Read Ekari GALATIA 4 Bible Online

GALATIA 4 - Ekari bible

GALATIA 4

¹Agijo gowaja me kidi jokaida gaa kodaa ejakimakita me kidi dani bukaa, utoma agijo okai ipuwe to kidija.

²Kodeja nakameja putu gadimita naagouda to emune-tai bageeja ka bida duba tou.

³Inii na kou dani: inii jokaida gaa kodaa inii makiida ka epauto manaido ka bida peu nijakimakita.

⁴Kodeja putu duwadoke tita gaa kodaa Ugatameja Jokame ebadikumita, jagamo ka epajawita, daana Musaja dijo douja manaidaiga tagi atita.

⁵Musaja dijo douja manaidaiga tagi atita bagee kede epipikajawiine tijake, inii nibukita jokaane ke-tijake.

⁶Ikii okai jokaane kouja Ugatameja Jokame ka Roh kodo iniija kegepa duba nijaebadikumita, kei teete mana, „Ei, Naitai.”

⁷Okai kou dani tijake aki bida peu kajakimakita me ko beu kodeja jokame, daana jokame keetigo ko Ugatameepa make gowaja me kidi.

⁸Ikii mijaato Ugatame ewo gaa kodaa ikii maakodo agijo ko beu kodoopa juwei tita.

⁹Kodeja ito kou ikii Ugatame epi kijake, kou ko, okaija ka ikii kidomakijake ko, kawe dani tijake ikii debee ma daba ma ka makiida ka epauto manaidoopa wouga kai, kigeena ma bida peu kidi kijakimake-tijake.

¹⁰Ikii naago ma, agoo ma, ibo wagi ma, taun ma dijo do-tai.

¹¹Ani weda gaate, ani ikii maida make kode kigii tei tita kodo wogidaa tidoke na kojoka.

¹²Ei, noogeimaido, ani kidiimai, ikii ani dani bukaa kai, ani na ikii dani kai kouja. Daana ikii ena ma peu naawii beu.

¹³Ikii epi ani má jato debeidaiga ani edoga kidi ajii mana kijawudeetega.

¹⁴Ani má maida agijo kodo kigaado tai kodeja ikii nokii nagai juwa, nakonai juwa, ko beu, kodeja Ugatame jaetigo-tai dani bukaa nabukai, Keristus Jesus kidi dani bukaa.

¹⁵Ikiija ideide tita kodo kaija igadoke? Ani mana keewegai kouja, ikii kei timake naako, ikii kede peka nipo gobajawijake ani naimi-toja.

¹⁶Ani maakodo mana kitii kouja ikii ma jape keega, mee?

¹⁷Okei ikii maida make ekowa-motii doodoo manaida ko beu; kodeja okei wo kiwajagijawiine, ikii okeepa wouga ketijake.

¹⁸Me ka inii maida make umina ekowa-motii enaa, enaa mana maida make ko; ani ikeepa topa gaa to ko beu.

¹⁹Ei, ani jokaaneido, ani ikii maida make kigeena ma joka didi teete Keristus kidi ikii tine kitaida to.

²⁰Ani ito ikeepa tou naako enaa, anija mana wuu kodo akapaka taine kodaa; ikii maida make ani duwaa-duwaa teete kouja.

²¹Enidodou, ikii Musaja dijo douja mana maida kaine bagee kede, ikii Musaja dijo douja mana kodo juwii beu, mee?

²²Ibrahim kidi joka ida wija makita mana kodo ebijata kouja; ena ki ejakimakita jagamo ka joka, daana ena ka kidi ki jagamome puki ka joka.

²³Ejakimakita jagamo ka joka kidi me ijeidaiga epamakita, kodeja jagamome puki ka joka kidi togijawita manaidaiga.

²⁴Kou ko ena dani awe-tai mana kodo: Jagamo ida wija kou ko togijawita mana wija kodo. Ena ko Torsina bagouda make bida peu ejakimakai manaida joka makii, kou ko Hagar kodo.

²⁵Hagar kou ko Torsina bago kodo Arab makiida, ito kou ka Jerusalim dani bukaa; kou ko bida peu kodo ejakimakita kouja, okaija ka jokaane ma enaimo.

²⁶Kodeja waikaato ka Jerusalim kou ko epipikajawita, iniukai kodo.

²⁷Kapogeije ebijamakita kouja: Ideide tidou! ei, pija kijake joka makii beu me, Ideide umina no! joka didi beu me kodo; Wakaago kodo ma ko ejaikita jagamo kodo joka wedaba.

²⁸Inii kei, ei, noogeimaido, Isak dani bukaa togijawita mana ka jokaane kede.

²⁹Okai kou wagiida me ijeidaiga epamakita me kidaa Roh manaidaiga epamakita kidi peepu etita danite, ito kou maija kou dani.

³⁰Kodeja ugata mana kodo kawe dani? Ejakimakita ukakaija kodo eebakikumiii; ejakimakita jagamo ka jokame kidi jagamome puki ka jokame ma enaimo te oogowai kouja.

³¹Kojoka, ei, noogeimaido, inii ke ejakimakita jagamo ka jokaane ko beu, kodeja jagamome puki ka jokaane kede.