Read Ekari KEI TITAIDO 7 Bible Online

KEI TITAIDO 7 - Ekari bible

KEI TITAIDO 7

²Etijake Stepanus wo eteete mana, „Noogeima, daana naitaima, juwidowei. Ajiipi bokouto jago Ugatame kidaa iniija aija Ibrahimpa ewaa kita, okai Mesopotami tota gaa, okai Haran makijo umi-tou beu gaa.

³Daana eteete mana, ’Akija makiida make ma, aki tumaapa make ma, podomijake ani kamuwakaitaida uwii,’ etita.

⁴Tijake okai Kasdim bagee ka makijo make podomijake Haran makijo umi-tou. Nakame bokajake wadouto, Ugatameja kouda kodaa make oopodomijake, ito ikii topa makiida kiija oomei.

⁵Kodeja okai kouda kodaa imo to tou maki menii beu, bado komo kato ma beu. Kodeja okai ipuwe ke-tijake jatogijawita, okai ma ekebaitagi ijoo maija kii kidi mijo motii motii. Okai kou gaa kodo joka makii beu gaa kodeja.

⁶Daana Ugatameja kii dani etita: Okaija ekebaitagi bagee ojaa bagee ka makiida duwa jaweida tojake edaimimakai ma, peepu etai ma, taun muto benumi ma mepiija ma tou.

⁷Kodeja edaimijawita tuma ani peepu etijawiita, Ugatameja mana, daana nemouga okei podomijake kiida kiija make migaakobe nataitai.

⁸Tijake iniitodo duwa-tai mana menita. Kou dani tijake Ibrahimja Isak ekebajawijake waguwaago naagouda iniitodo duwata. Daana Isakja Jakub ekebajawijake, Jakubja me epa wija ma gaati kei ekebajawita.

⁹Tijake iniija aijaane kede Jusuf kumi egajake Masir makijo mijo kaa etita. Kodeja Ugatame okai ma enaimo,

¹⁰tijake okaija gaduwagoo manaido maida make epipikajawii. Masir makijo jakimakita me Piraon kidi pekaida Ugatameja dimi boko menii, daana Piraonja juma dege dege ete-tijake etijawii. Tijake Piraonja Masir makiida okai to etido-tai me ejaikita, okaija uguwo maija mana ete-tijake.

¹¹Naidi uwa Masir ma Kanaan ma makijo potu tijake gaduwagoo umina. Tijake iniija aijaane naija agijo domakai beu tita.

¹²Kodeja Masir makiida naija agijo topai mana Jakub juwijake, iniija aijaane edoga kidi ebadikumita.

¹³Wijaago ita uwijake Jusuf okaija kenekaaneepa akaato epi eewita, tijake Jusuf tuma Piraon epi kita.

¹⁴Tijake Jusuf ebadikumijake nakame Jakub ma, okaija uguupuguu ma, ebukai. Kou ko me mutoona wado idibi ma gaati mijo daime.

¹⁵Tijake Jakub Masir jamo uwii. Kou wadouto okai ma, iniija aijaane ma bokajake

¹⁶má jato Sikem makijoopa wado edokijake Ibrahimja edata me oka duba emakigou; Emor jokaane, Sikem makiida, mege menita bagee ka makiida.

¹⁷Kodeja togijawita putu kapa kijake, Ugatameja Ibrahimpa etita mana kodo, Masir makiida meido kede umina kebadaa tita.

¹⁸Tijake Masir makiida joko ka jakimake-tai me, Jusuf ewo me kidi ewaa kai.

¹⁹Kii jakimake-tai kidaa iniija tuma utoopa go-jikii tijake peepu umina etita. Okeija jokaane wagimige-tijake etimakita.

²⁰Okai kou gaa kodo Musa pajake, edou ko enauto joka. Agoo wido nakame ka owaa duba emunita.

²¹Tijake emigimakijake Piraonja jagamo joka kodaa ebukijake okaija joka dani etijawijake emunai.

²²Masir bagee ka dimi boko mana utoma Musa topimakijake okaija kei tai agijo ma, mana muto ma, bida.

²³Taun mepiija umimakijake okaija kenekaane Israil bagee kede edou uwiine tijake kegepa gokoo tai.

²⁴Me idaana peepu eteetigo edojake peepu etita me kidi eedadijake abu japaine tijake Masir ka me kidi jawagimakai.

²⁵Musaja gai ko, anija gane ka Ugatameja epipikajawiine ani kenekaane gajake, kodeja okei gamakai beu.

²⁶Aweetaa naago kijake me akawage teetigo gaa mei. Tijake dagi jaduwaine tijake eteete mana, ’Kowaa kei, ikai enakeneka. Magijo ka ikai kede peepu akaate teete?’ etii.

²⁷Kodeja ogeme akaije ooteete kidaa ebakijake eteete mana, ’Meija ibo kajaikijake boko nijapeta-tai kajaikipi?

²⁸Nagiine, mee? geto Masir ka me kidi wageetege danite,’ etii.

²⁹Okai kou mana kodo Musa juwijake okai okii, tijake Midian makijo umii. Kouda kodaa jame joka wija makijawii.

³⁰Taun mepiija umijake gei tapa Torsina bago watija jaetigotai me okaapa ewaa kai, dogo okogo bodija wii teete duba.

³¹Kou kodo Musa dojake okai dota agijo kodo ego takuu takuu. Domakaine tijake kou kapauto kijake, Tuhanja mana wuu ejuwai, eteete mana,

³²’Ani ki aki aijaane ka Ugatame kidi. Kii ke Ibrahim ma, Isak ma, Jakub ma ka.’ Etijake Musa weda totome tijake wado dou weda gai.

³³Tijake Tuhan eteete mana, ’Akija bado awii widamakai, aki joonipeida dáida kojoka.

³⁴Anija nakei te-tai bagee kede Masir makiida peepu etita ani edoomega, daana okeija jiijii ani ejuwijake epipikajawiine mijo meega. Okai kouja, uwidodou, ani Masir makiida kabadikumii,’ etii.

³⁵Kii Musa kidi okeija ka ekonita kidi, eteete mana, ’Meija ibo kajaikijake boko nijapeta-tai kajaikipi?’ Kii kidi Ugatameja migougu jamakijake epipikajawiine ebadikumii, okogo duba okaapa ewaa kita jaetigo-tai me ka eedadijake.

³⁶Okai oopodomai, ego takuu takuu agijoudo ma, dou beu agijoudo ma kei tijake. Masir makiida ma, Dege Maikaidaapa ma, gei tapa ma, taun mepiija kei tigoo tita.

³⁷Kii ka Musa kidi ki, Israilpa etita me kidi, ’Ugatameja ikii keneka bagee jupi mana wude-tai idaana ewaa awiitagi, ani ewaa naawita danite.’

³⁸Kii kidi ki gei tapa kotuu timakitaidaapa, Torsina bagouda ka okaapa oowegata jaetigo-tai me ma enaimo tou, daana iniija aijaane ma enaimo. Daana ajii mana ineepa mijo nijamaketijake jakimakita.

³⁹Kodeja iniija aijaane ejuwai beu tijake ekonai. Daana dimi mana Masir maida to tadu atii.

⁴⁰Tijake Harunpa eteete mana, ’Migaakobe etai agijo nijaebijai, inii migougu nijamakii kidi. Kii Musa kidi Masir make nipodomijawita kidi, okai kaija keegi juwa inii ewo,’ etii.

⁴¹Okai kou wagi kodo okei sapi joka ebijajake, migaakobe etai kidi jou agijo menii, daana okeija gane ka kei tita agijo maida ideide umina tai.

⁴²Kodeja Ugatame wouga kijake, okei epa maida ka topaido migaakobe ete-tijake ejaikai; mana wude-tai kapogeije duba ebijamakita danite: Kowaa kei, Israil uguupuguu, Taun mepiija gei tapa ogo duwajake Jo-naimija agijo jo-naimai, mee?

⁴³Ikii Moloch kagaba owaa jakimakijake Ikiija ka migaakobe te-tai Rempan ijapu, Daana ikiija migaakobe etaine kei tita kodo. Okai kouja ani Babil makiida wo kijaikaita.

⁴⁴Mana muto maida make kagaba owaa iniija aijaaneepa gei tapa tota, Musa ma oowegata kidaa ebija-tijake etimakita danite, ebijaabija dota kodo danite.

⁴⁵Inii aijaane maija kagaba owaa motita kede ke, Jusak ma enaimo mejawita, ojaa bageido jajinita gaa, Ugatameja inii aijaane jumaapa make ebakikumita bagee kede. Kii kidi Daudja tota wagiida to.

⁴⁶Kii kidi Ugatameja juma dege dege etijake, okai Jakubja Ugatame owaa jamigiine ediimai.

⁴⁷Kodeja Suleman kidaa owaa jamigita.

⁴⁸Okai kou kodeja monika me kidi gane ka migita owaa duba te toja. Mana wudei tita me kidaa wegata danite:

⁴⁹Epaawado ko anija jegeenaka animakaida, Daana makiida ko bado mijo makijawiida. Kawe dani tita owaa naamigiine? Tuhanja mana. Juwa, kawouda kouja ani mobu kijaida?

⁵⁰Beu, mee? anija gane ka utoma agijo utoma kei tita.

⁵¹Kowaa kei, geeta bida bagee, kegepa ma gapa ma dijo dou beu bagee; ikii umina Rohulkudus akaije oote-tai. Ikiija aijaane ka kei tei tita dani, ikii na kei teiga.

⁵²Kawi ka ki wude-tai ki ikiija aijaane ka peepu etai beu tita? Daana maakodo bokouto jago meitagi kidi tika kodaa jawegata bagee kede okei wagimakai. Ito ikiija eekegajake wagimakeetega kidi.

⁵³Ikii ke dijo douja mana jaetigo-tai bagee ka kinijake gomotii kodeja dijo dou beu.”

⁵⁴Kou manaido juwijake okei kegepa ejajake ego akatakime tijawii.

⁵⁵Kodeja Stepanus Rohulkudus ka ebetume tita kidi epa maida wado domakijake Ugatameja ajiipi domakai; daana Jesus Ugatameja etikaato gebo jooni-toojogo.

⁵⁶Tijake eteete mana, „Dodowei, epa damo kebadoke dooga, daana Me Joka kidi Ugatameja etikaato gebo jooni-topi,” etii.

⁵⁷Kodeja okei kuutakaa umina emeeme tijake gapa takimijake enaimo okogoka etai.

⁵⁸Maki okogoopa make eemigimakijake mogo ka wagigoo. Dota bagee kede okeija kagaba kodo jokaagaa idaana eka ki Saul kidaa badoopa makii.

⁵⁹Okei Stepanus mogo ka wagigoo, okai sembahjang teetigo gaa, kei teete mana, „Ei, Tuhan Jesus, anija dimi mana namotii.”

⁶⁰Okai bado donimakijake kuutakaa emeeme teete mana, „Ei, Tuhan, kii peu kidi te jadokijawii,” etijake okai bokai.