Read Ekari 2 TESALONIKA 2 Bible Online

2 TESALONIKA 2 - Ekari bible

2 TESALONIKA 2

¹Iniija Tuhan Jesus Keristus meitagi mana kou ko, daana inii ke okaapa kotuu taitage mana maida make ko, inii kidiimai, ei, noogeimaido,

²ikiija dimi ko bunikigi juwa, totome juwa, te tai; kou ko roh ka juwa, mana muto ka juwa, iniija kapogeije ebijata puga ka juwa, Tuhanja putu naago keega jaijo.

³Me idaana ma puja ti kiukimakai. Me wedaba wouga kidaa tai beu gaa kodaa kou putuuda te kaita kouja, daana peu juma doodoo te-tai me ewaida kaitagi maija, umina peu kaitagi ka kidi.

⁴Akaije te-tai kidi, daana akaato ibo awijake utoma ugatame wegaigai juwa, migaakobe eteigai juwa, wado etigajake Ugatameja owaapa animakijake „Ani ki Ugatame kidi ki” mana wegai.

⁵Ikii gai beu, mee? ani ikeepa tootega gaa kei manaido utoma kiti-kineetega.

⁶Daana kawe dani ka wo gojawii mana ikii epi, wo gojawijake putuuda gaa kodaa okai ewaida ke-tita.

⁷Boone-booneidaiga dijo beebu mana kodo kei te-wo, kodeja ito kou wo gojake te-tai kidaa wo gojake to tou, beu kaitagiida to.

⁸Tijake peu juma doodoo kidi ewaida kaitagi, Tuhan Jesus kidaa ebe puu ka wagimakaitagi ka kidi, daana okaija meitagiida ataati ka eigajawiitagi.

⁹Peu juma doodoo kidi pagi taitagi mana kou ko Teege ka gokobaki tijawiidaiga bida agijo ma, puja ka ego takuu-takuu ma, dou beu agijo ma ewaa kai;

¹⁰daana peu kaine bagee peudaiga puja eukimakai manaidaiga, okei ajii te-tijake maakodo bokouto ei gai beu kouja.

¹¹Okai kouja Ugatameja uneune ibo okei maida jamejawii, puja mana maakodo ga-tita.

¹²Okei maakodo bokouto maakodo gai beu tijake peu duba ideide tei tita bagee utoma kede peu kidaa te-tita.

¹³Kodeja ikii maida make inii Ugatame nigajaweege etigoo to tija, kowaa kei, noogeimaido, Tuhanja ei kigata bagee kede, edoga kidi make Ugatameja kiwitoki-motita kouja, ajii te-tita, Roh ka jimubeu keewitaidaiga, daana ikii maakodo bokouto maakodo gata kouja.

¹⁴Okai kou maida make iniija ajii manaidaiga mana kitita, iniija Tuhan Jesus Keristus ajiipi agijo go-mote-tijake.

¹⁵Okai kouja, ei, noogeimaido, ikii bo wemakijake iniija ka kitopita mana kodo jakimaki-tou to tai, mana godajake ka ma, kapogeije ka ma.

¹⁶Iniija Tuhan Jesus Keristus kidaa, daana Iniitai Ugatame kidaa, ipa nigajake imo to togoo nijamaipajawita kidi, daana jikoo bokoutoudaiga enaa kotopijawita dimi niimita kidi,

¹⁷okai kidaa ikiija kegepa kijatipinimakai, daana utoma enaa kei tija agijo ma, enaa manaida ma, bo kiwejawii.