Read Ekari 1 KORINTUS 15 Bible Online

1 KORINTUS 15 - Ekari bible

1 KORINTUS 15

¹Ani ga-kiniine, ei, noogeimaido, ani kijawudeetega ka ajii mana kodo, ikii jakimakeetega ka kodo; daana kou duba ikii pigu atijake toote mana kodo.

²Okai kou maida ikii ajii tai, ikii umina bida peu anija kijawudeetega mana kodo jakimakipa ko, ikiija maakodo gai kodo wogidaa te ti-toojogo ko.

³Edoga pukipaki kidi ki ani na motita mana kodo kitikineetega; kou ko, Keristus iniija ka peu maida make nijabokata, ugata kapogeije ebijamakita danite.

⁴Okai oka emakita; tijake widaago naago eenigojawita, ugata kapogeije ebijamakita danite.

⁵Okai Kepaspa ewaa kita, tijake wija ma gaati kedeepa maija.

⁶Tijake kigeena to enakeneka bagee lima ratus wado kedeepa; okei me wedaba ito kou na ija topai, kodeja me ino bokata.

⁷Kou wadoutouga okai Jakubpa ewaa kai; wadoutouga etiawitaido utoma kedeepa maija.

⁸Tijake muumai jago aneepa maija ewaa kai, ani teejoka dani bukaa.

⁹Eti-awita bagee jupi ani ki umina mijo daba kouja, tijake eti-awita kidi naabatai maija nadou peu; ani Ugatameja maakodo gai uguupuguu peepu eteetega kouja.

¹⁰Kodeja Ugatameja jikoo bokouto kouja ani topa danite topa ko; daana okaija jikoo bokouto naduwajawijake wogidaa beu, kodeja okei utoma ko ani ki umina ekowa-tai; ani ki beu kidija, Ugatameja jikoo bokouto naduwajawijake kodo.

¹¹Okai kouja, ani maija, okei maija, inii mana wudii danite, ikii kede maakodo gaatega.

¹²Kou danite Keristus bokata bagee jupi make eenigojawita mana kodo wudi-toojogo, kawe dani tijake ikii jupi me wija wido ka bokata bagee taanigoja wegaigai?

¹³Kou danite bokata bagee taanigou naako, Keristus maija taaniigo-toja.

¹⁴Keristus taanigojawii naako, iniija mana wudii ko wogidaa, daana ikiija ka maakodo gai maija wogidaa.

¹⁵Daana inii maija Ugatame maida make puja mana jakubai, Keristus eenigojawita mana inii Ugatame maida make jawegai kouja; kodeja taanigojawita, kou danite bokata bagee taanigotoojogo.

¹⁶Bokata bagee taanigojawii naako, Keristus maija taanigojawi-toja.

¹⁷Kodeja Keristus taanigojawii naako, ikiija ka maakodo gai kodo wogidaa, daana ikiija ka peu duba topa.

¹⁸Kou dani maija Keristus duba ka bokata bagee kede peu kidaa tita.

¹⁹Kii umi-tou tija gaa to inii Keristus maida dimi ekotopijawipe, me utoma ko inii ke ipa umina.

²⁰Kodeja maa kou Keristus kidi bokata bagee jupi make eenigojawita, bokata bageeja ka epa ookai uta kodo.

²¹Me idaana maidaiga bokai kodo ewaa kita danite, me idaana maidaiga bokata bagee jupi make eenigojawii mana maija ewaa kita.

²²Adam duba me utoma bokai kodo danite, okai kou danite maija Keristus duba me utoma ija eewii.

²³Kodeja me utoma kede aki-kotuu-kotuu, etikeuta Keristus kidi; wadoutouga okaija meitagiida okai ipuwe bagee kede.

²⁴Wadoutouga wiwitiida kodaa, Nakame Ugatameepa jakimakita makiida jaekegajawiitagiida; bida etimakai mana ma, boko duwajawii mana ma, bida agijo ma, jamo igajawijake.

²⁵Okai boko duwa-wo beu kai peu, okai ma jape bagee utoma okaija bado mijo tagi atiitagiida to.

²⁶Muumai jago ka jape beu awiitagi ko bokai mana kodo.

²⁷„Utoma agijo utoma Ugatameja okaija bado mijo tagi jaatita” kouja. Kou danite utoma agijo tagi jaatita mana kodo wega-toojogo, beu maa kou, tagi jaatijawii me kidi to beu.

²⁸Utoma agijo utoma tagi jaatiitagiida kodo okai kou gaa kodo Joka kidi maija okaapa ejuwidoke taitagi, utoma agijo utoma bado mijo tagi jaatita me kidiipa; Ugatame kidaa to utoma agijo utoma boko duwa-tijake.

²⁹Beu naako, magijo ka bokata bagee maida make meido baptis taine? Bokata bagee taanigojawii naako, magijo ka bokata bagee maida make meido baptis etai?

³⁰Magijo ka inii ke agapi gakita peu kaine dani to togoo?

³¹Agapi gakita ani bokagoo to, ei, noogeimaido; ani ikii maida kobidoke tai kojoka kitii, iniija Tuhan Jesus Keristus duba.

³²Kou danite me ijeidaiga Epesus makiida ego jago jina ma akagaado tipa ko, má epaago? Kou danite bokata bagee taanigojawii naako, „Mewei, inii nai no! aweeta bokai kouja.”

³³Uneune te tai! „Peu bagee ma akato kou ko enaa ijee peu awija.”

³⁴Enaa dimi wo gajake peu agijo jamo jaikai. Me ida wija wido Ugatame ewo bagee kouja. Ikii ego ga-tijake kou kitii.

³⁵Kodeja me ino ka wegai ko, „Kawe daniidaiga bokata bagee anigoja? Daana má jato kodo kawe dani epoudaiga meitai?”

³⁶Ei, dimi beu bagee! Aki weja agijo bokai beu ki-toojogo ija te kai.

³⁷Daana akija weja agijo kodo má ewaa kaita tijake wei ko beu, kodeja okomita miti to, gandum juwa, joko ka juwa.

³⁸Kodeja Ugatame kidaa gata danite má jaebijai, daana tuma gakita akija-má-má jatijawita.

³⁹Daana ija boko jago kodo maija tumaana to ko beu, kodeja me na ino, jina na ino, bedo na ino, binei na ino.

⁴⁰Epa maida ka agijo na topai, daana makiida ka agijo na topai; epa maida ka diiti kodo ino, daana makiida ka diiti maija ino.

⁴¹Meuka ka diiti na ino, daana agoo ka diiti na ino, daana ijapu ka diiti na ino; ijapuudo maija diiti ena kidi ki beu, kato kato.

⁴²Bokata bagee anigou mana maija okai kou. Weta agijo kodo peu kija; eenigojawita agijo kodo peu te kija.

⁴³Weta agijo kodo edou peu; eenigojawii ko diiti ma. Debeidaiga wei; kodeja bidaidaiga eenigojawii.

⁴⁴Makiida ka epoudaiga wei; ajii tai epoudaiga eenigojawii. Kou danite makiida ka epoo topa ko, ajii tai epoo na topa.

⁴⁵Okai kouja kapogeije ebijamakita: Edoga ka me ki, Adam kidi, ebeejo jago eugajawita. Ketago ka Adam kidi ija boko mene-tai Roh kodo kai.

⁴⁶Kodeja edoga kodo ajii tai ka epoo ko beu, kodeja makiida ka epoo tiga tijake wadoutouga ajii tai ka kodo.

⁴⁷Edoga ka me kidi makiida ka, maki puuge kidi; wijaago ka me kidi epaawado ka.

⁴⁸Maki ka kidi danite, okai kou dani maija makiida ka bagee. Daana epaawado ka kidi danite, okai kou dani maija epaawado kaido ko.

⁴⁹Maki ka me kidi epoudaiga inii tope danite, okai kou danite maija inii epaawado ka me kidi epoudaiga toutage.

⁵⁰Kodeja kii ke kiti-kiniine, kowaa kei, noogeimaido, mugee ma emo ma ka ko Ugatameja jakimakita makiida didee te gomotija; daana peu kija ijee kodaa peu te kija ijee go-motii beu.

⁵¹Juwidou! Boone-boone mana kitiine: inii utoma bokaitage ko beu kojoka, kodeja inii utoma iginikiniki tidaa taitage.

⁵²Mijo gaa na ka, pekaana to, ketago ka mitoopi taita gaa. Mitoopi taita kouja, daana bokata bagee kede peu te kija ijeidaiga anigoutai, daana inii ke iginikiniki tidaa taitage.

⁵³Kii peu kija ijee kii ko peu te kija ijee makidoke tai beu kai peu kouja, daana kedaa ijee kii ko imo tou ijee makidoke tai.

⁵⁴Kodeja peu kija ijee kii ke peu te kija ijee makidoke taitaida, daana kedaa ijee kii ke imo tou ijee makidoke taitaida, okai kou gaa kodo ebijamakita mana kodo kobadoke taita. Kou ko: Bokai mana muto kodo bida bokouto ka egaawidoke.

⁵⁵Kowaa ke, bokai mana muto, Akija bida boko ko kaija? Kowaa ke, bokai mana muto, Akija tedii ko kaija?

⁵⁶Boka ka tedii kou ko peu kei tai kou, daana peu kei tai ka bida kou ko dijo douja mana kodo.

⁵⁷Kodeja Ugatame muta neetuwawei, iniija Tuhan Jesus Keristus duba bida bokouto nijaduwajawii me kidi.

⁵⁸Okai kouja, kowaa kei, noogeimaido, bo wejake pigu atii; Tuhanja kei tai agijo umina juma doodoo to tai; ikii epi kouja, ikiija kei tai agijo Tuhan duba wogidaa ko beu.