Read Ekari 1 KORINTUS 16 Bible Online

1 KORINTUS 16 - Ekari bible

1 KORINTUS 16

¹Jimubeu bagee mege kotuu jatai mana kodo, ani Galatia ka maakodo gai uguupuguu etita danite, ikii maija kou kei tai.

²Dá putu gakita ka edoga naagouda ikii me gakita mege awijaida awii to tigoo, ewaa beu ka taitai, tijake ani jawiitaida kodo kotuu te taine kodaa.

³Tijake ani jawipa ko, kapogeije ma me ebadikumiita, ikiija ka maakodo egajake ewitokita bagee kede; ikiija ka menita agijo Jerusalim doke-uwiine tijake.

⁴Tijake kou danite ani maija uwiine gapa ko okei ani ma enaimo uwii.

⁵Ani Makedonia etigadokijake kidou jawiita; ani Makedonia uwidokiine kouja.

⁶Tijake ikeepa umitaapo umidokiita juwa, oo uwa puki umidokii juwa, ani uwiine jato ikii naadade-tijake ani uwiitaida kodo.

⁷Ani ito kii wagi kidi toga te toga umidokii beu kouja; kodeja ikeepa umitaapo umidokii, Tuhanja enaa eni-toojogo.

⁸Kodeja Pentakosta naagouda to Epesus touta;

⁹ekowaine tijake ibo damo naakebadoke tijake topa kouja, daana akaije bagee umina.

¹⁰Kou danite Timotius jawipi ko, okai mobu to-tijake eedadai; okai Tuhanja kei tai agijo kei teete kouja, ani na kei teete danite.

¹¹Okai kouja me idaana ka ma daba te ejaikai. Enaidaidaiga to ebadikumii, aneepa joko meine tijake, ani adoutopa kouja, joko ka keneka bagee maija.

¹²Inii keneka Apollos maida make mana, ani umina ediimeetega, keneka bagee kede ma kidou jawe-tijake, kodeja ito ko okai uwii be. Okai gaitagi naago jawiitagi.

¹³Ikii douto-douto tai; maakodo gai manaida pigu atijake tou; jame ka kei tija kei tija ke tai; uu peu kidi gai.

¹⁴Kei tai agijo utoma ipa manaidaiga to kei tai.

¹⁵Kowaa kei, noogeimaido, ikii epi Stepanas uguwo kodo Achaja makijo ka epa ookai uta kijake jimubeu bagee eedadaine akaato ekegajawita.

¹⁶Ani bida peu kidiimai, kei dani bagee ejuwidoke to, daana keedade-tai bagee ma, kijaekowa-tai bagee maija.

¹⁷Stepanas ma Portunatus ma Achaikus ma metaida ko ani ideide umina, ikiija ka beu daniija tiki tiki kijatijawita kouja.

¹⁸Anija kegepa namaipajawii kouja, daana ikiija ka maija. Kei dani bagee ibo ejaikai.

¹⁹Asia dokoo ka maakodo gai uguupuguudo kodaa kojáá tou wado kitita. Akila ma Periskila ma umina maa kou Tuhan duba kojáá tou kitii, okejaija owaapa kotuu te-tai uguupuguu maija.

²⁰Inii keneka bagee utoma kojáá tou kitii. Ikii utoma jimubeu kidi amaimu akajume to tai.

²¹Ani Paulus kidaa ani gane ka kojáá tou kitii.

²²Kou danite me idaana ka Tuhan ei te egapi, peu kidoke tai enaa. Maranata! (Kou ko: Iniija Tuhan kidi me-ati!)

²³Kou danite Tuhan Jesus kidaa jikoo bokouto kodo keetou to.

²⁴Anija ipa dimi kodo ikii utoma maida Keristus Jesus duba.