Read Ekari 2 KORINTUS 12 Bible Online

2 KORINTUS 12 - Ekari bible

2 KORINTUS 12

¹Ani kobidoke tai ko gai peu. Epa beu kodeja Tuhan kidiipa make dota mana ma, ewaida naawita mana ma, wegaipiga.

²Keristus duba ka me idaana ani epi. Taun wii ma gaati umitaato kii me kidi ki widaago epa kabuudaapa wado ebukigota. Má ma juwa, má ma ko beu juwa, ani ewo. Ugatame to epi.

³Ani epi kii me kidi — má ma juwa, má ma ko beu juwa, ani ewo; Ugatame to epi —

⁴okai waiko pipoga makiida ebukigojake wegai ma peu manaido juwii; kou ko me ka wegai ko dá mana.

⁵Kii me kidi jatouga ani kobidoke tai; kodeja ani kidi jatouga kobidoke beu; kodeja anija debee manaido maida make to.

⁶Kou danite ani kobidoke taine no! gapa ko, ani dimi beu ko beu, ani maakodo wegai kouja. Kodeja ani mijo jaikai, me ka aneepa make dou ma, juwii ma, manaido ma ko abuma te naga-tita.

⁷Tijake aneepa ewaida naawita manaido umina ewaga maida make ani ibo puga te te-tijake, anija má maida dogo napitume-tita naimita; kou ko Teege ka ebadikumita kodo, nagigoo te-tita, ani ibo puga te te-tijake.

⁸Kigi wido ani Tuhan ediimai, kou mana maida make pipikadoke taine tijake.

⁹Kodeja okaija eneete mana. „Anija jikoo bokouto aki tiki, anija bida agijo kodo debee maida boko duwadoke kouja,” enita. Okai kouja ani umina ideide ma debee maida kodaa kobidoke tai, Keristusja bida agijo ani maida to-tijake.

¹⁰Okai kouja, debee agijoudo ma, widogai ma, gaagaa ma, peepu ma, tetepepe ma, Keristus maida make dokii ko ani ideide tai. Ani debee gaa kodaa ani bida kouja.

¹¹Ani dimi beu keega! Kodeja ikii kede tapa tapa natai. Ikiija ka ani ki maa naawegai enaa. Wo etige ka eti-awitaido kede ma ko ani tumaana agijo beu kai beu kouja, ani epa beu kipa maija.

¹²Eti-awitaido puki ka tegee dou agijoudo ikii jupi kei tita kouja; ani kegepa animakijake dou beu agijo ma, ego takuu-takuu agijo ma, bida agijo ma kei tei tita kodo.

¹³Joko ka maakodo gai uguupuguu ma ko kawi ka mana takaa ki ikeepa ko beu? Ani gaagaa ti kitijawii kouja to, mee? Anija peu kou ko ipa najaikai.

¹⁴Ito kou widaagouda kidou jawiine gaate, daana ani gaagaa ti kitijawiita. Ani ikiija agijo kodo ubai ko beu kouja, kodeja ikii kede to. Jokaane kodaa ukame nakame epeepi jatijawii ko beu kouja, kodeja nakame ukame kodaa jokaane maida make.

¹⁵Ikii maida make ani umina ideide ma mapugajawijake kijamapugadoke tai. Ani umina abuma ipa kigapa ko, ikiija ka ipa te naga-wo tija, mee?

¹⁶Kou danite ani gaagaa kitijawii beu kipa maija, ani ga-motii epi kouja bibina-moteidaiga gadi keetii wegaigai.

¹⁷Ikeepa kijaebadikumita bageido kedaa ikiija agijo ani kijabokomeetega, mee?

¹⁸Titus ikeepa uwii ediimeetega, daana iniikeneka okai ma enaimo. Titus kidi kijabokomeetegi, mee? Inai wija ena kegepaidaiga aakei tai beu, mee? Enaitaiga auwai kidi ki, beu, mee?

¹⁹Inii akaato mana pitokaine tijake kiteete nigaaga, mee? Inii Ugatame pekaida Keristus dubaiga mana wegai, bo kijawejawiine tijake, kowaa kei, noogei dideemaido.

²⁰Ani weda gaate kouja, ani ikeepa dakii tijake ani ide gata danite ti kidomakaita, daana ikii ide gata danite te nadou. Ani weda, akaije juwa, be akaga dimi juwa, emoge akaga juwa, akawude mana juwa, me eduwai juwa, kitigi motigi mana juwa, ibo puga mana juwa, kigikuwa manaido juwa, toutai beuje, gajake.

²¹Ani weda, ani jawipa ko, anija Ugatame kidaa ikii jumaapa ego natijawiitagi, tijake me wedaba mijaato peu kei tita bagee maida make ani gaagaa taita, okeija nokii agijo ma, mogai ma, wo uwe-tai ma, kei tijake kodo tedemai beu tita bagee kede.