Read Ekari 1 TESALONIKA 5 Bible Online

1 TESALONIKA 5 - Ekari bible

1 TESALONIKA 5

¹Kodeja kou wagi ma, kou uwa ma mana kodo, ei, noogeimaido, kapogeije kijaebijamakai ko gai peu ko beu.

²Tuhanja putu naago kodo oma bagee wanee jato meja dani bukaa kaita kodo ikii kede gajake kojoka.

³Me ka „muka-muka ma, kojáá kojáá ma” mana wegaja gaa kodaa, okai kou gaa kodaa tetepepe potu tidoke taita, jagamo idaana joka didi kodo danite, tijake okei petii te timake.

⁴Kodeja ikii ke, ei, noogeimaido, bunita duba ko beu, tijake kou putu naago kodo oma bagee dani bukaa gootoki ti kitijawiita.

⁵Ikii ke aweida ka jokaane; agapi ka bagee kede: Inii ke wanee ka juwa, bunita ka juwa, ko beu.

⁶Okai kouja, me ino danite uno ti niumei, kodeja needoutojake ipouje kai.

⁷Uno umeete bagee wanee jato uno umii kouja, daana utaadijo uneune bagee kede wanee jato uneune.

⁸Kodeja inii ke agapi ka bagee kede ipouje neetiwei; tijake maakodo gai ma, ipa akaga ma, toopu pajó kodo boko maida makii; daana dagi maida watii ko, ajii tai dimi kotopijawii.

⁹Ugatameja inii emoge dimi kodoopa boko nijaduwajawii ko beu kouja, kodeja iniija Tuhan Jesus Keristus kidiidaiga ajii te-tita;

¹⁰inii maida make bokata me kidi, inii anigou tope maija, uno umipe maija, okai ma enaimo ajii te-tita.

¹¹Okai kouja, ikii kede kegepa akatipinijake tai, daana bo akawejake tai, ikii kei teete kodo danite.

¹²Ei, noogeimaido, ikii jupi kei teete bagee, Tuhan duba migougu kijamakijake, daana kitope-tai kede, ikii ibo ejaikai kidiimai.

¹³Daana okeija kei tai agijo maida make ei egajake umina ibo ejaikai. Ikii kede muka-muka akaate to tai.

¹⁴Daana inii kidiimai, ei, noogeimaido, ena peu bagee etopai, odoo bagee eepopai; debuu bagee eedadai; me utoma kojáá kojáá akaate tai.

¹⁵Ikii gai, me idaana ma peu agijo peu ka abu te japai, kodeja enaa agijo to akaate tai, ikii kede maija, me utoma kedeepa maija.

¹⁶Ideide to te-wo.

¹⁷Te duwajake sembahjang to tigoo.

¹⁸Utoma agijo utoma maida nigajaweege etii to; kii ke Ugatameja dimi kouja, ikii maida make, Keristus Jesus duba.

¹⁹Roh kodo te dinijawii.

²⁰Douja dota mana aadaba te tijawii.

²¹Utoma agijo utoma igi jakimakijake enaa ka mana jakimakai.

²²Peu agijo utoma maida make akaato munii.

²³Tijake Ugatame kidaa, muka-muka epauto me kidi, jimubeuda boko kijaduwajawii, daana ikiija ka roh puki ma, dimi puki ma, má puki ma, kimadagajawii, jimubeu, anaanibeu kidi, iniija Tuhan Jesus Keristus meitagiida to.

²⁴Ugatame mana kitita kidi enanauto, tijake boko kijaduwajawiitagi.

²⁵Ei, noogeimaido, sembahjang nijakimakai.

²⁶Enakeneka bagee utoma jimubeuda unu akajume tai.

²⁷Tuhan eka duba kidiimai, kii kapogeije kiija enakeneka bagee utoma kedeepa jaebatai.

²⁸Iniija Tuhan Jesus Keristus jikoo bokouto kijaduwajawii.