Read Ekari RUM 12 Bible Online

RUM 12 - Ekari bible

RUM 12

¹Ugatameja ipa bokouto maida make ani kidiimai, ei, noogeimaido, ikiija ma jato ija kodo Ugatameepa ekega-menii, jimubeu kidi Ugatameja juma dege-dege kitija ka, ikiija ka dijo douja mana kodo.

²Kii makiida ka ijee te jaepei, kodeja dimi kodo ija awijake akaabetoke tijawii, ikii Ugatameja dimi kodo gamake-tita, enaa ma, juma dege-dege tija ma, boko duwajake ma.

³Ugatameja jikoo bokouto naduwajawita maida make kouja, ikii jupi ka me gakita ani kiti-kinii: Akaato gaja dimi kodo wado etige te tai, kodeja pidou pidou kidi gai, Ugatameja me gakita maakodo gai kodo jawudijawita utuutu to.

⁴Inii má maida tine wedaba, daana tineido wedaba kodeja kei tai agijo ko ena kidi beu.

⁵Okai kou dani maija inii wedaba kede Keristus duba má ena to, daana me gakita iniija ka tineija.

⁶Ugatameja jikoo bokouto nijaduwajawijake niimijawita manaido kodo kato kato kouja, gokobaki tijawiidaiga wegai keetigo ko, maakodo gai kodo ma utuutu tai;

⁷me eedade-tai keetigo ko, eedadai manaidaiga wo kei tai; etope-tai keetigo ko, etopija manaidaiga wo kei tai;

⁸mabiki etai keetigo ko, okai kou kodo; meni-toojogo ko, bunu enaidaiga; boko duwajawii me kidi ekowa-motijakeidaiga; ipa emuwaki-toojogo ideideidaiga.

⁹Ipa kou ko doodoo awii. Peu agijo be gai; enaa agijo bida peu jakimakai.

¹⁰Enakeneka bagee ipa manaida kojaa-kojaa akaate tai; ibo akajaiki-tai.

¹¹Ekowaja agijo ena peu te kai; kegepa kodo ena enaa awijake Tuhan jakei tai.

¹²Kotopijawita dimiidaiga ideide tai; gaagaa duba kegepa animakai; sembahjang ko bo wemakai.

¹³Jimubeu bagee kede gai peu agijoudo eedadai; ideide ma oumidokii.

¹⁴Peepu kitai bagee ke mobu bokouto jaediimai; mobu bokouto jaediimijake peu kugouto te jadokijawii.

¹⁵Ideide teete bagee kede ideide ootai; jege teete bagee kede jege ootai.

¹⁶Ikii kede ena dimi kepajawii. Ibo dimi te gai, kodeja mijo manaida juwidoke tai. Ibo puga te tai.

¹⁷Peu agijo meena ma abu te japai. Me utoma pekaida enaa agijo to juma doodoo tai.

¹⁸Ikii jatouga ko, kei timake keetigo, utoma bagee ma muka-muka akaate tai.

¹⁹Ei, noogei dideemaido, ikii kedaa akaato abu te pai, kodeja Ugatameja emoge maida make jajaikai; kapogeije ebijamakita kouja: Abu pai kodo ani ipuwe; ani abu paita, Tuhanja mana.

²⁰Aki ma jape me kidi naidi tipi, naija agijo menii; Okai uwo jowee kipi, uwo no-menii. Kou kei tijake ko bodija poké nota wado kotuu atii dani bukaa.

²¹Peu kodaa daba te kajaikai, kodeja enaa agijo ka peu kodo daba ejaikai.