Read Ekari 1 TESALONIKA 2 Bible Online

1 TESALONIKA 2 - Ekari bible

1 TESALONIKA 2

¹Ikii kede epi, ei, noogeimaido, inii kidou jaweetege ko wogidaa ko beu.

²Tika kodaa inii gaagaa tita kodeja, daana Pilipi makiida ikii epi kodo peepu nitita kodeja, inii Ugatame duba uu peu kidi iniija Ugatameja ka ajii mana kodo kiti-kinii, akaije umina duba kuduuga.

³Iniija ka kiti-kinii mana kou ko uneuneidaiga juwa, jimudaiga juwa, pujaidaiga juwa, ko beu.

⁴Kodeja Ugatameja juma dege-dege nitijawijake ajii mana inii maida nijadokijawita kodo danite, okai kou dani inii mana wegai, me ka juma dege-dege nitijawe-tita ko beu, kodeja Ugatame kidaa; kegepa igi nijake-tai me kidaa juma dege-dege nitijawe-tita.

⁵Inii kigeena ma deega-deega mana wegai beu, ikii epi, daana kibigi dimi apumai beu, Ugatame epi kidi.

⁶Daana me ka ibo nijaike-tijake na ubai beu; ikeepa na, me inoopa na. Inii Keristus eti-awitaido kouja bida agijo kimuwakija kodeja;

⁷kodeja ikii jupi inii debuu kegepa jago, ukame idaana ka jokaane ejupugija danite.

⁸Okai kou danite, kogaa umina kigajake, Ugatameja ajii mana kijawudii dimi to ko beu, kodeja inii akaato kede kiniine maija, inii didi umina kigata kouja.

⁹Ikii kede gai kouja, ei, noogeimaido, iniija ka ee ma, kaga ma, kei tei tita kodo; inii wanee agapi kei tigoo to, ikii meena ma kugouto ti kijadokijawe-tita, Ugatameja ajii mana ikeepa wuditaidaiga.

¹⁰Ikii kede mana neewegai, Ugatame maija, iniija ka jimubeu ka, daana maakodo ka, daana anaanibeu ka ijeida kodo ikii maakodo gai bagee jupi.

¹¹Ikii epi kouja, nakame idaana ka jokaane etopija dani bukaa ikii me gakita inii kitopai ma,

¹²kegepa kijamaipajawii ma, kidiimai ma, Ugatameja juma dege-dege kitija ijeidaiga ume-wo te-tita, okaija jakimakita makiida ma, ajiipi kodoopa ma, mana kitita me kidi.

¹³Okai kouja inii te duwajake Ugatame muta etuwagoo to; Ugatameja mana iniija ka kijawudijake jakimakita gaa kodo, ikiija ka mana jakimakai kou ko me ka mana danite ko beu, kodeja Ugatameja mana danite; okai kou puki kodo; ikii maakodo gata daniija duba kei teete mana kodo.

¹⁴Ei, noogeimaido, Judea makijo ka Keristus duba maakodo gai uguupuguu komuga kinita kou ko ikii eepe-tai bagee kita. Ikii na ikiija ka bagee ka peepu kitita, okei na Jahudi bagee ka peepu etita kodo danite.

¹⁵Okei Tuhan Jesus wagimakita, daana tikauwa ka mana wudita bagee maija, daana inii ke neebakikumita; Ugatame juma dege-dege etai beu, daana utoma bagee ma akaije.

¹⁶Ojaa bagee ajii te-tita inii oowegaine tijake okei kuwei niimai. Kou danite okeija ka peudo tiki tiki tijaweete. Kodeja Ugatameja emoge dimi kumi dimi okei maida dokeenii.

¹⁷Kodeja ikeepa make akawude tijake mijo gaa to, ei, noogeimaido, pekaida mana to, kegepa ko beu; inii umina kidi didi gajake kidoune kodaa ekowa-motii.

¹⁸Inii ikeepa jawiine kodeja, ani ki Paulus kidi, kigeena to ko beu, kodeja Teege ka jamo nigojawijake.

¹⁹Meima kipaiga iniija ka kotopijawita dimi juwa, iniija ideide dimi juwa, iniija kobidoke tijake petege juwa, iniija Tuhan Jesus jumaapa okaija meitagiida?

²⁰Beu maa, ikii kede iniija ka ajiipi bokouto ma, ideide bokouto ma.