Read Ekari 2 KORINTUS 7 Bible Online

2 KORINTUS 7 - Ekari bible

2 KORINTUS 7

¹Kei dani nijatogijawita manaido ineepa topai kouja, kowaa kei noogei dideemaido, má ma kegepa ma maida ka nokii agijo maida make neewitogikumiwei; tijake Ugatame weda egajakeidaiga jimubeu mana boko needuwajawiwei.

²Ineepa kegepa kebajawii; inii meena ma peepu te etai kodo; meena ma peu eewii beu; meena ma okai agijo jabokomai beu.

³Ani kou dani kitii, ikii ke peu keewiine ko beu; mijaato kiteetega kouja, ikii ke iniija kegepa duba, enaimo bokai kipe na, umi-tou kipe na.

⁴Ani ikii maida umina dimi kotopijawii, daana umina ikii maida kobidoke tai; ani gaduwai dimi kodo namaipajawita; iniija ka gaagaa umina duba kodo maija ideide umina timakai.

⁵Inii Makedonia dakii tijake inii dimi aweida beu, kodeja utoma manaidaiga gaagaa to; tapouda ko akaije; tugouda ko weda.

⁶Kodeja gaagaa teetigouda ka bagee kede mobu mene-tai me Ugatame kidaa Titus mejakeidaiga mobu niimita.

⁷Daana okaija mejakeidaiga to ko beu, kodeja ikiija ka jamaipajawita kodo maija, ikiija ka ei nigata dimi eni-niimita kodo; ikiija ka jege kodo, daana ikiija ka ani maida make umina naaekowai; tijake ani umina kodo ideide timakai.

⁸Anija kapogeije kijaebijaatega kodo gaagaa kitijawii kodeja ani gaagaa beu. Ani gaagaa gata kodeja, (kapogeije kodo maida make ikii gaagaa tita kidojake kouja, mijo gaa to kodeja).

⁹Ito kou ani ideide, ikii gaagaa tita kodo maida make ko beu, kodeja gaagaa tiga tijake tedemai kouja; ikiija ka gaagaa kodo Ugatameja dimiidaiga kouja, inii maida make ikii tumaana agijo ma peu te ke-tijake.

¹⁰Ugatameja dimiidaiga ka gaagaa kodaa ajii tai jatouga tedemai mana kei tijawii kouja, gaagaa te gaja mana kodo. Kodeja makiida ka gaagaa kou ko bokai jatouga mana kodo to.

¹¹Ugatameja dimiidaiga gaagaa teetega kodaa ewaa kijaawita mana kodo dimi gaawei! Ikii umina maa kou kegepa doodoo kodo, daana akaato kegai ma, nokii dimi ma, weda dimi ma, didi dimi ma, enanauto ma, abu pai ma. Utoma takaida ikii ke kou manaida jimubeu kodo ewaida keega.

¹²Okai kouja, ani kijaebijaatega kodeja, peu kei tita me maida make ko beu, daana peu eewita me maida make na beu, kodeja ikiija ka ei nigai dimi kodo ikeepa ewaida ke-tita Ugatame pekaida.

¹³Okai kou maida make kodo inii dimi nimaipajawii. Dedaana iniija ka ideide to ko beu, kodeja Titusja ideide dimi maida make euga ideide maija, ikiija ka mobu eeweetega kouja.

¹⁴Ani ikii maida make kobidoke mana etipa ko ani ego gai beu; kodeja inii kiteetege mana utoma ko maakodo danite, kou dani maija ikii maida make kobidoke mana Titus eteetega kodo maija maakodo kojoka ewaida kai.

¹⁵Okaija kegepa umina ikeepa gokobaki tijawita, ikiija ka juwidoke mana kodo gajake, daana ikiija ka weda ma, pigi-pigi ma ka ejakimakita kodo.

¹⁶Daana ani ideide umina, ikii maida ani epaapa timakai kouja.