Read Ekari RUM 4 Bible Online

RUM 4 - Ekari bible

RUM 4

¹Inii Ibrahim maida make má mana wegai? me má jatouga iniija aijame kidi.

²Ibrahim kidi kei tita agijo maida make maa eewi-toojogo ko, okai kobidoke tai enaa, kodeja Ugatame pekaida ko beu.

³Ugata mana ko má mana? Ibrahim kidi Ugatame maakodo egata, tijake maakodo bokouto kodo jagajawita.

⁴Kei te-tai me kidaa ageja kou ko ojaa menii ko beu, kodeja abu japai.

⁵Kodeja kei tai beu tijake peu bagee kede maa egajawe-tai me kidi maakodo egajake ko, okaija maakodo gai kodo maakodo bokouto jagajawii.

⁶Kou dani kei tai agijo beuda Ugatameja maa egajawita me kidi Daud maija mobu bokouto jaduwajawii:

⁷Ideide no! Peudo ipa ejaikita me kidi, Daana peu kei titaido jaapumijawita.

⁸Ideide no! Tuhanja peu egai beu me kidi.

⁹Kou ideide mana kou ko iniitodo duwata bagee ipuwe to, mee? iniitodo duwai beu bagee maija, Ibrahimja maakodo gai kodo maakodo bokouto jagajawita inii wegaage kouja.

¹⁰Kawe dani tijake jagajawita? Okai iniitodo duwajake, mee? iniitodo duwai beu gaa kodo. Iniitodo duwajake ko beu, kodeja iniitodo duwai beu gaa kodaa.

¹¹Tijake iniitodo duwata kou ko, maakodo gajake ka maakodo bokouto kodo tegee edou, okai iniitodo duwai beu gaa ka maakodo gai kodo. Kou dani tijake maakodo gai bagee kede nakame kita, okei iniitodo duwai beu ki-toojogo maija, maakodo bokouto kodo jagajawe-tijake ko.

¹²Dedaana iniitodo duwai bagee kede nakame kidi maija, kou ko iniitodo duwata kodo to ko beu, kodeja iniitai Ibrahim kidi maakodo gai komouga eepei kodo, okai iniitodo duwai beu gaa ka maakodo gai kodo.

¹³Ibrahim ma, okaija ijoo ma, makiida maki utoma gowajawii mana jatogijawita kou ko, dijo douja manaidaiga ko beu, kodeja maakodo gajake ka maakodo bokoutoudaiga kodo.

¹⁴Dijo douja mana kodo dijo do-tai bagee kede gowai naako, maakodo gai kou ko epa beu kijake togijawita mana kodo wogidaa ti-toja.

¹⁵Dijo douja mana kodaa emoge mejawii kouja; kodeja dijo douja mana beuda kodaa, dijo beebu na beu.

¹⁶Okai kouja gowajawii kou ko maakodo gai maida kabo makijawita, jikoo bokouto maida kodaa, okaija mijo ekebata bagee utoma kedeepa togijawita mana kodo epaapa jatimaketita, dijo douja mana jago bagee kedeepa to ko beu, kodeja maakodo gai bageepa, Ibrahim kidi danite, inii utoma iniitai kidi.

¹⁷Kapogeije ebijamakita kodo danite: Tuma ewaga nakame kajaikita. Maakodo egata me kidi jumaapa, bokata bagee eenigojawe-tai kidi, daana beu agijo kodo tota dani tijawii.

¹⁸Dimi kotopijawii peu kijake okai maakodo gaidaiga dimi kotopijawii, okai tuma wedaba nakame kaitagi mana kodo, mana etita kodo danite: Akija kebaitage ijoo kodo kou dani taitai.

¹⁹Okai taun mepiija ka wija dani umita me kidi akaato bokata danite gai kodeja maakodo gai ko kogaagije beu; daana Sarah maija pija kita kodeja

²⁰okai Ugatameja jatogijawita mana kodo ga-tojake dimi takaida beu, kodeja maakodo gai ko bida kijake Ugatame muta etuwai.

²¹Ugatame jatogijawita mana kodo kei te-tijake bida jago kidi umina epaapa timakijake.

²²Okai kouja okaija ka maakodo gai kodo maakodo bokouto jagajawita.

²³Kodeja „jagajawita” mana kou ko okai maida make to jaebijai ko beu,

²⁴kodeja inii maida make maija. Inii maija nigajawii, iniija Tuhan Jesus bokata bagee jupi make eenigojawita me kidi maakodo egata bagee kede.

²⁵Iniija peudo maida make eekegajawita me, daana maa neewe-tijake eenigojawita.