Read Ekari KEI TITAIDO 4 Bible Online

KEI TITAIDO 4 - Ekari bible

KEI TITAIDO 4

¹Okejai wija meidoopa mana aawegaatigo gaa, imam bagee ma, Ugatameja owaa douto-tai ibo ma, Saduki bagee ma mei.

²Okei nokii egai, okejai meido aetopai kouja, daana Jesus duba bokata bagee anigoja mana aeti-menai kouja.

³Okei eti-awitaija kede ejakimakijake uwaataa kijake kouja aweetaa naagouda to amoujo eewii.

⁴Kodeja kou mana juwita bagee wedaba maakodo gai. Tijake jameido to gaki-toojogo muto muto to muto abuma maija.[2]

⁵Aweetaa naago ko pika-tai bagee ma, me iboudo ma, kapogeije epi bagee ma, Jerusalim kotuu timakai.

⁶Ibo Imam Hannas kidi ma, Kajafas ma, Jahja ma, Iskandar ma, daana Ibo Imam uguwo ka bagee utoma toojogo.

⁷Eti-awitaija jupiida kodaa ejoonijawijake egaado teete mana, „Má bidaidaiga juwa, meija ekaidaiga juwa, kou agijo aakei teetega?” etii.

⁸Tijake Peterus Rohulkudus ka ebetume tita kidaa eteete mana, „Kowaa kei, pika-tai bagee, daana me iboudo ma,

⁹kou danite ito kii naago ki enaa agijo didi me idaana maida kei tita, daana kawe dani tijake beu jaawita, ikii nigaado ti-toojogo,

¹⁰gai, ikii utoma, daana Israil bagee utoma; Nazaret ka me Jesus Keristus ekaidaiga, ikiija pija boko maida edajawijake Ugatameja bokata bagee jupi make eenigojawita kidi, okai kii kidiidaiga kii me kidi ikii jumaapa beu kidoke tijake jooneegi.

¹¹Kou dou mogo kodo ikii migeete bagee ka jamo jaikijake owaa butu ka kabo mogo pigu tidoke tita.

¹²Daana ajii tai kodo me idaana duba beu; makiida kiija joko ka eka ena ma ebatai beu tita, ajii nitijawija ka kodo.

¹³Peterus ma Jahja ma uu peu kidi meido edojake, daana okejai atopai beu kodeja utoopa bagee to egajake, okei utoma eepai. Okejai Jesus ma enaimo tota bagee kede okei wado egai.

¹⁴Kodeja beu jaawita me okei watija jooni-toojogo edojake, akaije te ootimake kouja mana tagu tidaa

¹⁵Okejai wija pika-tai jumaapa make epodomijawijake okei kede

¹⁶wegaate mana, „Kei wija kei maida inii magijo kei etai? Ibo dou beu agijo okejaija kei aateetegai kodo Jerusalim maki utoma ugo uwidoke, daana inii beu puga te timake.

¹⁷Kodeja me jupi mana kodo geka te duwa-tita kojoka, kii ekaidaiga meidoopa mana te wega-tijake inii bida peu kidi neetimakiwei.”

¹⁸Okai kouja okei Peterus ma Jahja ma manaa-tijake Jesus ekaidaiga mana wegai juwa, etopai juwa, umina te te-tijake bida peu kidi etimakai.

¹⁹Kodeja Peterus ma Jahja ma aeteete mana, „Ikii kede gai, Ugatame pekaida ikii kijuwai ko enaa, mee? Ugatame ejuwai ko enaa.

²⁰Inii ke dou ma juwii ma tita agijo wegai to te duwamake kouja,” etii.

²¹Okei wedaago etijake ejaikai, peepu etijawii mana jadomakai beu kouja, okei meido weda egajake. Me utoma kede kei tita agijo kodo maida make Ugatame muta etuwai kouja.

²²Dou beu agijo ka didi beu jaawita me kidi ki epajake ko taun mepiija wado umita kouja.

²³Ejaikijake okejai ogaaneepa auwijake, imam iboudo ma, me iboudo ma, ka etita mana kodo aeti-menai.

²⁴Okei kou mana juwijake enaimo Ugatameepa mana godajake eteete mana, „E ugai te ugai ugajawita Me; epa ma, maki ma, maikai ma, kou duba ka topai aagijo taagijo maija ugajawita Me,

²⁵iniija aija Daud, kakei te-tai kidaa ebeidaiga Rohulkudus ka kii dani wegai: Magijo ka ojaa bagee wainai, Daana meido kodo epa beu dimi wado gai?

²⁶Makiida ka jakimake-tai bagee joonidaa tijake Pika-tai bagee kotuu timakai, Tuhan akaije ootaine tijake, Daana okaija Keristus kidi maija.

²⁷Maakidi kii makiida kiija jimubeu kakei te-tai Jesus kidi, akija ewitokita Me kidi, akaije oote-tijake okei kotuu timakai. Kii ke Herodes ma, Pontius Pilatus ma; okei ojaa bagee ma, Israil bagee ma enaimo.

²⁸Aki tika kodaa tota dimiidaiga akija gane ka boko duwajawita mana kodo kei te-tita.

²⁹Okai kouja, ito kou, ei, Tuhan, okeija ka emoge mana ejuwijake kakei te-tai kede uu peu kidi mana kaawega-tijake niimijawii.

³⁰Akija gane mapido tijawii, meido didi beu jaawe-tijake. Daana jimubeu kakei te-tai Jesus kidi eka dubaiga dou beu agijo ma, ego takuu takuu agijo ma, ewaa awii.”

³¹Okei sembahjang timakijake okeija kotuu titaida kodo pigi pigi tai. Okei utoma Rohulkudus ka ebetume tidaa tijake Ugatameja mana kodo uu peu kidi wegai.

³²Maakodo gai bagee ena dimi ena kegepa tijawijake, me idaana ma beu okai maida ka agijo okai ipuwe to tijawii. Kodeja aagijo taagijo utoma ipuwe.

³³Eti-awitaido umina bida peu kidi Tuhan Jesus anigota mana kodo jawega-tai, daana okei maida jikoo bokouto abuma kidaa tai.

³⁴Okei jupi agijo beu me idaana ma beu. Okeija ka maki juwa, owaa juwa, kaa tijake mege jato ko doke-mei.

³⁵Tijake eti-awitaido jumaapa menijawii. Tijake agijo beu dani bageepa jawudii.

³⁶Kou dani maija Jusuf, eti-awitaido ka eka Barnabas eebatijawita kidi, (kii ke, Agaagi Joka); okai Lewi epaida ka Kiperus makijo ka me;

³⁷okai ipuwe mude kato kaa tijake mege jato ko eti-awitaido jumaapa menigou.