Read Ekari 1 KORINTUS 7 Bible Online

1 KORINTUS 7 - Ekari bible

1 KORINTUS 7

¹Ikiija kapogeije nagaado tita manaido kou ko amo kitii. Jame ka jagamo te ewiniki tai na enaa.

²Kodeja mogai maida make, jameido me gakita akija jagamo-jagamo bukii enaa, daana jagamo gakita maija akija jame-jame to.

³Jameme kidaa jagamome jakei tija agijo kei tijawii; kou dani maija jagamome kodaa jamemeepa maija.

⁴Jagamome kodaa má maida bida ko beu, kodeja jameme kidaa. Kou dani maija jameme kidaa má maida bida ko beu, kodeja jagamome kodaa.

⁵Akaakone te tai, mijo gaa kodo ena dimi aakepajawijake to, sembahjang tai enaa ke-tita; wadoutouga enaimo aatou, Teege ka kigaado tai na kojoka, akaato munii kaga kijake.

⁶Kodeja kou kitii ko bida peu kitimakai mana ko beu, anija dimi gajake to.

⁷Me utoma ani dani na enaa kodaa. Kodeja me gakita Ugatameepa make aki motii-motii, meena kii daniidaiga, meena kou daniidaiga.

⁸Bagitago ma mijáa ma ani etii, ani dani umi-tou enaa.

⁹Kodeja okei akaato te munimake gapai ko, waka bukii enaa. Kikijaato tou to kouja waka bukii enaa.

¹⁰Wakaago bagee ani etimakai; kou ko, anija ko beu, kodeja Tuhan kidaa: jagamome kodo jamemeepa make akawude te tai.

¹¹Kou danite akawude kipa, okainiinii tou to juwa, jamemeepa wo uwii juwa tai. Daana jameme kidaa jagamome te ejaikai.

¹²Joko ka bageepa anija etii, kou ko Tuhanja ko beu, kenekame idaana jagamome maakodo gai beu ki-toojogo, daana jagamo kodo okai ma enaimo aatou enaa gapa, jameme kidaa te ejaikai.

¹³Daana jagamo idaana jameme maakodo gai beu ki-toojogo, daana jame kidaa okai ma enaimo aatou enaa gapi, okai jameme ki te ejaikai.

¹⁴Maakodo gai beu jame kidi jagamomeidaiga jimubeu kouja; daana maakodo gai beu jagamo kodo jameme kidiidaiga jimubeu. Kou dani beu naako, ikii jokaane utoopa to, kodeja ito ko jimubeu kodo.

¹⁵Kodeja maakodo gai beu me kidi akawude taine gapi, ejaikai; jame keneka juwa, jagamo keneka juwa, kou mana duba kodo akagadime timakai beu kouja. Ugatameja muka-muka dimiidaiga mana nitita kouja.

¹⁶Kowaa kau, jagamome, akuwaka ajii etijawija juwa, epi? Juwa, ei, jameme, akuwaka ajii etijawija juwa, epi?

¹⁷Kodeja Tuhanja me gakita gakita jawudita takaida tou to, Ugatameja manaa-tita gaa ka takaida kodaa. Maakodo gai uguupuguu utoma kou dani eteiga mana kodo.

¹⁸Me idaana manaa-tita gaa iniitodo duwata me ki-toojogo, iniitodo duwai mana kodo te jaikai. Kou danite me idaana manaa-tita gaa iniitodo duwai beu ki-toojogo, iniitodo te duwai.

¹⁹Iniitodo duwai mana kou ko epa beu mana; iniitodo te duwai mana kou maija epa beu mana; kodeja Ugatameja nitimakita mana juma doodoo kii to.

²⁰Me gakita manaa-titaida kodaa tou to.

²¹Aki ki me ka kajakimakita gaa mana kati-toojogo, aki gaagaa te tai; kodeja kou danite, kapipikajawi-toojogo enaa kojoka motii to tai.

²²Meija me ka ejakimakita gaa Tuhan duba manaa-tita, okai Tuhanja epipikajawita me kidi. Daana kou dani maija, meija ojaa to toojogo gaa manaa-tita, okai Keristus kidaa ejakimakita me kidi.

²³Ikii keedaja age ka keeda-motita; me ka kijakimakija bagee te kai.

²⁴Kowaa kei, noogeimaido, me gakita gakita mana kitita gaa ka takaida Ugatame ma enaimo tou to tai.

²⁵Api jokaagaa mana Tuhanja enimakita mana beu topa; kodeja anija gaja kodo kitii, kou ko Tuhanja ipa bokouto ka enanauto me kidi ki nagai dimiidaiga.

²⁶Anija gai ko, ito wagi ka gaagaa kodo maida make kouja, okai tota dani kodo tou to enaa.

²⁷Aki waka ma tawadoke tipe, akawude taine dimi te gai. Aki ma jagamo beu kipe, waka te eubai.

²⁸Kodeja aki waka bukipe maija peu beu; daana api jokaagaa kodo waka uwipa peu beu. Kodeja kou kei tai bagee kede akaato gaagaa taitai; ani kipipikajawiine kodaa.

²⁹Kii no te, kowaa kei, noogeima, kii wagi kidi pini keega. Okai kouja, ito make wado wakaago bagee kede waka beu bagee jaijo enaa.

³⁰Daana jege tai bagee jege te tai jaijo; daana ideide bagee ideide te tai jaijo; daana agijo edai bagee agijo tagu jaijo;

³¹daana makiida ka agijo wo kei teete bagee wo kei tai beu jaijo. Kii makiida ka ijee igaineega kouja.

³²Ani ide kodaa, ikii gaagaa beu. Waka beu me kidi Tuhanja agijo to wado gai; kou ko, kawe dani tijake Tuhan juma dege-dege etija mana kodo.

³³Kodeja wakaago bagee kede makiida ka agijoudo wado gai, kou ko kawe dani tijake jagamome juma dege-dege etijawii mana kodo.

³⁴Daana kegepa ko taka wija. Kou danite maija jame beu jagamo ma, api ma, Tuhanja agijo to wado gai, má jato maija, kegepa maija, jimubeu ke-tita; kodeja wakaago jagamo kodaa makiida ka agijo to umina wado gai, kou ko kawe dani tijake jameme juma dege-dege etijawii mana kodo.

³⁵Ani kou kitii kou ko, keedadaine tijake; ikii gadi keetiine ko beu. Kodeja boko kijaduwajawiine; tijake ikii dimi wija te kijake Tuhanpa bo we-tita.

³⁶Kodeja kou danite me idaana ka gai ko, okaija api kodo maida peu kei teete ga-toojogo, okai ibo kijake ko; daana kou danite waka eumai beu kai peu ga-toojogo, okaija gata danite kei tai to; okai peu beu. Waka akabuke ko dá ko beu.

³⁷Kodeja meija kou danite kegepa tipinimakijake beu kai peu ko beu, kodeja bida gajake api kodo emunaita ga-toojogo, okai kou kei tai maija enaa.

³⁸Okai kouja waka eumija bagee na enaa, daana waka te eumija bagee maija umina enaa.

³⁹Wakaago jagamo jameme kidi toja gaa okai maida tawadoke tijake tou. Kodeja jameme kidi boka-toojogo okaija gata meepa waka wo uwii enaa; kou ko Tuhan kidi duba to.

⁴⁰Kodeja anija gai ko, okai tota danite to tou ko enaa gaita. Daana anija gai ko, ani Ugatameja Roh dimi topa maija.