Read Ekari GALATIA 2 Bible Online

GALATIA 2 - Ekari bible

GALATIA 2

¹Taun wii ma gaati umimakijake ani kigeena ma Jerusalim wado uwii, Barnabas ma enaimo, Titus maija ouwijake.

²Ugatameja enijake ani wado uwii. Tijake anija ojaa bageepa wudei tita ka ajii mana kodo ani eti-menii; ani ibo ejaikita kede okeiniinii etii. Anija kei teete agijo juwa, kei tita ka juwa, wogidaa kidoke na kojoka gajake.

³Titus ani ma enaimo kidi Gerika ka me kidija iniitodo duwai okei etii beu;

⁴maakodo gai puga bagee gabouga oometa kede maida make, inii Keristus Jesus duba pipikadoke mana bido doune meta, bida peu nitagimimakaine tijake.

⁵Inii kei bagee ejuwidoke tai beu, mijo gaa to kipa maija; ajii mana ka maakodo bokouto kodo kijamadagajawiine tijake.

⁶Daana ibo ejaikita daniido maida make ko, (kawe dani ka ibo kodo juwa ko ani ki ewo, Ugatameja me ebepeka ewitokai beu kouja;) kei ibo daniido kei ke manaana ma abuma enii beu tita.

⁷Kodeja okei gai, iniitodo duwai beu bageepa ajii mana jawudii mana kodo nadokijawita, Peterus kidi iniitodo duwata bageepa mana jawude-tijake jadokijawita kodo danite.

⁸(Iniitodo duwai bagee maida make eti-awita me mana kodo Peterus duba ewaa awita me kidaa ani ki ojaa bagee maida make najaikai.)

⁹Jikoo bokouto naduwajawita kodo nadojake ko, Jakub ma Kepas ma Jahja ma, kei ke tuku kede, okei ani ma Barnabas ma gane paijai nitai, ena dimi kepajawii manaida kodaa, inai ojaa bageepa auwe-tita, tijake okei ke iniitodo duwai bageepa uwii.

¹⁰Inii daba bagee kede ega-tou to okei ide; daana ani na kou kei taine dimi.

¹¹Peterus Antiochia uwijake ani me pekaida akaije ootai, okai peu manaida kouja.

¹²Jakubpa make me wija wido mei beu gaa okai ojaa bagee ma enaimo oonai; kodeja okei mejake okai wouga kijake okainiinii kai, iniitodo duwata bagee weda egajake kouja.

¹³Joko ka Jahudi bagee maija okai ma enaimo matabe, tijake Barnabas kidi maija okeija ka matabe ka wo ekeenijawita.

¹⁴Kodeja kou dani tijake ajii mana ka maakodo bokouto kodo pidou pidou beu kodo ani dojake okei utoma pekaida ani Kepas kidiipa etii: „Aki ki Jahudi ka me kidija ojaa bagee ijeidaiga umipe ko, daana Jahudi ijeida ko beu, no, kawe dani tijake ojaa bagee kede Jahudi ijeidaiga umii etija?” etita.

¹⁵Inii ke epauto Jahudi bagee, daana peu kei te-tai ka ojaa bagee beu

¹⁶kidija inii epi, Musaja dijo douja mana kodo dijo dojaidaiga me maa awii beu, kodeja Jesus Keristus maakodo egajake ko; tijake inii kei maija Keristus Jesus kidi maakodo egata, Keristus maakodo egaidaiga maa neewe-tijake, Musaja dijo douja mana kodo dijo dojaidaiga ko beu; Musaja dijo douja mana kodo dijo dojaidaiga meena ma maa eewii beu kouja.

¹⁷Kodeja inii Keristus duba maa neewii inii uba-toojogo ko, inii ke peu bagee kede nidomaki-toojogo ko, Keristus kidi peu agijo ewaa awii me keegi, mee? Umina ko beu.

¹⁸Ani peu aweetega agijo ani kigeena ma ewaa awi-toojogo ko, maakidi, ani akaato peu awii.

¹⁹Ani Musaja dijo douja manaidaiga kodaa Musaja dijo douja mana maida make bokai, ani Ugatame jatouga ume-wo te-tita.

²⁰Ani Keristus kidi ma enaimo pija boko maida nadajawita; tijake ani ki beu kidija Keristus kidi ani duba topi; tijake ani ito kou me má topa ko, ani Ugatame Joka kidi maakodo egaidaiga topa, ani ipa nagajake ani maida make akaato naaekegajawita me kidi.

²¹Ani Ugatameja jikoo bokouto kodo wogidaa tijawii beu. Me maa eewii kou ko Musaja dijo douja manaidaiga naako, Keristusja bokata mana kodo wogidaa ti-toja.