Read Ekari 2 KORINTUS 13 Bible Online

2 KORINTUS 13 - Ekari bible

2 KORINTUS 13

¹Kii ko kigi widaago ani ikeepa jawii. Mana gakita dota bagee wija juwa, wido juwa, ka tadu atii beu kai peu.

²Mijaato peu kei tita bagee kede ani eteetega, daana joko kaido maija, daana ito kou maija ani etii, ani ikeepa beu gaa, ani kigi wijaagouda kidogootega gaa eteetega kodo danite, ani kigeena ma jawipa ko ani meena ma te ejaikaita.

³Keristus ani duba wegaate ikii ewaida doune kouja. Okai ikeepa debee beu, kodeja ikii duba bida jago kidi.

⁴Okai debeidaiga pija boko maida edajawita kodeja Ugatameja bidaidaiga ija topi. Inii maija okai duba debee tope, kodeja ikii maida make inii okai ma enaimo Ugatameja bidaidaiga toutage.

⁵Ikii akaato igi jakimakai, ikii maakodo gai duba topa, mee? tijake. Ikii akaato gaado tai. Ikii ewo, mee? Jesus Keristus kidi ikii duba; ikii gaado tiga tijake matabe beu ki-toojogo ko.

⁶Kodeja ani ide, inii ke matabe beu kodo ikii nidomakaita.

⁷Kodeja ani Ugatame ediimai, ikii peu agijo te kei te-tita. Inii ke enaa niga-tijake ko beu, kodeja ikii ke enaa agijo kei te-tita, inii ke jimu anija nigapa maija.

⁸Inii tumaana agijo ka maakodo mana akaije te timake kouja, kodeja maakodo mana maida make to.

⁹Inii ideide umina inii debee kipe daana ikii ke bida. Ikii boko duwadoke te-tijake sembahjang kijakimakai.

¹⁰Okai kouja ani poto make kou kijaebijamakai; kou danite ani dakii tipa ko, ani bida peu kidi ti kitiine tijake, Tuhanja boko naduwajawiidaiga kodo, bo kiwejawe-tijake, peu keewiine ko beu.

¹¹Muumai jato ki, kowaa kei, noogeimaido, kojáá tou; boko duwajawii; najuwai to tai; ena dimi to kepajawii; muka-mukaidaiga ume-wo; tijake ipa bokouto muka-muka bokouto Ugatame kidaa keetoutagi.

¹²Jimubeudaiga amaimu akajume tai.

¹³Jimubeu bagee utoma kojáá tou kitii.

¹⁴Tuhan Jesus Keristus jikoo bokouto ma, Ugatameja ipa bokouto ma, Rohulkudus ma enaimo akagadime tijawii dimi ma, ikii wa keetou to.