Read Ekari 1 KORINTUS 12 Bible Online

1 KORINTUS 12 - Ekari bible

1 KORINTUS 12

¹Roh ka niimijawii manaido kei ke ikii ewo gai ko ani ide beu, ei, noogeimaido.

²Ikii epi, ikii ojaa bagee toojogo gaa, ikii mana beu ka migaakobe etai agijoopa kigo-motita, kigo-motitaidaiga kodo.

³Okai kouja ani kiti-kinii, Ugatameja Rohdaiga wegaja bagee me idaana ma „Jesus ki peu” te wegaja; daana me idaana ka „Jesus ki Tuhan kidi ki” te wegaja, kodeja Rohulkudus ma to.

⁴Niimijawita mana manaija kodo topai, kodeja Roh kodo ena to.

⁵Daana kei te-tijake mana manaija maija, kodeja Tuhan kidi ena to.

⁶Dedaana ekowai mana manaija maija, kodeja Ugatame kidaa to utoma agijo me utoma dubaiga kei tijake.

⁷Kodeja Roh ewaida kai mana me gakita niimijawita, epaago ke-tijake.

⁸Me idaanaapa Roh maidaiga dimi boko mana mutoona menijawii; joko bageepa epi ketago mana mutoona Roh kodo maidaiga to.

⁹Daana joko bageepa ko Roh kodo maidaiga to maakodo gai mana menijawita; daana joko bageepa didi beu jaawii manaido menijawita, ena to Roh kodo maidaiga.

¹⁰Daana joko ka bageepa ego takuu-takuu agijo kei, tijawii; joko bageepa gokobaki tijawiidaiga wegai mana; joko bageepa roh kodo igi jake-tai; joko bageepa ebeida go-mote mana; daana joko bageepa ebeida go-mote mana kodo boko kegajake te-tai.

¹¹Kei utoma ena to Roh kodaa kei tijawijake me utoma jawudikumii, okaija gata danite.

¹²Má jato kodo ena to, daana tine wedaba, daana má jato ka tineido kodo wedaba kodeja, má ko ena to, okai kou dani Keristus kidi maija.

¹³Roh ena to dubaiga inii utoma má ena to ke-tijake baptis nitita, Jahudi bagee na, Gerika bagee na, ejakimakita dabaa na, ojaa bagee na, inii utoma ena to Roh kodo nijaawikumita.

¹⁴Má jato kodo tineena to ko beu kouja, kodeja wedaba.

¹⁵Kou danite bado ka, „Ani ki gane ko beu kuoja, ani má maida ka beu agijo” wega-toojogo, okai kouja ko bado ko má jato maida make beu te kija.

¹⁶Daana gapa kodo, „Ani ki peka ko beu kouja ani má maida ka beu agijo” wega-toojogo, má maida make beu te kija.

¹⁷Má jato puki kodo peka to ki-toojogo, kaijaiga juwija? Daana má jato puki kodo gapa to ki-toojogo, kaijaiga unu jumija?

¹⁸Kodeja Ugatame kidaa tineija kede, kou ko tine gakita, má maida makijawita, okaija gata danite.

¹⁹Kou danite utoma ko tineena to naako, má jato ko kaija?

²⁰Maakidi tine ko wedaba, kodeja má jato kodo ena to.

²¹Peka ka ganeepa, „Ani ki aki gai peu ko beu” te etija. Juwa, dagi ka badoopa, „Ani ki aki gai peu ko beu” te etija.

²²Beu, kodeja má jato ka edou ko debuu dani tineija kede umina gai peu.

²³Dedaana má jato ka iniija ka gai ko diiti beu tineija inii euga diiti awii; daana edou peu kodo euga edou enaa ke-tijake;

²⁴edou enaa ka ko gai peu ko beu mana kodo. Kodeja Ugatameja kou dani tijake má maida epeepi tijawita, diiti beu tine kodo euga diiti awijake.

²⁵Má jato akaije te te-tijake, kodeja tineido kodo akaadade te-tita.

²⁶Tijake tineena gaduwa-toojogo, jogo ka kede enaimo didi oogaduwai; daana tineena diiti toojogo, joko ka kede enaimo ideide akaga.

²⁷Ikii ke Keristusja má kidi, daana ikii me gakita okaija tineido.

²⁸Daana Ugatameja maakodo gai uguupuguu duba ewaa awita, edoga kidi, eti-awita bagee; wijaago, gokobaki tijawiidaiga wega-tai bagee; widaago, etope-tai bagee; tijake ego takuu-takuu; tijake didi bagee beu jaawii bida agijo; agaagi; etimaketai; ebeida go-mote mana manaija.

²⁹Kei utoma kede eti-awitaido, mee? Kou utoma gokobaki tijawiidaiga wega-tai, mee? Kou utoma etope-tai, mee? Kou utoma ego takuu-takuu kei te-tai, mee?

³⁰Mee? utoma kede didi bagee beu jaawii bida jago, mee? Kou utoma ebeida go-motijake mana wega-tai, mee? Mee? kou utoma ebeida go-mote mana boko kega-tai, mee?

³¹Kodeja wo etige niimijawita manaido go-motiine tijake epeepite bopi kepai. Tijake umina enaa ka takaa kimuwakaipiga.