Read Ekari PILIPI 3 Bible Online

PILIPI 3 - Ekari bible

PILIPI 3

¹Muumai jago, ei, noogeimaido, Tuhan duba ideide tiwei. Kou dani mana kijaebijai ko ani odoo beu, ikii enaa keewii mana kodo.

²Dodi maida make ikii akaato munii; peu kei te-tai bagee kede me tine duwa-tai bagee maida make akaato munii.

³Inii ke maakidi ka iniitodo duwai bagee kede, inii Roh ma Ugatame migaakobe etai bagee, daana Keristus Jesus maida make kobidoke tai, daana ebaidaiga manaida dimi kotopijawii beu.

⁴Ani na ebaidaiga mana dimi kotopijawii na enaa kodeja. Me ino ebaidaiga mana dimi kotopijawiine gapai ko, ani ki euga kidi.

⁵Uno waguwo umijake iniitodo naduwata; Israil epauto, Benjamin epaida, Iberani ka mijo ekebata ka Iberani kidi; Musaja dijo douja mana maida make ko, Parisi bagee;

⁶woowii maida make ko, maakodo gai uguupuguu peepu etigoo; Musaja dijo douja mana maida make ko anaani beu kidi.

⁷Kodeja ani epaago mana kou ko ani Keristus kidi maida make nauwadoke mana kodo gai.

⁸Beu maa kou, utoma agijo utoma nauwadoke mana to gai, e boko te boko naduwa-tai me Keristus Jesus kidi egamakai ma ko akanawa te tija. Okai maida make ani utoma agijo utoma nauwajake jimu ejaikai, Keristus kidi awiine tijake,

⁹daana okai duba nadomakai enaa, ani kidaa maakodo bokouto kodo awijake ko beu, dijo douja mana maida ka kodo, kodeja Keristus maakodo egai epauto ka kodo, Ugatame epauto ka maakodo bokouto kodo, maakodo gai maida tawadoke.

¹⁰Ani okai ki egaine kodaa, daana okaija anigota ka bida bokouto kodo, tijake okaija didi gaduwai ko oogaduwaine, okaija bokata manaida okai dani bukaa kaine tijake;

¹¹bokata bagee jupi make anigou kodo goune kodaa.

¹²Ani googa jaijo; juwa, boko naduwajawita jaijo. Kodeja ani juma doodoo epeedou, jakimakaine kodaa, Keristus Jesus kidaa najakimakita kouja.

¹³Ei, noogeimaido, ani jakimakeega kojoka gai beu topa, kodeja tumaana to kei tidou: mijaato ka manaido jamaadaku tijawijake wadaato ka manaido bopi kepai.

¹⁴Dimi kotopijawiida epeedou, Ugatameja Keristus Jesus duba wado mana niteete petege kodo.

¹⁵Inii boko duwajawita kede kou dani neegai; tijake tumaana agijo maida ikii ino ka dimi ga-toojogo ko, Ugatame kidaa kou maija ewaida kijaawiitagi.

¹⁶Kodeja inii dakii teetegeida okai kou kodo juma doodoo neetai.

¹⁷Ei, noogeimaido, ikii utoma anija komuga kinita kodo naapei, tijake kou dani ume-wo bagee epeepite gai, inii komuga kinita kodo danite.

¹⁸Me wedaba topai kouja, ani mijaato kigi inoudo kiteetega, daana ito kou jege ma kitii, okeija ka ume-wo ijeida ko Keristusja pija boko kodo ma jape.

¹⁹Momogiida ko peu kai; okeija modo to etido-tai; ego gaja agijo kobidoke tai; makiida ka agijo to dimi tadu atii.

²⁰Kodeja iniija ka maki puki kou ko epaawado; kouda make ko ajii bokouto nijaduwa-tai me Jesus Keristus kidi meitagiida inii edoutou; e boko te boko nijaduwa-tai me kidi.

²¹Iniija ka nidou peu má jato kodo okaija ka agakato dani má jato dani bukaa iginikiniki nitijawiitagi, okai kou bidaidaiga kodaa, utoma agijo utoma okaapa to ejuwidoke etijawii bida bokouto kodaa.