Read Ekari GALATIA 6 Bible Online

GALATIA 6 - Ekari bible

GALATIA 6

¹Ei, noogeimaido, me idaana peu kei teete edomaki-toojogo ko, ikii Roh jago daniido kojáá peu kidi enaana etai. Aki akaato kidi gai, aki na kagaado tidoke na kojoka.

²Udo kugouto akadoke tai. Kou dani tijake Keristusja dijo douja mana kodo boko duwajawii.

³Me idaana kidi akaato ibo gapi, epa beu kidija, akaato kadee makeete.

⁴Kodeja me gakita akija-ekowa-ekowa agijo igi jakidowei, tijake kobidoke dimi kodo akaato maida to, me ino maida ko beu.

⁵Me gakita akija-kugo-kugo dokidoke kouja.

⁶Mana etopita me kidi enaa agijo utoma etope-tai kidi ma oowudii.

⁷Uneune te tai; Ugatame kidi te ewitinija; me ka weta agijo okai kou kodo uta duwai kouja.

⁸Meija me ijeidaiga ijoo wepi, me ijeidaiga peu kai uta duwaitagi; kodeja meija Roh maidaiga ijoo wepi, Roh maidaiga ajii tai imo to togoo uta duwaitagi.

⁹Enaa agijo kei tai ko odoo te neekai; inii uta duwaja gaa kodo duwaitage, te jaikipe ko.

¹⁰Okai kouja, kei tija wagi kijake ko utoma bagee maida make enaa agijo neekei tai, daana epauto ko, maakodo gai uguupuguu maida make ko.

¹¹Ani kidaa gane ka kijaebijaate mana kodo ibo aweega no! dodowei.

¹²Okei ebaidaiga manaida kobidoke taine bagee kede iniitodo duwai kiteete, Keristusja pija boko maida make peepu mana kodo te gaduwaine tijake.

¹³Okei iniitodo duwata bagee kede maija Musaja dijo douja mana kodo dijo domakai beu kodeja, ikii ke iniitodo kijaduwaine, ikiija ebaidaiga mana maida make kobidoke taine tijake.

¹⁴Kodeja kobidoke tai mana kodo aneepa make poto naawii to, iniija e boko te boko nijaduwa-tai me Jesus Keristus kidi pija boko manaida kodaa to; okai kou manaidaiga ani maida make makiida ko pija boko maida edajawita, daana ani ki makiida maida make maija nadajawita.

¹⁵Iniitodo duwai juwa, iniitodo duwai beu juwa, epa beu to, kodeja ija ugadoke tita mana to.

¹⁶Kou manaidaiga ume-wo bagee maida muka-muka bokouto ma, ipa bokouto ma duwadoke tai enaa, daana Ugatameja Israil bageepa maija.

¹⁷Ito make wado me ka gaagaa te natai. Jesusja jobeido kodo anija má maida dokii kouja.

¹⁸Iniija Tuhan Jesus Keristusja jikoo bokouto kodo ikiija ka roh ma keetou to, ei, noogeimaido. Amin.