Read Ekari KOLOSE 4 Bible Online

KOLOSE 4 - Ekari bible

KOLOSE 4

¹Ei, me etimake-tai bagee, ikiija ejakimakita bagee kede boko petai ma, jikoo ma etai, ikii ejuwe-tai me epaawado topi gajake.

²Sembahjang kodo bo wemakai; muta etuwai manaidaiga doutou to tai.

³Ani maija sembahjang najakimakai, Ugatameja mana maida make ita nijawade-tijake, Keristusja boone-boone mana kodo wegaine tijake; ani okai kou maida make nagadimimakijake topa.

⁴Ani ewaida awe-tijake, ani wegaja kodo danite.

⁵Ojaa bagee maida make epeepite gajake kei tai, kei tija wagi kodo epeepite madagajaweete.

⁶Ikiija mana kodo jikoo jikoo wegai, diga ka wagijake, me gakita wo etija mana kodo ga-tijake.

⁷Tichikus kidi ani maida make mana utoma kiti-kiniitagi; ani ei egata noogei kidi, Tuhan maida make enanauto ani ma kei te-tai kidi.

⁸Okai kou maida make ani ikeepa ebadikumii, inii kawe dani tope manaido kitiine tijake, daana ikiija kegepa kijamaipajawetijake.

⁹Okai ma enaimo enanauto ma, ei egata ma iniikeneka Onesimus kidi, ikiija ka me idaana kidi. Jakai ewaa kita manaido utoma okejai kiti-kiniitai.

¹⁰Ani ma enaimo egadimimakita Aristarchus kidi kojáá tou kiteegi, daana Markus kidi, Barnabas amakame (okai maida make mana ikii juweetega); ikeepa jawipi ko ejakimakai.

¹¹Daana Jesus kidi, Justus eebatita me kidi kojáá tou kiteegi. Kei to iniitodo duwata bagee ani ma enaimo Ugatameja jakimakita makiida maida make naakei te-tai kede; okei kegepa namaipajawii bagee.

¹²Epafras kidi, ikiija ka makijo ka me kidi, Keristus Jesus jakei te-tai kidi, kojáá tou kiteegi; sembahjang bida peu kijaki-tou to, ikii Ugatameja dimiidaiga boko duwadaa timake-tijake.

¹³Ani okai maida make jawegai, okai ikii maida make umina woowii, daana Laodikia ma, Hierapolis ma, bagee maida make.

¹⁴Lukasja kojáá tou kiteegi, ei egata doktoda kidi, daana Demas kidi maija.

¹⁵Laodikia ka enakeneka bagee kojáá tou naaetii, daana Numpas kodo ma, daana okaija owaapa kotuu te-tai bagee kede ma.

¹⁶Kii kapogeije ikii jupi ebatimakijake ko, Laodikia kotuu te-tai bagee maija ebatai, daana Laodikia jamakita kapogeije kodo ikii maija ebatai.

¹⁷Daana Archipus kidi naaetii: Tuhanja kei tija agijo kadokijawita kodo epeepite boko duwajawii, kateegi, naaetii.

¹⁸Ani ki Paulus kidaa gane ka kojáá tou ebijai. Anija buda kodo naga-tou. Jikoo bokouto keetou to.