Read Ekari 2 KORINTUS 11 Bible Online

2 KORINTUS 11 - Ekari bible

2 KORINTUS 11

¹Ani ide kodaa anija dimi beu kidoke maida make ko ikii mijo gaa kojáá nadoutou. Beu maa, kojáá peu kidi nadoutou to.

²Ani ikii maida make jimubeu kidi didi gai kouja; jame idaanaapa kitogijaweetega kouja, jimubeu api jokaagaa kodo danite Keristus kidiipa keewiine tijake.

³Kodeja ani weda kodaa, jina kodaa go-mote ga-moteidaiga Hawa puja eukita danite, ikiija ka dimi kodo peu kijake jimubeu kidi kegepa doodoudaiga Keristus ejakimakai dimi kodoopa make uneune kitijawii.

⁴Kou danite me idaana mejake joko ka Keristus iniija ka mana kitii beu kidi kiti-kinipi juwa, ikii jakeetega dimi kodo ma joko ka dimi jakipa juwa; ikii jakimakeetega ajii mana ma joko ka jakimakipa juwa, ikii egaa kodo jaki-motii to.

⁵Ani ki wo etige eti-awitaido kede ma ko mijo ko beu gai.

⁶Ani mana wegai ewo dani kipa maija, ani epi mana kodo kou dani ko beu. Utoma takaidaiga kou mana kodo me utoma jupi ikeepa kimuwakeetega.

⁷Ani peu, mee? ani akaato mijo awijake ikii ke ibo keewii kou ko, ani Ugatameja ajii mana kodo ojaa to kijawudeetega kodo.

⁸Joko ka maakodo gai uguupuguu kodo jabokomeetega, okeepa make ageja motijake kijakei tai kouja.

⁹Dedaana ikeepa tootega gaa ani agijo beu kijake ani me idaana ma gaagaa te etijawii; Makedonia make meta iniikeneka kedaa anija gai peu agijoudo tiki naatii kouja. Utoma agijo duba gaagaa ti kitijawiine akaato jakijake wado na jakiita.

¹⁰Keristus maakodo bokouto ani duba topa kodo maida make kitiine, anija kobidoke mana kou ko Achaja dokoo kodaa te naduwajawija.

¹¹Magijo ka? Ani ipa ti kigai kouja, mee? Ugatame epi kidi.

¹²Ani kei teiga kodo kei te-wo to, iniija kei teige dani okei na kei teigai puga taine bagee kede mana kodo daba jajaikaine tijake.

¹³Kei dani bagee kede ke eti-awita bagee puga kiija; puja eukaidaiga kei te-tai; Keristusja eti-awita bagee jaijo.

¹⁴Kou mana ko ego takuu-takuu mana ko beu; Teege kidaa aweida ka etigo-tai puga te-tai kouja.

¹⁵Okai kouja ego takuu-takuu mana ko beu, kou danite eepetai bagee maija enaa mana eepeete puga ti-toojogo. Okeija momogi ko okei kei teigai danite abu japai.

¹⁶Kigeena ma kitiine, me idaana ka ma ani dimi beu ki te nagai. Kodeja ikii kou danite nagapa ko, dimi beu me danite kojáá nadoutou, ani mijo gaa kobidoke taine tijake.

¹⁷Ani wegaate mana kii ke Tuhanja dimiidaiga wegai ko beu, kodeja dimi beu me ka uu kigoona akaato kobidoke taine danite.

¹⁸Me wedaba makiida ka ijeidaiga kobidoke teigai kouja, daana ani maija kobidoke taipiga.

¹⁹Ikii ide gajake dimi beu bagee kojáá edoutou, ikii kede dimi jago kouja.

²⁰Ikii gaduwagoo to, kou danite me ka daba kijaiki-toojogo, daana kinojawi-toojogo, daana agijo kijabokomi-toojogo, daana akaato ibo awi-toojogo, daana ebepeka ganaatabe kiti-toojogo.

²¹Ani ego ka kitii, inii debuu bagee jaijo. Kodeja joko ka bagee uu manaida kodo — ani dimi beudaiga wegai ko — ani na uu kodo.

²²Okei Iberani bagee, mee? Okai kou dani ani maija. Okei Israil bagee, mee? Okai kou dani ani na. Okei Ibrahim ka ekebata, mee? Ani na.

²³Okei Keristus jakei te-tai bagee, mee? (Ani enijaanija dani bukaa wegai), ani ki euga kidi. Kaga ma kode kigii euga wedaba; wanee owaa duba euga wedaba; umina kopa nagii; kigeena wageena bokaine dani.

²⁴Jahudi bageeja ka ko kigi idibi nagii, kigeenaida ka ko mepiija awiine ko ena to beu.

²⁵Kigi wido kopa ka nagii; kigeena mogo ka nagigoo. Kigi wido koma gakumidaa; unoona ma agapeena ma maikaida taadoke.

²⁶Ita na umina; onee maida peu kaine dani; moonaa bagee ka peepu tijawiidaiga; ani tuma ka peepu tijawiidaiga; ojaa bagee ka peepu tijawiidaiga; maki okogouda peu kaine dani; me beuda peu kaine dani; maikaida peu kaine dani; matabe keneka bagee ka peepu tijawiidaiga.

²⁷Ee ma, gaagaa ma; kigeena wageena doutou ma; naidi ma uwo gewe-gewe ma; kigeena wageena te nai ma; oo ma, kagaba beu ma.

²⁸Tijake kei agijoudo kei ma ko joko ka maija, naago gakita maakodo gai uguupuguu utoma maida make gaagaa to tigoo.

²⁹Meija debee kijake ani ki debee te gaja kodo? Meija duwaa-duwaa tidoke tijake ani kegepa juwikigi te tija?

³⁰Kou danite ani kobidoke tai ko beu kai peu gapa ko, anija debee kodo maida make kobidoke taipiga.

³¹Ugatame, Tuhan Jesus Nakame kidi umina muta etuwaja me kidi epi, ani puja beu.

³²Damsjik makiida kodaa jakimake-tai me Aretas mijo ka Gubernur kidaa Damsjik makiida ewanai, najakaine tijake.

³³Kodeja maki okogo ka eda tokogouga edu tapuja duba mijouwe naawijake okaija ganeida make ani pipikadoke tita.