Read Ekari 1 KORINTUS 9 Bible Online

1 KORINTUS 9 - Ekari bible

1 KORINTUS 9

¹Beu, mee? ani pipikadoke tita. Beu, mee? ani eti-awita me idaana. Beu, mee? iniija e boko te boko nijaduwa-tai me Jesus kidi ani edota. Beu mee? ikii ke Tuhan duba anija kei teeteida ka ewaa kidaa bagee.

²Kou danite joko ka bageepa ani eti-awita me kidi beu kipa ko, ikeepa ko ani eti-awita me kidija; ikii ke Tuhan duba kou ko ani eti-awita me mana kodo boko duwadoke.

³Kii ke anija wo etii mana, igi najakai bageepa.

⁴Inii nai ko dá, mee?

⁵Inii maakodo gai me kodo waka te ouwija, mee? joko ka etiawitaido ma, Tuhanja kenekaane ma, Kepas kidi ma danite ko.

⁶Mee? ani ma Barnabas ma kede to, gane ka kei tai agijo aajaikai ko dá, mee?

⁷Meija okai kidaa edaja agijo maida serdado kija? Meija uta ijoo wejake uta te noja? Juwa, meija sapi munijake amauwo te noja?

⁸Me ka gaijaidaiga to kiteega, mee? dijo douja mana maija enii beu mana, mee?

⁹Musaja dijo dou mana duba ebijamakita kouja: Sapi ka uta gotomijake teetigo ebe te jatakimai. Ugatameja sapi kodo dimi egai, mee?

¹⁰Mee? kou mana inii jato maida make to wegai. Inii maida make ebijamakita, maki jugee tija me kidaa dimi kotopijawijake maki jugee tija kodo, daana duwaja me kidaa okai didee motii dimi kotopijawijake uta duwaja.

¹¹Ikii jupi inii Roh ka ijoo wepe ko, ibo mana, mee? kou danite makiida ka uta ikeepa duwape ko.

¹²Joko ka bagee ikeepa make motija keetigo, inii ke umina kodo ko. Kodeja kou mana inii te jakimakai, kodeja inii utoma agijo gaduwajawii to, Keristus ajii mana kodo wate-wate te tetijake.

¹³Ikii ewo, mee? Ugatameja owaa kei te-tai bagee kede Ugatameja owaapa make naija agijo domakija kodo; daana jo-menijaida douto-tai bagee kede jo-menijaida make okei didee motija kodo.

¹⁴Kou dani maija, Tuhanja boko duwajawita, ajii mana wudetai bagee kede ajii mana maida make gai peu agijo motii.

¹⁵Kodeja kei manaido ena ma ani te kei tai. Dedaana naakei te-tijake kou mana kodo kapogeije ebijai ko beu. Kou mana kou ma ko ani ki bokai enaa. Meena ma beu anija ibo gai kou ko epa beu naawiitagi.

¹⁶Ani ajii mana wudipa ko, kou maida make ibo gai beu. Gai peu mana ani maida nadokijawii kouja. Ani peu kidoke no! ani kou danite ajii mana te wudipa ko.

¹⁷Ani kidaa dimiidaiga kou kei tipa aneepa petege topa; kodeja kou danite ani kidaa dimiidaiga beu kipa ko, ekowatijake maakodo nagajawita.

¹⁸Okai kouja, anija petege ko kawo ko no! Kii ke: Ani ‘ajii mana kou ko ojaa kidi wudii, ajii mana wudeete duba kodo anija pijo mana kei tai beu.

¹⁹Ani me utomaapa make pipikadoke tita kodeja, ani akaato me utoma ojaa to jakei te-tai dabaa awita, me euga wedaba egomotiine tijake.

²⁰Jahudi bageepa ani Jahudi dani bukaa kai, Jahudi egomotiine; dijo do-tai bageepa ani dijo do-tai dani bukaa kai, ani dijo dou mana maida ko beu kodeja, dijo do-tai bagee egomotiine.

²¹Dijo dou mana ko beu bageepa ani dijo dou mana ko beu dani bukaa — Ugatame jumaapa dijo douja mana maida make pipikadoke beu kodeja, kodeja Keristus dijo douja mana ejuwai to — dijo dou mana ko beu bagee kede ego-motiine tijake.

²²Debuu bageepa ani debuu bagee dani kai, debuu bagee ego-motiine. Ani utoma bageepa utoma agijo utoma kei tai, umina kei tigoona me wija wido ajii etijawiine tijake.

²³Utoma agijo utoma ani ajii mana maida make to kei tai, okai kou kodo ani didee dani go-motiine tijake.

²⁴Ikii ewo, mee? akaatiga titaida kodaa tibigi to uweete bagee utoma tibigi uwii, kodeja me idaana to eetigai. Ikii na kou danite akaatiga tai, petee ke-tita.

²⁵Weewee te-taida akagaado te-tai bagee kede utoma agijo duba akaato munii, peu kija petege go-mote-tita; kodeja iniija ka ko peu te kija.

²⁶Okai kouja ani kou danite tibigi to tai, utoopa ko beu; anija wagija agijo maija, ukija wagija dani ko beu.

²⁷Kodeja ani kidaa má jato peepu tijawijake daba ejaikai, ani joko ka bagee etopijake ani ki peu kidoke tai na kojoka, gajake.