Read Ekari RUM 6 Bible Online

RUM 6 - Ekari bible

RUM 6

¹Kou dani keetigo ko, inii kawe dani mana wegai? Jikoo bokouto kodo abuma kidaa te-tijake inii peu kei te-wo, mee?

²Umina ko beu! Kawe dani tijake inii peu maida make bokata bagee kede kou dubaiga ume-wo tija?

³Ikii ewo, mee? inii Keristus duba baptis nitita daniija kede okaija bokata mana dubaiga baptis nitita.

⁴Baptis tai manaidaiga inii bokai duba okai ma enaimo oka nimakita; Keristus kidi Ugatameja ajiipi bokouto ka bokata bagee jupi make eenigojawita kodo danite, inii maija ija ka ijeidaiga ume-wo te-tita.

⁵Inii okaija bokata manaidaiga okai ma enaimo akagadime ti-toojogo ko, okaija anigou manaidaiga maija okai ma enaimo akagadime.

⁶Inii epi iniija ka tika ka ijee kodo okai ma enaimo pija boko maida edajawita, peu kei te-tai ijee kodo beu ke-tita, tijake peu kodaa inii maida petee te ke-tijake.

⁷Bokata me kidi peu kei tai maida make pipikadoke tita kouja.

⁸Kodeja inii Keristus ma enaimo boka-toojogo ko, inii gai, inii okai ma enaimo ajii tai maija.

⁹Inii epi Keristus bokata bagee jupi make anigojake wado te bokaitagi; bokai kodo okai maida petee beu.

¹⁰Okaija bokata mana kou ko, okai kigeena peu maida make bokata; kodeja okai ija topi kii ko, okai Ugatame maida make ija tou.

¹¹Okai kou dani ikii maija peu maida make bokata kodo ko gai, kodeja Ugatame maida make ija kodo, Keristus Jesus kidi duba.

¹²Okai kouja peu kodaa ikiija peu kaine ma maida petee te ke-tita tijake ejaikai, okaija kibigi dimi wo te kei taine tijake.

¹³Ikiija tineija kodo peu kei te-tai agijo taawiine tijake peu maida te ekegajawii, kodeja ikii akaato Ugatameepa ekegajawii, bokata bagee anigota kodo danite, daana ikiija tineija Ugatameepa ekegajawii, maakodo bokouto kei te-tai agijo awiine tijake.

¹⁴Peu kodaa ikii maida petee te kija kouja, ikii dijo douja mana kodo maida ko beu kouja, kodeja jikoo bokouto maida kodaa.

¹⁵Kojoka kawe dani? Inii peu kei te-wo, mee? inii dijo douja mana maida beu kouja, kodeja jikoo bokouto maida kodaa. Umina ko beu!

¹⁶Ikii ewo, mee? ikii ejuwidoke taine tijake akaato ekegajawijake kii kidaa bida peu kijakimakai, ikii eepeine tijake akaato ekegajawita kidiipa; peu kodoopa bokai doodouga juwa, Ugatame ejuwidoke tijake maakodo bokouto doodouga juwa.

¹⁷Kodeja Ugatame muta etuwai, ikii mijaato peu ka kijakimakita bagee kede ito ko kitopita mana kodo kegepa puki ka ikii ejuwidoke tai.

¹⁸Tijake peu maida make kipipikajawijake maakodo bokouto ka bida peu kijakimakai.

¹⁹Me ka kei tija agijo maida make kitii, ikii kogaagije kouja. Ikii mijaato ikiija tineija jimu ma peu ma maida ekegajawijake peu kei te-wo taine tijake, kou dani ito kou ikiija tineija maakodo bokouto maida ekegajawii, jimubeu kaine tijake.

²⁰Ikii peu ka bida peu kijakimakita gaa kodaa, ikii maakodo bokouto maida make ojaa tou.

²¹Ikii ito kou ego gaate manaido ikii ma epaago kita? Kei manaido momogi ko bokai.

²²Kodeja ikii ito kou peu maida make kipipikajawijake Ugatameja bida peu kijakimakijake ko, abu kijapai mana kou ko maakodo bokouto kodo, daana momogi jato ko ajii tai imo to togoo.

²³Peu abu ko bokai kouja, kodeja Ugatameja ojaa niimita agijo kou ko ajii tai imo to togoo, Keristus Jesus duba, e boko te boko nijaduwa-tai me kidi.