Read Ekari RUM 10 Bible Online

RUM 10 - Ekari bible

RUM 10

¹Ei, noogeimaido, anija kegepa duba didi gajake Ugatameepa ediimeete mana ko, Israil bagee ajii te-tita.

²Anija jawegai mana ko, okei Ugatame juma doodoo kodeja ewoudaiga.

³Ugatame epauto ka maakodo bokouto kodo okei ewo gajake ko, daana okei kede maakodo bokouto duwajawiine tijake ko, Ugatameja maakodo bokouto kodo okei ejuwidoke ko beu.

⁴Keristus kidi Musaja dijo douja mana kodo ewogijawii kouja, maakodo egai bagee utoma maa egajawe-tijake.

⁵Musaja ebijata mana ko, Dijo douja manaidaiga maakodo bokouto ekowamakai bagee kede okai koudaiga ajii tai.

⁶Kodeja maakodo gajake epauto ka maakodo bokouto kodaa kii dani mana: Akija kegepa duba kii dani dimi te gai: „Meime epaawado wadouwe kaitagi?” (Keristus kidi mijo emejawiine tijake no te.)

⁷Juwa, „Meime mijouto mijo uwiitagi?” (Keristus kidi bokata bagee jupi make wado emejawiine tijake ko.)

⁸Kodeja má mana ko? Mana kodo aki kapauto, aki ebeida kodaa, daana akija kegepa duba. Kou ko, maakodo gai mana kodo, inii wegaige ka mana kodo.

⁹Jesus kidi ki e boko te boko duwa-tai me kidi mana kodo aki ebe ka godape ko, daana bokata bagee jupi make Ugatame eenigojawita mana kodo aki kegepa duba epaapa timakipe ko, aki ajii taitage.

¹⁰Me ka kegepa duba maakodo gajake maa egajawita kouja, daana ebe ka godajake ajii tai.

¹¹Ugata mana kodaa wegata kouja: Maakodo egai bagee meena ma ego gai beu.

¹²Kii ke Jahudi, kii ke Gerika, mana kodo te wegai kouja. Ena ka Tuhan kidaa okei utoma boko jaduwajawii kouja, daana okaapa manaa-tai bagee utoma maida jikoo me kidi.

¹³Tuhanja eka manaa-tai bagee me gakita ajii taitai kouja.

¹⁴Kawe dani tijake okeija maakodo egai beu me kidi manaatija? Daana okai maida make mana juwii beu tijake kawe dani tijake maakodo egaja? Daana mana wudii me beu ki-toojogo ko, kawe dani tijake juwija?

¹⁵Daana ebadikumii beu ki-toojogo ko kawe dani tijake mana wudii? Mana ebijamakita kodo danite: Enawana no! enaa mana wegaate bagee ka bado kodo.

¹⁶Kodeja okei utoma ajii mana kodo jakimakai beu tita Jesaja kou dani mana wegata kouja: Ei, Tuhan, meime iniija wudita mana kodo maakodo nigata?

¹⁷Kojoka maakodo gai kodo epauto ko juwita mana kodo, daana juwija mana kou ko Keristusja mana kodo.

¹⁸Kodeja anija egaado tai ko: Okei juwii beu, mee? Maakidi, okei juwita. Mana wuu kodo uwoje makije wudigi tikumita, Daana mana muto kodo maki momogiida to.

¹⁹Kodeja ani kigeena ma egaado tai ko: Israil kede gamakai beu, mee? Edoga Musaja wegata mana ko: Beu bagee maida make digi kijadokijawii. Daana dimi beu bagee ka emogaago kitijawiita.

²⁰Tijake Jesaja uu peu kidi wegata mana ko: Naubai beu bagee kedaa nadomakai, Daana natido beu bageepa ani akaato emuwakai.

²¹Kodeja Israil maida make okaija wegata mana ko: Agapi woja kodo te juwe ma, akaije ma bageepa Anija gane wo kagajawii.