Read Ekari KOLOSE 3 Bible Online

KOLOSE 3 - Ekari bible

KOLOSE 3

¹Ikii Keristus ma enaimo keenigojawi-toojogo ko, waikaato ka manaido juma doodoo tai, Keristus topiida, Ugatame etikaato gebo animakitaida kodaa.

²Ikiija dimi mana kodo waikaato ka manaida dimi tadu atii, makiida ka manaida ko beu.

³Ikii bokata kouja, tijake ikiija umi-tou tija kodo Keristus ma enaimo Ugatame duba boonita.

⁴Keristus iniija ajii bokouto kidi ewaida kaitagiida, ikii maija okai ma enaimo ajiipiidaiga ewaida kaita.

⁵Okai kouja, ikii duba ka makiida ka ijee kodo bokajawii; kou ko, mogai, peu dimi, kikija epauto, peu agijo kibigi, me ka agijo kibigi, kii ke utoopa migaakobe tai ma ena kidi.

⁶Kei manaido keija Ugatameja emoge dimi mejawii manaido kodo.

⁷Ikii kei manaido tika kei tei tita, ikii kou duba umei tita gaa kodo.

⁸Kodeja ito kou kei agijoudo utoma betamigii, kou ko: emoge, boko, peu dimi, me eduwai, peu mana ikiija ebeida make ko.

⁹Puja mana akaate te tai, tika ka ijee kodo kei tai agijoudo ma betajaweetega kouja,

¹⁰tijake ija ka ijee makijawijake, Ugajawita me ijeidaiga epi ke-wo manaida ija ke-wo.

¹¹Kou manaida Gerika juwa, Jahudi juwa, ko beu mana; iniitodo duwai juwa, iniitodo duwai beu juwa, ko beu; manawei juwa, me no-tai juwa ko beu; bida peu ejakimakita juwa, ojaa juwa ko beu; kodeja Keristus kidi to epauto bokouto kidi utoma duba.

¹²Okai kouja ikii ke Ugatameja kiwitokijake jimubeu ma, ei kigata ma kede ke, kojáá dimi makijawii, ipa dimi, daba dimi, debee kegepa, kegepa animakijake;

¹³kojáá kojáá akaate tai, daana ipa akajaike tai, akaije mana ki-toojogo; Tuhanja ipa kijaikeetegi danite, ikii na ipa akajaike tai.

¹⁴Epauto mana kou ko ipa kodo, joko ka manaido utoma boko duwajawii mana kodo.

¹⁵Keristus epauto muka-muka kodo ikiija kegepa duba boko kijaduwajawii; ikii kou manaidaiga maana duba to mana kitita. Nigajaweege dimi kodo gai.

¹⁶Keristusja mana kodo ikii duba game-wo enaa; ikii dimi boko manaida akatope ma, mana akaate ma tai, ugaa manaida ma, muta etuwai ebetaataa manaida ma; kegepa duba Ugatameepa nigajaweege dimi gajake ebetaataa tai.

¹⁷Tijake ikiija kei tai agijo utoma, mana kipi maija, kei tai agijo kipi maija, Tuhan Jesus eka dubaiga to kei tai, Iniitai Ugatame kidi okai maidaiga muta etuwaate.

¹⁸Ei, jagamaane, ikiija jamaaneepa ejuwidoke tai, Tuhan duba kei tija kodo danite.

¹⁹Ei, jamaane, ikiija jagamaane ipa egai, daana peepu te etai.

²⁰Ei, jokaido, ikiija ukaane nakaane utoma agijo duba ejuwidoke tai, kii dani Tuhan juma dege dege kitai kouja.

²¹Ei, nakaane, ikiija jokaane emogaago te etai, kegepa odoo kai na kojoka.

²²Ei, me ka kijakimakita bagee, makiida ka manaida kitimake-tai bagee kede utoma manaida ejuwidoke to tai, me pekaida to ko beu, me ka juma dege dege kite-tijake ko beu, kodeja kegepa doodoudaiga Tuhan kidi weda egajake.

²³Ikiija kei tai aagijo taagijo kegepa puki ka kei tai, Tuhan kidiipa danite, meepa ko beu;

²⁴Tuhan kidiipa make abu kijapaja petege gouta gajake; ikii Tuhan Keristus kidi jakei te-tai kouja.

²⁵Peu me kidi okaija ka peu kei tita abu japai kouja, me ebepeka te witokijake.