read Ekari KEI TITAIDO 3 Bible Online

KEI TITAIDO 3 - Ekari bible

KEI TITAIDO 3

¹Peterus ma Jahja ma Ugatameja owaapa auwai, sembahjang tei tita gaa; kou ko meuka amouwe dagiida gaa.

²Me idaana pataida make bado ekogadaa tita kidi me ka edokimaki-toojogo; okei agapi gakita Ugatameja owaa damoutoopa etojawijake tai, kou ko Enauto ebatita damo kodoopa. Okai wadoujo keete bageepa agijo ediimei tita.

³Peterus ma Jahja ma Ugatameja owaa wadoujo aakaine gaa edojake okai agijo ediimai.

⁴Tijake Peterus Jahja ma enaimo edomakijake eteete mana, „Nidodou.”

⁵Etijake okai edomakai, okejaija ka aanaimai agijo motiipiga gajake.

⁶Kodeja Peterus eteete mana, „Mas mege perak mege aneepa beu. Kodeja aneepa topa agijo kanii. Kou ko, Nazaret ka me Jesus Keristus kidi eka dubaiga uwina ti,” etii.

⁷Tijake etikaato gane ejakijake ejoonijawii. Okai kou gaa kodo maija bado ma jekai mani ma bida kai.

⁸Okai wado joonidoke tijake uwina tai. Okejai wija ma enaimo Ugatameja owaa wadoujo kijake uwina ma, wado otii mijo otii ma tina, daana Ugatame muta etuwai ma.

⁹Okai uwina ma, Ugatame muta etuwai ma, teete meido utoma edou.

¹⁰Okai kii kidi ki Ugatameja owaa ka Enauto damoutoopa animakijake ediime-ediime tei tita kidi egajake, okai maida kei tita agijo okei apai umina tijake ego takuu takuu timakai.

¹¹Okai Peterus ma Jahja ma ejakimaki-toojogo, meido utoma tibigi eka ko Sulemanja akagauda kodaa okeepa kotuu timakai. Okei ego takuu takuu umina timakai.

¹²Kou kodo Peterus dojake meidoopa eteete mana, „Kowaa kei, Israil bagee, magijo ka ego takuu takuu teega, daana magijo ka nidootaa teete? kii me ki iniija bida ka juwa, iniija dijo do-tai ka juwa, ita uwina te-tita jakei tijaweege jaijo.

¹³Ibrahim ma, Isak ma, Jakub ma ka Ugatame, kii ko iniija aijaane muumaane ka kidi, jakei te-tai me Jesus kidi ajiipi etijawita. Ikiija eekegajake Pilatus jumaapa ekonita kidi, okai ejaikaine kodeja.

¹⁴Ikii ke jimubeu maakodo me kidi ekonijake, me wage-tai idaana ejaikaine ediimai.

¹⁵Tijake ajii tai bokouto duwa-tai me wagimakita. Kodeja Ugatameja bokata bagee jupi make eenigojawii. Okai kou mana kodo inii mana jawega-tai bagee kita.

¹⁶Okaija ekaidaiga kodo, okaija eka maakodo egajake no te, kii me kii ke ikii edou ma, epi ma, kidi bida keegi; kou ko, Jesus maakodo egajake kodo ikiija pekaida me kidi didi beu keegi.

¹⁷Daana ito ko, kowaa kei, noogeima, ani epi, ikii ewoudaiga kei teetega, ikiija pika-tai bagee maija.

¹⁸Kodeja Ugatameja mana wude-tai ka ebeidaiga wegata mana, kou ko okaija Keristus kidi didi gaduwai mana kodo, okai kou dani kobadoke tita.

¹⁹Okai kouja ikii gaagaa tiga tijake tedemai, ikiija peu kodo kijawunakume-tita.

²⁰Tuhan jumaapa make ideide wagi ewaa ke-tita kojoka. Tijake tika kodaa kijatogijawita Keristus Jesus kidi kijaebadikume-tita.

²¹Okai ki epaawado kodaa wado ebuki-motii beu kai peu, utoma agijo utoma boko duwajawiitaida to. Ugatameja tika kodaa make jimubeu mana wudei tita bagee utoma ka ebeidaiga wegata danite.

²²Musa kii dani wegata: Ikiija Tuhan Ugatame kidaa ikiija keneka bagee jupi make mana wude-tai me idaana ewaa awiitagi, ani ewaa naawita danite. Okaija kitiitagi mana utoma ikii ejuwaita.

²³Me gakita meija kii mana wude-tai kidi te ejuwipi, me jupi make peu kaitagi.

²⁴Daana mana wude-tai utoma, kii kidi Semuil ookajake nemouga meta kede maija, kou ko mana wudita bagee utoma, okei ito kii wagi kidi maida make mana wegata.

²⁵Ikii ke mana wude-tai kede jokaaneido, daana Ugatame ikiija aijaane muumaaneepa jatogijawita mana kodo ikiija gowaja; okai Ibrahimpa etita kodo, ’Akija kebaitage ijoudaiga makiida ka tuma tumaija mobu kaitai’ mana kodo.

²⁶Ugatame kidaa jakei te-tai kidi ewaa awijake ikeepa tiga kijaebadikumita, enaa keewe-tita; ikii me gakita peu maida make akabetoke kitijawijake.”