Read Ekari RUM 3 Bible Online

RUM 3 - Ekari bible

RUM 3

¹Keetigo ko Jahudi ko má epaago? Iniitodo duwai ko má epaago?

²Kii takaa kou takaa epaago umina. Epauto ko, Ugatameja mana kodo okei maida jadokijawita kouja.

³Me ino dani maakodo gai beu ki-toojogo ko kawe dani? Okeija ka maakodo gai beu kodaa Ugatameja enanauto kodo beu jaawii, mee?

⁴Umina ko beu! Ugatame kidi maakodo bokouto kodo, me utoma puja keetigo maija, kapogeije ebijamakita kodo danite: Aki ki maakidi, akija mana kodaa ewaida ke-tita, Daana me ka kawidogi-toojogo aki petee ke-tita.

⁵Iniija ka peu kodaa Ugatameja enanauto bokouto kodo ewaida awi-toojogo ko kawe dani? Ugatame emoge nigai ko peu, mee? (Ani me ka wegai kodo danite wegai.)

⁶Umina ko beu! Kou dani naako, Ugatameja kawe dani tijake makiida maki utoma boko japetai?

⁷Anija puja maida make kouja Ugatameja maakodo bokouto ko ugo uweuwe ti-toojogo ko, magijo taine tijake ani peu me kidi danite peu naawii?

⁸Daana enaa agijo ewaa ke-tita magijo ka peu te kei tija? — me ka puja nijakubajake inii kou dani etopai wegaigai. Okei peu kai ko enaa.

⁹Kojoka kawe dani? Inii Jahudi bagee kede wo etige, mee? Umina ko beu! Utoma bagee, Jahudi beu, Gerika beu, peu duba tagi atita mana jukuma wegaaga.

¹⁰Kapogeije ebijamakita danite: Meena ma enaa beu; maakidi, ena ma beu.

¹¹Meena ma gamakai beu, meena ma Ugatame eubai beu.

¹²Okei utoma wo keenidaa; okei utoma wogidaa. Ena ma enaa agijo kei tai beu; maakidi, ena ma beu.

¹³Okeija magaka ko me oka kebadoke; Okeija eta kodaa me puja eukai; Tebé odijo okeija puko maida;

¹⁴Okeija ebe ko kego ma, boko ma ebetume;

¹⁵Me ka emo uwijawiine tijake bado ko tibigi;

¹⁶Okeija ka ita takaija peu kai ma, gaagaa ma;

¹⁷Okei muka-muka ka takaa kodo ewo.

¹⁸Ugatame weda egai dimi kodo okei jumaapa beu.

¹⁹Inii epi Musaja dijo douja mana kodo dijo douja mana maida ka bageepa etita; me gakita mana tagu eewe-tita, tijake makiida maki utoma Ugatameja boko petajaida kai.

²⁰Okai kouja Musaja dijo douja manaido dijo dojaida kodaa me idaana ma maa eewii beu; dijo douja manaida kodaa peu agijo ewaida awii kouja.

²¹Kodeja ito kou Ugatameja maakodo bokouto kodo ewaida awita, Musaja dijo douja mana maida tawadoke tita beu; dijo douja mana kodaa ma, gokobaki tijawiidaiga wegai tita bagee ka ma mana jawegata.

²²Kou ko Ugatameja maakodo bokouto kodo maakodo gai manaida, Jesus Keristus maakodo egai bagee utoma ipuwe. Me ewitokai ma ko beu kouja.

²³Me utoma peu kei tijake Ugatameja ajiipi bokouto maida make jamo togaa tita kouja.

²⁴Tijake jikoo bokouto kodaa ojaa kodo maa egajawita, Keristus Jesus kidaa pipikajawii manaidaiga.

²⁵Ugatameja ewaa awijake dagi duwa-tijake, okaija emo kodo maakodo gaidaiga jakimakija. Kou dani tijake Ugatameja maakodo bokouto kodo emuwakai, okai kegepa mijaanimakijake tika ka peu kei titaido aadaba etijawita kouja;

²⁶tijake ito kii wagiida okaija maakodo bokouto emuwakaine, kou ko, okai kidi maakodo bokouto kodo, daana Jesus maakodo egai bagee kede maa egajawii.

²⁷Kou dani keetigo ko, kobidoke mana ko kaija? Kou ko jamo jaikita. Kawo kou manaida make ko? Musaja dijo douja mana maida make ko, mee? Beu, kodeja maakodo gai manaida kodaa.

²⁸Okai kouja inii gai, me maakodo gajake maa egajawita, dijo douja manaida ko beu.

²⁹Ugatame kidi Jahudi ipuwe to, mee? Ugatame kidi ojaa bagee ipuwe maija. Maakidi, ojaa bagee ipuwe maija.

³⁰Ugatame kidi ena to kouja, iniitodo duwata bagee kede maakodo gai kouja maa egajawii, daana iniitodo duwai beu bagee kede maija maakodo gai maida make ko.

³¹Kou dani tijake inii maakodo gai maida make ko dijo douja mana kodo jamo jaikai, mee? Umina ko beu! Inii dijo douja mana kodo pigu atii.