Read Ekari 1 KORINTUS 10 Bible Online

1 KORINTUS 10 - Ekari bible

1 KORINTUS 10

¹Ani ide beu, ei, noogeimaido, ikii ewo kodo, iniija aijaane muumaane kede tuku mijo tota, daana okei utoma maikaidaiga adita.

²Kou danite okei utoma tuku duba ma, maikai duba ma baptis etita, Musa ma enaimo ke-tijake.

³Daana okei utoma ajii naija agijo tumaana kodo to nota.

⁴Daana okei utoma ajii uwo tumaana kodo to nota. Ajii ka eepeta Mogouto kidiipa make uwo nota kouja. Mogouto kidi Keristus.

⁵Kodeja okei me wedaba kede Ugatameja juma dege-dege etai beu; okai kouja okei geeta-gaataida peu kidaa tita.

⁶Kei manaido nijakomugai mana, inii peu agijo kibigi te gatijake, okei me ino ka kibigi gata danite.

⁷Okei me ino ka kei tita danite utoopa migaakobe te tai; kapogeije ebijamakita kouja; Meido kede naine tijake animakai. Tijake joonidaa tijake ebaabaa tai.

⁸Inii maija mogai te neetai, okei me ino ka kei tita danite, tijake naagoonaida to ko okei me ida wido ma mepiina ribu damita kojoka.

⁹Inii ke Tuhan te neegaado tai, okei me ino ka egaado tita danite, tijake jina ka enota kodo.

¹⁰Daana ikii kitigi motigi te tai, okei me ino ka kei tita danite tijake peu awe-tai kidaa peu eewita kodo.

¹¹Kei manaido okeepa ewaa kidaa tita, tuni nijatuwajawii mana; inii komuga niimaine kapogeije ebijamakita, inii wiwitiida gaa ka bagee kede.

¹²Okai kouja, meija ani bida kodo ko gapi, epeepite gai, jagii tidoke na kojoka.

¹³Kigaado tita mana kodo, me tuma egaado tei tita mana kodo to. Kodeja Ugatame enanauto me, tijake kigaado tai mana kodaa ikiija ka bida agijo wo etiga-tijake ti kijaikaitagi. Kodeja gaado manaida kodaa petii tidoke tai mana ewaa kijaawiitagi, petee ke-tijake.

¹⁴Okai kouja, ei, noogeimaido, utoopa migaakobe maida make kodo okii.

¹⁵Ani epi bageepa etija dani kitii; ikii kede anija kiteega mana kodo aki-gai-gai tai.

¹⁶Iniija ka mobu niimita uwaawe kodo mobu ediimijake, beu, mee? Keristusja emo duba akagadime tijawii mana kodo. Daana iniija ka uteige goti kodo, beu, mee? Keristus má maida akagadime tijawii mana kodo.

¹⁷Goti kodo kemoona to kouja, daana inii wedaba kede má ena to kai, inii utoma kemoona kidaa to aki-didee-didee motii kouja.

¹⁸Israil bagee ka ijee kodo gai: Beu, mee? jo-menita agijo nota bagee kede jo-menijaida migaakobe ootai kodo.

¹⁹Ani kawe dani kiteega? Utoopa migaakobe etaipa menita agijo kodo agijo puki jaijo? Juwa, utoopa migaakobe te-tai agijo kou ko agijo puki jaijo?

²⁰Beu, kodeja anija kitii ko, ojaa bagee ka menei tita agijo kodo enijaapa menii, Ugatameepa ko beu. Ani ide beu ikii enija ma akagadime ko.

²¹Ikii Tuhanja uwaaweiga ma, enija ka uwaaweiga ma, enaimo awijake te noja. Daana Tuhanja no-taida ma, enija ka notaida ma enaimo awijake ikii te noja.

²²Inii Tuhanja kegepa jaejajawiine, mee? Okai ma ko inii ke bida, mee?

²³Utoma agijo utoma pijo to kodeja, utoma agijo utoma epaago ko beu. Utoma agijo utoma pijo to kodeja, utoma ko bo wejawija ko beu.

²⁴Me idaana ma akaato enaa awiine bopi te kepai, kodeja joko ka bagee enaa eewiine mana kodo.

²⁵Akaada te-taida kaa tita agijo dimi wija maida make igi te jakijake nai to.

²⁶Maki kii ke Tuhan ipuwe kouja, daana kou maida topai agijoudo maija.

²⁷Ojaa me idaana ka buka naine mana kitipi, tijake ikii uwiine gapa, ikeepa kijamakita agijo kodo dimi wija maida make gaado te tijake nai to.

²⁸Kodeja me idaana ka, „Kii ke okei ipuwe me menita” kitipi ko te nai; kitipi me kidi maida make ko, daana dimi wija maida make kouja.

²⁹Kou ko, ikiija ka dimi wija maida make ko beu, kodeja joko ka bagee dimi wija maida make kouja. Magijo ka anija pijo mana kodo joko bagee dimi wija maida make ka peu naawii?

³⁰Ani didee motijake nagajaweege etipa ko, magijo ka anija nagajaweege etita agijo maida make nawidogai?

³¹Okai kouja, ikii nai juwa, uwo nai juwa, kei tai agijo kei tipa juwa, Ugatame juma dege-dege etijaweete to kei tai.

³²Jahudi bagee juwa, Gerika bagee juwa, Ugatameja maakodo gai uguupuguu juwa, duwaa-duwaa te etijawii.

³³Ani maija utoma manaida kodaa utoma bagee enaa nagatita kei teiga danite; ani akaato enaa awiine te gajake okei me wedaba enaa eewiine, okei na ajii te-tita no te.