Read Ekari 1 KORINTUS 1 Bible Online

1 KORINTUS 1 - Ekari bible

1 KORINTUS 1

¹Ani ki Paulus kidi Ugatameja gata dimiidaiga mana natita, Keristus Jesus eti-awita me ke-tijake, daana iniikeneka Sostenes maija

²Ugatameja uguupuguu Korintus makiida kapogeije kijamakii. Ikii Keristus Jesus duba jimubeu kitijawita, daana kiida kouda iniija Tuhan Jesus Keristus eka manaa-tai bagee utoma enaimo jimubeu bagee ke-tijake mana kitita; okeija ka, daana iniija ka e boko te boko nijaduwa-tai me kidi.

³Kojoka jikoo bokouto ma, muka-muka bokouto ma, Iniitai Ugatame ma, Tuhan Jesus Keristus ma boko kijaduwajawii.

⁴Ani umina ikii maida make Ugatame nagajaweege etigoo to, Keristus Jesus duba Ugatameja jikoo bokouto kijaduwajawii kouja.

⁵Okai duba ikii e mana te mana tonawi kidaa, godajawii manaida ma, epi dimiida ma.

⁶Keristusja mana jawega-tai kodo ikii duba wedoke tita kodo danite.

⁷Tijake ojaa niimija agijo ikii jupi ena ma beu kai beu, iniija Tuhan Jesus Keristus ewaa kaitagiida edoutoojogo gaa.

⁸Kou danite wiwitiida gaa kodaa to bo kiwejawiitagi, iniija Tuhan Jesus Keristus putu naago kodo ikii anaani beu ke-tijake.

⁹Ugatame kidi enanauto; Jokame iniija Tuhan Jesus Keristus kidi akagadime manaida kibuki-motita me kidi.

¹⁰Kowaa kei, noogeimaido, iniija Tuhan Jesus Keristus eka dubaiga ani kidiimai, ikii utoma ena dimi kepajawe-tijake, daana ikii dimi wudepapa te te-tita, kodeja ena kegepa ena dimi to tijawii.

¹¹Chloe uguwo enita kouja, ei, noogeimaido, ikii jupi akaije akaije topa.

¹²Kii no te: Ikii utoma wegaate mana, „Ani ki Paulus jato,” „Ani ki Apollos jato,” „Ani ki Kepas jato,” „Ani ki Keristus jato,” wegai mana kodo.

¹³Keristus kidi wudijake tita, mee? Paulus kidi pija boko maida kijaedajawita, mee? Ikii Paulus eka duba baptis kitita, mee?

¹⁴Ani Ugatame nagajaweege etii, ikii jupi ani meido baptis kitai beu teetega, kodeja Kerispus ma Gajus ma to.

¹⁵Me idaana ka okaaka dubaiga baptis natita mana kodo te naawega-tijake.

¹⁶Stepanas uguwo maija baptis eteetega, kodeja ani joko ka bagee baptis eteetega juwa ko ewo.

¹⁷Me baptis ete-tijake Keristus nabadikumii ko beu kouja, kodeja ajii mana wude-tita; dimi boko manaidaiga ko beu; Keristusja pija boko kodo wogidaa tai na kojoka.

¹⁸Pija boko mana kou ko peu kaine bagee ka ko dimi beu mana gai. Kodeja inii ajii taine bagee ka ko Ugatameja bida bokouto kodo.

¹⁹Kapogeije ebijamakita kouja: Dimi boko jago bagee ka dimi bokouto kodo peu jaawiita, Daana gai epi bagee ka go-mote dimi ani beu jaawiita.

²⁰Dimi boko jago me kidi ki kaija? Kapogeije epi me kidi kaija? Ito wagi ka go-jikii me ki kaija? Beu, mee? Ugatameja kii makiida ka dimi boko kou ko dimi beu eewii kodo ko.

²¹Makiida maki utoma ka dimi bokoudaiga Ugatame egamakai beu kouja, Ugatameja dimi bokoudaiga ka gai ko, mana wudii ko dimi beu kodoudaiga maakodo egai bagee ajii ti-menii.

²²Jahudi bagee dou beu agijo doune tijake ediimai, daana Gerika bagee dimi boko bopi kepai;

²³kodeja inii ke Keristus pija boko maida edajawita mana kodo wudii; kou ko, Jahudi ka ego gai mana, daana ojaa bagee ka ko dimi beu mana kodo gai.

²⁴Kodeja manaa-tita bagee ka ko, Jahudi bagee na, Gerika bagee na, Keristus kidi Ugatameja bida bokouto ma, dimi bokouto ma.

²⁵Ugatameja dimi beu dimi kou ko me ma ko dimi boko ibo kouja, daana Ugatameja debuu kodo, me ma ko bida agijo.

²⁶Dodowei, noogeimaido, mana kitita takaa kodo; makiida maki utoma pekaida ikii jupi dimi boko jago bagee me wedaba ko beu, daana bida bagee wedaba ko beu, daana ekaago tuma ko beu.

²⁷Kodeja makiida ka dimi beu ka kidi Ugatameja ewitokimotii; dimi boko jago kodo egoti etijawiine tijake; daana makiida ka debuu ka kidi Ugatame ewitokai, bida jago kodo egoti etijawiine tijake.

²⁸Daana kii makiida ka mijo ma, daba ejaikita ma, Ugatame ewitokai; kou ko beu agijo maija, ewaa agijoudo kodo beu eewe-tita.

²⁹Me jokaija Ugatame jumaapa kobidoke te te-tijake.

³⁰Ikii Keristus Jesus duba topa epauto ko Ugatame kidi; Ugatameepa make dimi bokouto nijajaikita; kou ko maakodo bokouto ma, jimubeu bokouto ma, nipipikajawii ma ko.

³¹Okai kouja, kapogeije ebijamakita danite: Meija kobidoke tipi, Tuhan duba kobidoke tai.